6
1 Nebeinye, Wali Ondofololena a na bemena kelewaimebe nukemabonde, Wali Ondofolole einye henammebonde naei a usaei wasaei kelaeimene hakomakon. Aei hila rabo aehure raimehike naei a na bere kelewaime nda niyae: Allah bele wahenaikonde u mekai beko mokatera nulu kenainyebonde naei, Allahre hila rabo halenainye naei,
2 bu kaimi naei, ro miyae uwa ranne me kolaimile naei, ro miyae nulu yo mahe yora anainyunde naei, nane merau huba ban haei ban ehee bukulu enainyehubande naei.
3 Allah kena kongkondena, nda hee eyae Wali Ondofolole einye henamabonde naei a usaei waeisaeibe kelemamile.
4 Nde maenin neyae nda rambun hubawainye: na bere Wali Ondofolole wali hena bona nibi na a foi faeu foise isaeyaeiboke, nane merau hehe yae na kena u einye naeumikoke, roko mbai surgana foi yoni-yoni hubawate, Allahle Roh aumiboke,
5 Allah yae elele a na foi yoni-yonire hubawainye, bena honoifoyole yane Allah me u mokonende naei elaere hubawainye,
6 nebeisa Yesus Wali Ondofolore moi bulaeinyebokena, na hului ban sele nebei ro miyae a usaei ungainyekondera bensonde na beko bakora benen nulu kennebonde. Rabuhine ban nenaeijae Allahle Kelure benen ohaline bate wanen moibe bulaeinye nane merau mokainyeboke ro miyae bene fe mokoinye.
7 Meyae ro miyae bele kani kela bele nda wanen mae ahunemabonde: kani kela ya yae mololene bu fileungene mere ure mokole kiyaele naeise o haka ha haka ani mokate, nebei ma kani Allah foi yoni-yoni yeunge.
8 Nebeibe kani kela fonom kaiwa mo fatena, nebei kani rabuhi ban yeuboke, na hului olomo yae nennebonde, inye ungayonde bengkonde baensonde.
9 Aka naei baeke naei, nebei a usaei wanen wayembe hororebe, mai uwane eyeiboise maei kenara elae hubannele, rabuhine ban Wali Ondofolore hila rabo haleyaungene, Allah hole moloyemmi ro miyaebe nekaube.
10 Mayae Yesus Naei eleuboke wekeumi ro miyaere kena buhae hewaumine, nda hee bele hakoimeyaumi. Nebei nibi yae mayae Allahre kena buhae hewaunge. Allah u mekai na ijen mo mokole Kiyae, mai me ure naei u benera enundeikoi sului.
11 Meyae kena hele kande Allah nuleungekoke a huluinye mokondere rabo elae halembe naeise, nebei me foi u foi na hibi-hibi mokomembe.
12 Mayae behuaebe ehenaeijae, nebeibe ro miyae na hebaen-sebaen mae Wali Ondofolo Naei a elelere hila rabo halaete walora Allah are heteungekoke rambunde yarate ro miyae bune wane hamennembe.
13 Yahudi ro miyae rore rowainye yobe Abrahamde Allah a heteungekoke. Allahre hi yae ha yae ehameikoi suluinye, Allah naei Ro yae a holo koukoke.
14 Neyae eleukoke, “Na hele, Reyae foi yoni-yoni yae ware ereisawete, nane merau waei orona mena mokoremibonde helen bolen hurende nalende.”
15 Abraham na hebaen-sebaen rakeweke wa Allah are heteungekoke hului rouke.
16 Ro miyae hi a holo kaikoke rambun naeise yembonderene, ro bele rore kaeneikoyeunge. Nebei mekai yaere are kilate rambun foi mokoiboyate.
17 Allah kena koukoke Naei are heteungekoke rambun enaiyaronde ro miyaere yakammibonde Naei meraufe raungehike huluinye enaibende helene, a holo koukoke.
18 Eyae Allah mokoungehake wali nibire oromale naeise wali beko nibi nukandeboke nane merau Allah nuleuboke a huluinye mokondere rabo elae halaende. Aere kenare ammenunde naeise Allah ame-ame ebei sului Kiyaele a heteungekoke yae bele a holo koukoke yae bele Abrahamde ukeunge a elae mokoungeboke. Nebei Allah eleukoke a bee ma hi omokoi sului.
19-20 Allah nane merau Abrahamde a heteungekoke naei orona mena walora nda kani kelana ro miyae nemene foi yaronate. Wali Ondofolo Abrahambe orona mena yae mekene, eyae na hului Allah heteungekoke are rabo elae hele halemande, rabuhine ban Wali Ondofolole walora foi yarandekoke. Neyae Allah bele mbainye nekete. Melkisedek wanen imam kabande huba ban haei ban mokonende.