10
Na Moisa Orowate Yore Yesus Naei Kaliare Mokonatere Ukeumi Enatere
(Mrk. 3:13-19; Luk. 6:12-16)
1 Ya mbai mo Yesus na moisa orowate yo me bee oro nen bee belere riyane arileumihike mo, walobore hukenaimile naei elae nane merau era buloo na mane-mane onomi inyaimile naei elae nda yore kiteumiboke.
2 Nda ro me bee oro nen bee bele yo na ro niyae: Simon na ro hi Petrus yae eiwewainye, naka baeke Andreas, Zebedeusle kelu wa bee Yakobusle naka baeke Yohanesle,
3 Filipus, Bartolomeus, Tomas, Matius pajak arileweke kiyae, Yakobus Alfeusle fa, Tadeus,
4 Simon zelot holona ro, Yudas Iskariot Yesusre haiboke kelaise neke kiyae.
5 Na moisa orowate yo ro me bee oro nen bee belere Yesus ukeumi enaterene a weumi, “Yahudi ro miyae ban naei yo yan bele Samaria kanina yo yan honate bele nibire yae eweyeijae.
6 Nebeibe Israel ro miyae yoni-yoni nekate domba wanen here ware waeiboke nundeyate howaleyate holonare yae embe.
7 Nda abe huwemmile: Allah yae merau raungehike ya Naei holona ro miyae Wali Ondofolole me kelee u keleene menayorulembonde nekenate naei ya nobeungekoke.
8 Erana buloona kate ro miyae onomi yemmile, herenate yore walemmile, u bauwaunga kate yore onomi yemmile, alo u rannare hukemmile. Mai elae nanemene me karo yae yaraukokene, nebei sului mbai me karo yae emmiyembe.
9 Roi emasra, perakra, tembagara, ma yolu ha roi haufau hawate anuwau einye eyaroi eijae.
10 Nibi embe naei era inyale holoboi, uwa naei malo beere, oro mehau karo bele, o mehukun, eyaroi eijae. Rabuhine ban kaliare mokonde kiyae na kalia mokowole hului roibu inyainyele lonbe.
11 “Yo kaban yan kabanne nane merau yo melae honatene mayae embalembena, mare eise annembombe u mekai foi bele ro mbai baennekombe. Nebeinye nekembe mayae kulun wembe embe.
12 Nebei ro naei imaere emembombena, nebei imaena yore ro melaeyemmibombe.
13 Nebei imaena yo ei anayembombena, mai uware kitewamale hakawamalena onomi foi yemmile. Nebeibe mare ahi yae elenatena, nebei onomi foi mai uware yobombombe.
14 Ro miyae mbai mare ei aiboise ahi yae elende nane merau mainya a faeu wemmilere oboroinya, nebei yo yanda, imae obera embalembe. Mai orona kani bahe bongkombe nebei anuwau embalembera rubommibombe. Neyae u mekai beko helebe mokaibokene nda iwau wanen mae kelemmibombe
15 Reyae wamale, nana hesele Allah yae ro miyae mere nommiyonde yane Sodom yo bele Gomora yo belena ro miyae naei ehee bukulu foma-foma inyaibonde, nebei yo yoni-yoni honatena ro miyae naei ehee bukulu ehekaei sele kaenaibonde.
16 “Bene nekenayembe! Mayae domba wanen mae me baemale nekaube. Reyae mare ufembe han bele obo yoku serigala wanen ro miyae nolore embere. Nebeinye mai isaei hebaen bumane nekembe mai u mekai han ban aye yawo-yawo wanen mae.
17 Uwa kayaa bele yae hebembe. Rabuhine ban mare ikilenayembe Yahudi naei yun-jun hebate bene mai wali hului kolonainyekombere mare kinyenayembe, nebeisa Allahre ei mom-mom imaene erahuae olenayembe.
18 Rare hakaufeboke aerene mare yobonayembe gubernur yoni-yoni bere nane merau ondofolo kaban yoni-yoni bere embe. Raeinya a faeu nda yo bele Yahudi ban ro miyae belere nebei mom mae kelemmilerene yobonayembe embe.
19 Nebei yo naei me einye kinyenayembombe hee mayae are wemmile naeise buhae ohokoijae. Mayae nebeinye elembe a nanemene Allah mare kelenembe.
20 Rabuhine ban nebei hee mai u benera elembe ban, Arai Allah Naei Rohle walora mayae elembe.
21 “Nda u mekai enaibende hele, ro miyae naka baeke nake mbainyare wali huluise koloyaimi yo naei me einye kinyenaimile. Naeko yae na kelure, kelu omi naei ako nakere nebei sului mbai enaimikinyende.
