7
Stefanus Yahudi Naei Yoyo Koseyore A Na Bene-Bene Uwoumi
1 Imam kaban mae Stefanusre hineunge, “Ndi a ahunaiboke elate na hele?”
2 Stefanus yae weumi, “Aka naei baeke naei nane merau arai naei yoni-yoni mewaube mana borombo! Aei yobe Abraham Haran kanire ei mo Mesopotamia kanine nekewole hee yae, Allah nene waewae bele Kiyae yae meke weunge,
3 ‘Waei yo yan bele waka baeke wa bele nukeibo. Reyae kelereibote kanire elere.’
4 “Nebeinye Abraham Kasdim kani nukeungeboke kulun uke Haran yo Siria kanire ewole. Abraham naeko herekera Allah Abrahamde benen ukeunge nda Israel kanine meke, mayae nekaube kani mbai.
5 Nebei hee Allah Abrahamde nda kani reufi mbai sambai eyei, nebeibe Allah Abrahamde a heteungekoke nda kani nekande Abraham bele naei orona mena belere emmiyende, erabae nebei hee Abraham fa ban nekewole.
6 Allah nda a Abrahamde uwounge, ‘Waei orona mena meiko-meiko ro miyae wanen mae yo hi kanine enainyekende. Nebei yo naei me keleene nekenayende meuboi auboise konaimiyende na heki ralo yakama 400 enainyekengkonde.
7 Nebeibe Reyae meuboi auboise konaimile yore ehee bukulu isemile. Nebeisa waei orona mena menaibalende menate nda kanine Rare ei menaisemolonde.’
8 Nebeisa Allah Abrahamde ukeunge nebei a heteungekokere na hele hila rabo halenayendere kelenaimile naeise, Abraham naei uwa nane merau norona mena bele kelu fa-fare ro u elan folonaimile. Abraham na kelu Ishak honokatera ya mehine name mo, na ro u elan neungehake. Ishak na kelu Yakub. Yakub na kelu wa me bee oro nen bee bele, aei Yahudi yoni-yoni yae arai henare wammile.
9 “Nebeibe aei arai hena naubake Yusufre kena hensen mae ikele yae kowainyene, roi naise haeiboke Mesir kanine, yebaei bubaeise eke nekewole. Nebeibe Allah kayaa hebeungeke,
10 Nane merau na kena bekore koweke nolora hole moloungeke. Firaun, Mesir kani naei ondofolo, Allah na kena mokoungeboke Yusufre foi mokoungeke. Isaei hebaen na bumana hele Yusufre Allah ikeungene, Firaun Yusufre raneujeke Mesir naei kani kelare nane merau Firaunbe imae eise neyae me mokommilere.
11 “Na heki ban mo, moni mai kaban sele Mesir kani bele Kanaan kani belene meungeke kowate. Ro miyae weijei kaeiboi ban kowate aei yobe naei raman baeumihoke.
12 Yakub borowole Mesir kanina gandum bele. Nebeinye na fa-fare (aei arai sena naei elande yore) ukeumi roko mbai nendo ekate.
13 Roko bee nendone ekate Yusuf na aka baeke ware naei u yakaumiboke weumi, ‘Reyae Yusuf niyae.’ Nebeisa wa, Mesir naei ondofolo Yusuf naei imae mbai obe mbainya yore ro roumiboke.
14 Na heki ban mo Yusuf naeko Yakubre nane merau naei imaena ekainyekate ro miyae fa-fa nemene 75 menatere kayaa ukeumi ekate.
15 Yakub kulun uke Mesir kanire ewole, nekeweke nebei kanine hereke. Nebei sului mbai aei arai hena naei nebei kani mbainye molowate.
16 Na no yaraikoke ekate, Sikhem kanine Abraham mae Hemorle fa-fa naeisa roi yae rouke bulei mbainye molowate.
17 “Abrahamde heteungekoke a yoni-yoni Allah na huluise mokonnebonde hee nobewounge yae, aei yobe naei Mesir kanine na ro miyae emerewole.
18 Nebeisa ondofolo mbai, Yusufre naeisaei ban kiyae, Mesir kanire ondofolore ike nekewole.
19 Nebei ondofolo ike aei ro miyaere eiweitasi kowole. Aei yobe naei hurengkonde belene waeli hele bewoumi nebei heena honowate wayeu fa-fa hainyate nane merau honate.
