16
Yesus Iwau Emere-emere Mokondere Riwainye
(Mrk. 8:11-13; Luk. 12:54-56)
1 Ya mbai Farisi holona yo bele Saduki holona yo bele riya mbai mekate Yesusle bokore u malire hubanainyehindere. Nda yo yae Allahle elae naei iwau mahi eme helere Yesus kelemmibondere riwainye.
2 Nebeibe Yesus yae weumi, “Huae raei hu naeukoke inyukui hasai roroiboyolene mayae elaube, ‘Wahenare buma foi sele.’
3 Nane merau Israel kanine ya heiboyole rene hu naeukoke inyukui hasai roroiboyole mangko belene mayae elaube, ‘Yare molondere.’ Yaku buma na mekai ma mayae na hului nulembombe, nebeibe nda heena Raei me u mahi-mahi mokalere mayae isaeyeiboi sele.
4 Mayae u hila wa hila koyaube ro miyae, hoime bahe rambun Allah merau wae ei molaungele lonbe, iwau emere-emere kelerembombere riyaufe. Mare na iwau eme hi ekeleiboi, Yunusle uwana yeubokere mo kelerembombe.” Nebeisa Yesus nda yore nanene nukeumiboke aloungekoke ewole.
Farisi Naei Ragi Wanen Kelaeimi A Kayaa Hebembe
(Mrk. 8:14-21)
5 Yesus na moisa orowate yo bele bukoba reufine fokate yae nda yo u bene nekeumihike feu na mene oroweifoi.
6 Yesus yae weumi, “Farisi holona bele Saduki holona bele yo naei ragire mauwa kayaa bele hebembe.”
7 Yesus nebei a mekai eleukoke borokatene, na moisa orowate yo hi yae hire weunge, “Eyae feu orowei meinye Yesus ndi a mekai haraungeboke elele.”
8 Nda yo yae elate a Yesus isaeyeuboke, nebeinye weumi, “Rahene mayae feu ban maube ane kolaunge, hila rabo wauwau koyaube ro miyae!
9 Mayae namman isaeyeiboi selene! Mai u benera onengkokembe era, feu maehae mbai yae 5.000 ro anaikoke, nebeisa kakali naennaen hului kalun arilaufike?
10 Nane merau feu mehine bee yae 4.000 ro anaikoke, nebeisa kakali naennaen hului kalun arilaufike?
11 Naendae mekai tonne mayae isaeyeiboi sele, feu naei abe Reyae eharaiboi eleikoi! Reyae wamale, Farisi holona bele Saduki holona bele naei ragire mauwa kayaa bele hebembe.”
12 Nebei mekai a Yesus ukeumine, na moisa orowate yo isaeyaeiboke Farisi holona Saduki holona yae kelaeimi a usaei uwa kayaa hebenate, ragi hele ban.
Petrus Yae Yesus Na Hele Wali Ondofolore Yeuboke Are Eleukoke
(Mrk. 8:27-30; Luk. 9:18-21)
13 Kaisarea Filipi yo nobaeinyekoke mo, Yesus yae na moisa orowate yore a hinewoumi, “Reyae Allahle bokora mekale ro miyae uware yeubokale Kiyaere ro miyae yae nde yae elate?”
14 Nda yo yae wainye, “Ro miyae hiwa yo Yohanes bure kowoumi kiyae yae elate, hiwa yo Allahle yendo kayaalo Elia yae elate, hiwa yo Allahle yendo kayaalo Yeremia yae elate, hiwa yo yenjo kayaayo ro holona hi yae elate.”
15 Nebeisa Yesus nda yore hineumi, “Nebeibe mayae nde yae Rare elaube?”
16 Simon Petrus yae weunge, “Weyae Niyae Allah yae oro umaufe heraweubokete Wali Ondofolo, Allah huba ban haei ban nekeimeyele Kiyaele Kelu.”
17 Yesus yae Simon Petrusre weunge, “Foi moi sele weyae Simon Yunusle kelu, rabuhine ban nda are ro miyae yae ware ewei, Maeko Surgane ekenekele Kiyae yae ukete.
18 Nane merau Reyae ware wawale, Wa ro Petrus, na mekai ruka. Nda ruka ranne raei jemaat arenundere naei ro miyae nulu yo mahe yo naei me kelee u keleene einyekei sele.
19 Raei me kelee u keleene nekate ro miyae holore enayembonde nibire Reyae ware kelereibote. Weyae nebei nibi romau kayaa roware yeubonde. Nda kani kelana rahe rambun weyae hun raungehinde, Allah surgana Kiyae nebei sului mbai ware be hinenete. Rahe rambun weyae meraufe raungehinde, Allah surgana Kiyae nebei sului mbai ware be hinenete.”
20 Nebeisa Yesus na moisa orate yore a hun raumihike weumi, “Reyae Wali Ondofolore oro umau heraweufeboke a ro miyae hiwa yore ehuweijae.”
Yesus Herende Naei A Roko Mbai Nendo Isaeyeumiboke
(Mrk. 8:31—9:1; Luk. 9:22-27)
21 Nebei heera Yesus huba raweuboke na moisa orowate yore na yaka yae uwoumi, Neyae Yerusalemde ende hele, nane merau Yahudi naei yun-jun naeisa, imam yun-jun naeisa, nane merau Musale walora wali heere foloukoke are isaeyaeiboke kelaeimi yo naeisa, weitasi konainyele beko helen hubannekonde. Nebeisa honaibonde nebeibe ya name nendo Allah yae anennunde.
22 Nebei a wanen Yesus eleukokene, Petrus me nekeunge Yesusre yaweungehoke enere yae ekete mo a elae yae weunge, “Tuhan, nda benate naeise felande yae Allah kena koukoube weungeweube. Nda mekai waei uwane ebeijae hele!”
23 Yesus weke Petrusre weunge, “Walobo yun, Ra moise yae eye, Rare oro halun wanen yeuboke kiyae. Waei u bene nekayete ro miyae helen mae u bene nekaimi hului mbai, Allahle u benene nekainye ma ban.”
24 Nebeisa Yesus na moisa orowate yore weumi, “Raei moisa hakombonde ro, naei kenare koyele wali mekai kena yae herawende hele, nebeisa Raei aerene ohaline bonaikonde ro wanen mae Rare hakonsebonde.
25 Rabuhine ban nde yae naei wali Raei me einye ekinyeiboinya, naei wali hole omoloiboi. Nebeibe nde yae naei wali Raei me einye kinyensebondena, nebei kiyae naei wali hole molorembonde.
26 Na foi rahe ro miyae mbai nda kani kelana rambun naei me einye honoube, nebeibe wali hena bona eitowei. Nane merau rahe rambun mae na hului na wali hole moloiboise beneikonde.
27 Rabuhine ban Reyae Allahle bokora mekale ro miyae uware yeubokale Kiyae Maeko naei one hengko hehe kaban bele einye na malaikat yoni-yoni bele surgara memale. Nebei hee yae Reyae ro miyaere na u mekai wa mekai mokowate huluinye isemile.
28 Nana heselebe Reyae wamale, ndane mewarileufike ro miyae mai nolona hiwa eherei mo nekenate, Reyae Allahle bokora mekale ro miyae uware yeubokale Kiyae Wali Ondofolore yolu ikilaiseboke one hengko bele ma yae merele erenaisele.”