18
Babiloŋ koyraa kayriroo
1 Woo banda ga, ay dii almalayka tana kaŋ zunbu ka hun beenaa ra. A goo nda hini beeri, de nga daržaa na laboo kul kaarandi.
2 A na jinde jer ka kaati ka nee:
«A kaŋ, Babiloŋ beeroo kaŋ.
A tee ganjey hugoo, a tee hundi žiibi kul lanbadogoo.
Ciraw harramante [nda adabbaa harramante kaŋ ti konnayhaya] kul lanbadogoo no.
3 Gandawey kul na alaneb hari moora laalaa haŋ kaŋ ti nga woy nda aru izefututaraa.
Laboo kokoyey na izefututaray tee a bande,
laboo maamalakey na alman tee nga addahar bajoo ra.»
4 Ay maa jinde tana kaŋ hun beenaa ra, a nee:
«Ay jamaa, wa fatta a ra hala war masi hanga a bande nga zunubey ra,
hala nga bonawey ra, haya masi kaŋ war boŋ.
5 Zama nga zunubey žigi-žigi cere boŋ hala beenaa ra,
Irkoy hongu nga goy futawey.
6 Wʼa bana nda nga hunday bana takaa,
wa nga teegoyey cine hinka yeeti a se.
Alaneb hari moora kaŋ a nʼa birji potoo ra,
wa nga cine hinka birji a se.
7 Takaa kaŋ nda a na nga boŋ noo darža ka addahar,
wʼa noo woo din hinnaa hottay nda binehẽenay.
Zama a ga nee nga binoo ra:
‹Ay ga goro sanda kokoy woy,
ay manʼti woy kaŋ kurɲoo buu,
ay si buuyan batu marga abada.›
8 Woo maaganda se zaari folloku nga bonawey ga kaŋ a ga kaŋyaŋ ti:
buuyan, nda beray goraa, nda heray, de a ga tonandi nuune ra ka tee boosu,
zama ir Koyoo Irkoy kaŋ nʼa ciiti ga gaabi.»
9 Laboo kokoyey kaŋ na woy nda aru izefututaray tee a bande ka addahar ga hẽe ka yooyo waati kaŋ i dii nuunaa kaŋ gʼa ton dulloo.
10 I ga kay nongu mooro ra nga hottaa hunburaa maaganda se, i ga nee:
«Ni bone, ni bone, koyra beeroo,
Babiloŋ koyra gaabantaa,
guuru folloku ra ciitoo zunbu ni ga!»
11 Laboo maamalakey mo gʼa hẽe ka buuyan batu marga a se, zama boro kul si yee ka ngi jinaa day.
12 Jinaa manʼti kala wura, nda nzorfu kaaray, nda tondi hay šenda, nda alyakuutu, nda šukka baana hay šenda, nda šukka ciray hay šenda, nda alharru šukka, nda šukka ciray zaram, nda bundu hew kaana dumi kul, nda tarkunday hiɲe taalam dumi kul, nda bundu hay šenda taalam dumi kul, nda alhan, nda guuru, nda tondi henna,
13 nda alkalfa, nda day-day, nda dugu hew kaana, nda turaari, nda dugu, nda alaneb hari moora, nda jii, nda farin henna, nda alkama, nda hawyaŋ, nda feejiyaŋ, nda bariyaŋ, nda bari torkayaŋ, nda tamyaŋ, nda boro hundikoyniyaŋ.
14 «Hayey kaŋ ni hundoo ga bagʼey mooru ni ga.
Hayey kul kaŋ ga boori i ga nere dere ma ne.
I si duwandi koyne.»
15 Hayey wey maamalakey kaŋ duu Babiloŋ bande alman ga kay nongu mooro ra nga hottaa hunburaa maaganda se, i ga hẽe i ga buuyan batu marga.
16 I ga nee:
«Ni bone, ni bone, koyra beeroo
kaŋ ga bankaaray nda šukka baana hay šenda,
nda darbay ciray, ciray henna, nda iciray zaram,
a ga taalam nda wura, nda tondi hay šenda, nda alyakuutu.
17 Guuru folloku ra alman beeroo woo kul tee yaada.»
Harihii beeri zurandikey, nda haya kul kaŋ ga dira gamoo din ra, harihii goykey, nda boro kul kaŋ ga goy teekoo boŋ kay nongu mooro ra.
18 Kaŋ i ga dii nuunaa kaŋ gʼa ton dulloo, i kaati ka nee: «May ti koyraa kaŋ ga hima koyra beeroo?»
19 I na labu warra ngi boŋey ga, i ga hẽe i ga buuyan batu marga ka kaati ka nee:
«Ni bone, ni bone, koyra beeroo
kaŋ na borey kul kaŋ goo nda hii beeriyaŋ teekoo boŋ tee alman nga almaanoo ra!
Zama guuru folloku a tee saaji.»
20 Beenaa, ɲaali nda nga kayriroo!
War mo, Irkoy boro henanantey, nda diyawey, nda annabey,
wa ɲaali nda nga kayriroo,
zama Irkoy ciiti ka ciiti dunbu war se a ga.
21 Almalayka foo kaŋ ga gaabi na tondi kaŋ ma nee fufutondi zaa kʼa warra teekoo ra ka nee:
«Takaa woo nda Babiloŋ koyra beeroo ga warrandi ganda nda sahã,
a si yee ka diyandi.
22 Kurbu beeri karkey, nda hooraykey, nda laatikarkey, nda laati beeri karkey jindey si yee ka mandi ni do.
Goy dumi kul kabe goyteeri si yee ka diyandi ni do.
Fufutondoo jindoo si yee ka mandi ni do.
23 Fitilla gaayoo si yee ka dii ni do,
aruhiijoo nda woyhiijoo jindoo si yee ka mandi ni do.
Zama ni maamalakey ti laboo boro beerey,
ni kottaa na gandawey kul darga.»
24 Nga do annabey, nda Irkoy boro henanantey, nda borey kul kaŋ koosandi laboo ga kurey garandi.