20 “Nebei hee yae Musa hongkate, kelu kin foi hamai foi bu yae bu yae yawoungene, oko name Musa naekole nenakele imaene mo meinyarekoke.
21 Nebeisa Musa a moi bu moinya aitaufike yae Firaunbe maengke yae eke eungerouke, naei fa hele wanen mae naraweke.
22 Mesir kani naei isaei hebaen yoni-yoni Musare kelaeinyeke ane faeunge mene une mokowole nemene na foi mo.
23 “Musa ralo yakama rorele u bee yeuboke mo, na kena roukeunge na yoho Israel ro miyae na u mekai ekainyekate ma ereiboise ewole.
24 Eke bae, erele naei yona ro mbaise Mesirna ro yae rahuae bowolene, naei yona rore hakouboke nebei Mesirna rore houboke.
25 Musa naei u benera nekewainye elele, ‘Maei yoho naeisaei Allah rare ukeufe naei hayeikoise mekale,’ nebeibe na yoho naeisaei ban.
26 Ya heuboke mo, nebei wanen mbai Musa meke Israelna ro bee hanne howotere foise mokoneikondere uwoumi, ‘Aka baeke naei bee! Mayae bee aka baeke hele ya. Rahene ma ure-ure boube?’
27 “Nebeibe hande yobouboke ro yae Musare weunge, ‘Nde yae ware maei be yun be yebae hebelere nane merau maei walire huluise koloumele rore roukayete?
28 Wenana Mesirna rore houbokae wanen rare houfebondere mekae?’
29 Nebei wanen borokene, Musa Mesir kanira hakauboke ewole Midian kanine meiko-meiko ro wanen mae nekeweke. Nebei kanina miyaebe rouke, kelu bee honoungekoke.
30 “Nekeukoke ralo yakama rorele u bee mo, Sinai moko kelaeunga a kala-kalane o kaei-kaei ken mbai i yae boloufike bewole nolora malaikat mbai Musale bokore meke.
31 Musa nebei wanen erewolene u bene baeiso-baeiso kowole. Isaeise rowendere nebei i kelaeufe nobewounge hee, Allahlena a weungebe borowole,
32 ‘Waei yobe Abraham, Ishak, Yakub, naeite Allah Reyae Niyae.’ Musa fene wakune oinyeu wae hineuboke kowole, nebei i bewolere na ijoko erei.
33 “Nda abe borole, ‘Nda kani orore hebeyae ijen yolo-yolone woro mehau hireukokae keiko.
34 Ninae fere Raei ro miyae Mesir kanine nekate naei beko mainyehubaukoke naei ereukokamaele nane merau naei ele kali boroubokamaele. Nebei aerene nare haisemikonde naeise Reyae mewakoubokale. Mana mei, Reyae ware ufete benen Mesir kanire bukeufinde elere.’
35 “Nda Musa mbai Israel yoni-yoni yae ahi yae elewate wainye, ‘Nde yae ware maei be yun be yebaere hebelere nane merau maei walire huluise koloumele rore roukayete?’ Nebei Musa mbaise i faeu bulura malaikat yae Allahlena are uwounge aei yobe naei be yun be yebaere yembonde nane merau holere molommibonde kiyae.
36 Nebei Musa mbai yae Israel ro miyaere Mesir kanira yaweumiboke maibaleke. Allah Musale walora Mesir kanine bele, bukoba kaban haisai yalene, nane merau mewate a kala-kalane ralo yakama rorele u bee rambun emere-emere meumokoukoke.
37 Nda Musa mbai yae Israel ro miyaere uwoumi, ‘Allah yendo kayaalo mbai raeinya wanen ro hi mai nolora wennele mende.’
38 Nda Musa mbai aei yobe naei kamahe naei Israel ro miyae nolone a kala-kalane nekewole nane merau Sinai mokone ike malaikat yae are uwounge. Eyae wali nibi foi nekemale naeise, wali heere foloukoke a faeufe Allah nebei Musa mbaise ukeunge.
39 “Nebei wanen mokowolere aei yobe naei kamahe naei yoni-yoni ijoko erewainye hororebe, naei are angkaei oboroi kowate. Musare ahi yae elewate na kena u kowate benen Mesirre bukenate enatere.
40 Harunde wainye, ‘Maere ei moloi-moloise rambun hi mokoimebo. Nebei rambun yaere maere yawemmebonde emale. Rahebe nebei Musa aere Mesirra yaweumeboke mandebaleke kiyaele uwa ranne yeuboke meyae maeisaei ban.’
