4
Allahlena A Faeu Yoni-Yoni Na Hele, Ame-Ame?
1 Kena buhaere haemale aka baeke, ro miyae nemene nauware Allahle Roh a weumi walora elenayende yo naei na hele yae eleyeijae. Ro miyae nauwara Allahle Roh a weumi walora elate yore umali hubammihimbe. Nebei mekai yae mayae isaeyembombe nebei roh Allahlena, Allahlena ban, rabuhine ban ame-amere kelaeimi yenjo kayaayo helen sele maijakauboke nda kani kelane faeungekoke oroyate.
2 Allahlena Roh, Allahlena Roh ban naeise nda u mekai yae mayae isaeyembombe: Yesus na hele Allah yae oro umaufe heraweungeboke Wali Ondofolobe ro miyae uwa wanen mae nda kani kelare meke are na hele yae elenatena, nebei ro miyae Allahle Roh a weumi walora elate.
3 Nebeibe Yesus Wali Ondofolo ban mae elenatena, Allahle Roh a weumi walora elate yae eleyeijae. Nebei ro miyae Wali Ondofolore ro ban yembondere relennele kiyaele roh a weumi walora elenate. Nebei Wali Ondofolore ro ban yembondere relennele kiyae mende naei a mayae borokaube. Nda hee nebei kiyaele roh nda kani kela eise meke.
4 Kelu naei omi naei, mayae Allahle holona ro miyaere yaendeboke. Nane ame-amere kelaeimi yenjo kayaayore melaumihake, rabuhine ban Allahle Roh mare aubokembene. Allahle Roh elae bele, nda kani kelana wali beko nibine orate ro miyaere aumiboke roh elae ban.
5 Ame-amere kelaeimi yenjo kayaayo nda kani kelana wali beko nibire hakoyate yo, wali beko naei a faeufe kelaeimi. Nda kani kelana wali beko nibine orate holona ro miyae nebei ame-amere kelaeimi yenjo kayaayore boroyaimi.
6 Meyae Allahlena ro miyae. Nde yae Allahre ro ronnebonde kiyae maeinya a faeu elandere boronde. Nde Allahle holona ro miyae banna, maeinya a elandere neyae oboroi sele. Nebei nibi yae Allahle Roh a weumi walora kelaeimi ro miyae bele, walobo yun ame-ame bele kiyae a weumi walora kelaeimi ro miyae bele, na yaka ro romamikonde.
Maise Naeise Kena Buhae Eise Meise Yae Hemembe
7 Kena buhaere haemale aka baeke, men, aeise naeise kena buhae u buhae hema, rabuhine ban kena buhae u buhae hei-seise Allah yae yeume. Fa manemfa honate wanen na kena u Allahlera honokate ro miyae kena buhae u buhaere heyate nane merau Allahre ro rainyeboke.
8 Ro miyae nde kena buhae u buhae eheyei kiyae Allahre oneunge, rabuhine ban Allah kena buhae u buhae hei-sei none.
9 Allah naei kena buhae u buhae aei u nolo u kainye nda u mekai yae meumejakauboke: eyae Naei walora wali nekemalerene Allah Na Hina Fa Hoi Fa nda kani kelare ukeunge meke.
10 Kena buhae u buhae na mekai nda niyae: eyae Allahre kena buhae u buhae haennekoke ban, nebeibe Allah yae aere kena buhae u buhae heumekoke. Aei beko bakore ahengkonde baensonde naeise, Na Kelu ukeunge meke Naei wali yae kinyembondere.
11 Kena buhaere haemale aka baeke, Allah aere kena buhae emekai bele heumekoke aerene, eyae nebei sului mbai kena buhae aeise naeise hemale.
12 Ro miyae roko mbai sambai Allahre ereiboi hororebe, kena buhae u buhae aeise naeise hemalena, Allah aei wali einye nekende nane merau Na kena buhae u buhae aei kena u einye na hului yembonde.
13 Eyae Allah bele mbainye nekande nane merau Allah aengkele mbainye nekande naeise nda nibi name yae isaeyaendeboke: mbai nendo, Naei Roh aere ikeumene.
14 Bee nendo, eyae ijoko yae erekannele Ako Allah Naei Kelure ukeunge nda kani kelana ro miyae hole moloiboise meke. Nebei are ro miyae hiwa yore eyae isaeyaemmile.
15 Ro miyae nde Yesusre Allahle Kelu yae na hele elende kiyae, Allah bele mbainye nekete nane merau nebei kiyae Allah Nangkele mbainye nekete.
16 Name nendo, Allah aere kena buhae u buhae heumekoke naei isaeyaendeboke nane merau hila rabo halaende. Allah kena buhae u buhae hei-sei nore yeuboke. Kena buhae u buhae heyate ro miyae Allah bele mbainye nekate.
17 Yesus ro miyae naei walire hului kolommibonde yane aere be kalemmehande naeise, Allah na kena buhae u buhae aei kena u einye na hului-sului nda nibi yae mokommekonde: nda kani kelane eyae Yesus bele mbainye nekemayende.
18 Kena buhae u buhaere haeime ro miyaere mayae fe waku okommimae. Ro miyae Allah kena buhae u buhae heume wanen hiwa yore kena buhae haeimile yo, Allah ehee bukulu yemmilere buhae-buhae okoi. Ehee bukulure fe waku bele enaikonde ro miyae Allah kena buhae u buhae heume wanen ehei yore.
19 Allah na bemere hele aere kena buhae u buhae heumekokene, eyae hire hire kena buhae u buhae hemamile.
20 Ro miyae hi yae elende, “Reyae na hele Allahre kena buhae u buhae haenale,” nebeibe naka baekere ikele koimeyeumina, nebei ro miyae na wali ame-ame bele. Rabuhine ban aka baeke ijoko ereumi kiyaere kena buhae u buhae eheinya, roko mbai ijoko yae ereiyei Allahre kena buhae u buhae ehei sului.
21 Nda a Yesus Wali Ondofolo yae aere ukeume mokomalere: nde yae Allahre kena buhae hennele, naei aka baekere nebei sului mbai kena buhae u buhae hemmile hele.