22 Rare hakaufekoke aerene ro miyae nanemene mare ikele konayembe. Nebeibe ro miyae kena beko hubanainyele hororebe kena yae herawembonde Reyae a uwamale hului nekende kiyae Reyae hole molorembonde.
23 Yo hine weitasi konayembena, na kelaeunge yore yae hakangkombe embe. Reyae mare isaeyaemale, nana hesele Israel naei yo yoni-yoni honate mayae huba eimokoikoijae, Reyae Allahle bokora mekale ro miyae uware yeubokale Kiyae merele.”
24 Yesus Na moisa orowate yore kelewoumi weumi, “Isaeise isaeyele kiyae na isaei hebaen ana, nebei isaeise keleunge kiyae bumana. Nane merau yebaei bubaei ro ban sele, na rowa ro bele.
25 Isaeise isaeyele kiyae nebei isaeise keleunge kiyae naei wali nibi hului mbai orole, rilibo ehayei. Yebaei bubaei naei rowale wali nibi hului orole. Reyae imae yun wanen Kiyaere walobo yun Beelzebul ro raisebokene, mayae nebei sului mbai Raei imae mbai nekaube yo wanen nane merau ro na beko hele yae ronayembe.
26 “Nda a isaeyaeubokene, weitasire kayembe ro miyaere fe efaeijae. Felaimi rambun nemene wewe enaimimolombonde, nunna honate rambun nemene emmiyakambonde.
27 Mare huae yae uwamale a nebei a mbai na rai yaka yae wemmile. Mare angkaei kelaeufa a maehae-maehae yae uwamale a ro miyae nemene na yaka yae isaeinyaibondere imae malira wemmile.
28 Nda uwa na hului honayengkombe yore fe efaeijae. Neyae narakare ungayembe embe naeise na hului ban. Nebeibe Allahre fe faenne. Neyae na hului narakare ungembe embe, ndine beko hele ennehubambe.
29 Aye kilin-kilin (aye kerendeng) naise roi ane hele. Na hului nebei aye beere heiboyate perak mbai rowate horobe, nebeibe mai Arai Allah kena okoikoinya mbai sambai nendon ewaeisi kani ranne eruwei sele.
30 Nane merau ma yunna umaa hebate nanemene Allah me baeukoke.
31 Nebei aerene weitasi konayembe yore mayae fe efaeyeijae, Allahle bene nda aye yoni-yoni katera mayae aweukoke hele.
32 “Nde yae ro miyae ro be ro yoinye Rare Wali Ondofolo yae elendena, Reyae naei mekai mbai Maeko surgane nekele Kiyaele ro be ro yoinye nebei rore Raei me kelee u keleene nekate holona ro yae erelengkonde.
33 Nebeibe nde yae ro miyae ro be ro yoinye Rare Wali Ondofolo ban mae elendena, Reyae naei mekai mbai Maeko surgane nekele Kiyaele ro be ro yoinye nebei rore Raei me kelee u keleene nekate holona yo ban mae erelengkonde.
34 “Mai u benera nekayembe elaube Reyae rei mai nda kani kela rande roukale mekale. Reyae rei maibe erowei mei, nana hesele buloo felabe roukale mekale.
35 Reyae mekale aerene Allahle homofaene moloukoke nda a hului yembonde,
‘Kelu naeko bele,
maengke nenake bele,
na fau miyae nenake bele
han onyeibonde releneinyele.
36 Nane merau na yokeijo hele bae
ro miyae naei imae mbainya yo bele yembonde.’
37 “Ro miyae nde yae naeko bele nenake belere nane merau na kelu bele na maengke belere kena buhae hemmile ma Rare emekai bele henselena, Raei moisa hakombonde holonara yeisi raeiboi ban sele.
38 Raei aerene ohaline bonaikonde ro Rare hakoufele wanen ehakoiboi kiyae Raei ro miyaere yeisi raeiboi ban sele.
39 Nde yae naei wali Raei me einye ekinyeiboinya, naei wali holere omoloiboi. Nebeibe nde yae naei wali Raei me einye kinyensebondena, nebei ro na wali hole molorebonde.
40 “Rare hakaufekoke aerene ro miyae ei haungayembena, Rare ei hawaise. Nane merau Rare eise hawensele ro miyae nebei kiyae Allah Rare ukeufe mekale Kiyaere ei haweunge.
41 Nde yae yenjo kayaayo yae ro rainyebokene ei hawennelena, na roibu yenjo kayaayo hului yaronate. Nane merau nde yae wali himaloungeboke yo yae ro rainyebokene ei hawennelena, na roibu nebei sului rowende.
42 Raei moisa oronde aerene hun ban wai ban yeuboke kiyaere bu nuku kolaei mbai ken sele yennele anensindena, nana hesele na roibu einyundeiboi.”