41 Nebeisa sapi kelu be nulu hoime bahere enaimihononde naei mbai mokaiboke. Obo yoku hili era akau erare ongkoufe felenate naeise yarowate mewate nane merau naei me yae mokaiboke rambunde ei molonainyelere yo koi yo bae yae kowainye.
42 Nebeinye Allah moi buleumiboke nane merau waeumihike nenaeijae yakuna findelaufe maskare, okore, hure, ei molaimiyeke. Nebei naeise nda a yenjo kayaayo homofaene molaikoke,
‘Israel yoni-yoni,
ralo yakama rorele u bee bele a kala-kalane
mai obo yoku hili era akau erare bae
Rare ongkoufe felaufene!
43 Hoime bahe Molokle fale bele findelau walobo Refanbe hoime bahe bele
mai me yae mokauboke rambun-rambunde eise molommilere yaraweke oraweke.
Nebei aerene Reyae mare Babel yo ahau buhau ekehonolene haisengkombere.’
44 “Aei yobe naei kamahe naei a kala-kala nekewate heene, Allah eise memmihawende anuwau einyekate ijenne neyate. Nebei anuwau na ma Allah yae Musare keleungeboke huluinye neyate.
45 Nebei anuwau bele yae Yosua aei yobe naeite orona menare yaweumiboke, aei kani nekandena nekewate yo aei bene Allah hukeumihikere nukenaisandere ekate hee, nebei anuwau bele nemene rowayeke. Nebei anuwau Ondofolo Daud nekewole heene namman honoumeke.
46 Daudle wali Allah kena hele kowounge nane merau Allahre riyewounge kena kongkondena, Yakub yae bumare kaewounge Allahle imae nembonde.
47 Nebeibe Daudle kelu Ondofolo Salomo yae Allah nekenende imae heuboke.
48 “Nebeibe Allah ro miyae yae haeiboke imaene enekei. Allah nebei a elewole naeise Naei yenjo kayaayo homone nda wanen molaikoke,
49 ‘Surga Raei kendan wameran niyae,
kani kela Raei oro hensen anuwau.
Rahe imaebe mayae Rare hensebombere?
Makei anuwaunge Reyae u no isebonde?
50 Nda kani kelana rambun nemene fomene
Reyae mokowale.’
51 “Aka naei baeke naei, ma yun elaekei sele. Mai u bene Allahre isian nekeyate ro miyae wanen. Mayae Allahle are oboroyei. Allahle Rohre moi yae mo buleyaunge, mai yobe naei yae kowate wanen.
52 Allah na yenjo kayaayo nemene fomene mai yobe naei yae weitasi kowaimi! Wali himaloungeboke Kiyae mendere a nulaiboke yenjo kayaayo haikoke. Nebei ro walire himaloungeboke Kiyae mbai Yesus Niyae. Menaeijae kelai nekaube hauboke.
53 Malaikat-malaikat walora Allah wali heere foloukoke a mare yae yengkokembe, nebeibe mayae ehakoikoi hele.”
Stefanus Ruka Yae Hayewainyele
54 Yahudi yoyo koseyo Stefanus elewole a nemene boraikokera na u bele hubainyehike na ikele han romou fefere Stefanusre kowainye.
55 Nebeibe Stefanus Allahle Roh yae maemae koungekoke kiyae. Na ijoko yakure kanele bae Allah Naei one hengko hehe naeukokebe ereke nane merau ro bele anuwau Allahle meube reufine Yesus hebele erewole.
56 Stefanus yae weumi, “Mai ijoko bumare kanen! Raei ijoko erale surga wekeunge. Yesus, Allah bokora meke ro miyae uware yeuboke Kiyaere eranale Allahle meube reufine hebele.”
57 Nebei are borate yo naengkaei ahunaikoke, na kali bele kaenewate Stefanusre na kulun bainye habelekainyele ikilaiboke,
58 yobaiboke, yo moise ekate, ruka yae ekaihaiwainye. Stefanusre rukare haiwainye yo naei malobe hokolo fa mbai na ro Saulus noro wene mo kolowate.
59 Na rukane haiwainye yae Stefanus kaenele, “Tuhan Yesus, Ra unulu roweise!”
60 Nebeisa oro selen-selen mae oukoroukoke kali na kaban mae kaenele, “Tuhan, nda beko nebei yo ranne ehayeijae!” Nebei are mo eleukoke na hibi na no hokoukoke.