20
Anggur Heke Kalia Mokate Yo Naei Ahuba
1 Yesus nebei yore weumi, “Raei me kelee u keleene nekate ro miyae holona na mekai, rowa mbai na rene kaukau imaera akouboke naei anggur hekere mokonate yone baeumiyeke wanen mae a ahunerebonde ufembere.
2 Weumikoke yo ya mbai na roibu hobeikoise dinar mbai yae be hinaiboke, nebeisa nda yore ukeumi naei anggur hekene ekaimokowate.
3 “Nda heke rowa rene hukai mehine keli hului eukuke oroweke. Nai hei-sei anuwaunge ro miyae hiwa kalia ban nekatebe erewoumi.
4 Nda yore weumi, ‘Mangkele yae raei anggur heke kalia mokombere. Eme, roibu yeyaimi hului mare isembe.’
5 Nda yo alainyekoke ewate.
“Rai hu hului me bee oro nen bee bele (12) nane merau huae rai hukai name hului eukuke oroweke, ro hiwa yo hubayaeikoke mo bena hubayaeikoke a hului yae benen ukeumi.
6 Huae rai hukai maehae mbai sului benen eukuke oroweke, ro miyae hiwabe hubayaeikokere nda yore weumi, ‘Rahene mayae nda hu koko kalia ban nekeyaube?’
7 “Nda yo wainye, ‘Ro hi kaliare emamokonde naei a eweinye.’
“Heke rowa yae weumi, ‘Nebei mekainya mayae raei anggur hekene kalia emmoko.’
8 “Hu helae bowole hee nda rowa na kalia yunde hebele rore weunge, ‘Kalia yo nanemene na roise waheumikondere kaeneimiko mai. Moisa mayeuboke yo naeise huba raweubonde waheumile onde na rene na mayeuboke yo na moi sungkaya.’
9 “Hukai maehae mbai sului kaliare mayeuboke yo mekate, nebei kalia yun mae ro mbai dinar mbai yeumikoke.
10 Nebeisa na rene hele kaliare mayeuboke yo mekate, nda yo na u benera nekaimi helen yaronaikonde era, nebeibe nda ro mbai dinar mbaibe yeumikoke.
11 Nda yo yaraikoke heera na mulun-mulun bele heke roware wainye,
12 ‘Moinya hele mayeuboke yo hukai mbai mo kalia mokaikoke bele meyae nda hu koko rolonsan ijaja beyande yo bele, rahene roi nane helen nen yeumekokae?’
13 “Nebei rowa yae na ro hire weunge, ‘Aka baeke, rahe u mekai ware keleubokawalene raei u mekai na ijen ban mae eleyae? Ya mbai dinar mbai isete naeise weyae be hineubokae.
14 Waei kayeero rowei, ndara eye. Reyae ware ikawale hului yae kalia moisa hele mayeuboke yore isemikondere kena kale.
15 Raei rambun honaisele raei kena hului yae mokorele. Reyae eiwahe meiwahe kena ma haraungebokalene, nebeinye weyae kena hensen okoijae!’
16 “Naei mekai yaere ro ban nekate ro miyae helen Allahle bene ro bele inyaibonde. Rore raimi ro miyae helen ro ban inyaibonde.”
Yesus Naei Herende Ya Naeise Isaei Iwoumi
(Mrk. 10:32-34; Luk. 18:31-34)
17 Yesus naei Yerusalem yore ewate, nibi nolore mo haeikoke bae na moisa orowate yo me bee mehine bee belere mo kaeneumikoke, nenaei mo arilaisike Yesus ane weumi,
18 “Angkaei boron! Eyae nda hee Yerusalem yore ande. Nebei anuwau emalene Reyae Allahle bokora mekale ro miyae uware yeubokale Kiyaere imam yun-jun holo bele nane merau Musale walora wali heere foloukoke are isaeyaeiboke kelaeimi yo holo bele me einye kinyenaisebonde. Nebei yo yae honaisebonde naei a hokonaikonde.
19 Nebeisa Yahudi holone eyeiboi yore kinyenaisebonde. Nebei yo yae aukaka weitasi konaisele, nane merau ohaline bonaisekonde, nebeibe ya name mo Reyae arenunde!”
Yohanesle Yakobusle Naeise Nenake Yesusre A Riwounge
(Mrk. 10:35-45)
20 Nebeisa Zebedeusle miyae na fa-fa bee Yakobusle Yohanesle yaweumiboke Yesusle bokore ekate, oro selen-selen mae roroukoke, rambun mbaise riyennehindere.
21 Yesus yae weunge, “Rahe rambunbe weyae kena koyae?”
Zebedeusle miyae yae weunge, “Waei me kelee u keleene nekate ro miyae holo einye, reyae kena kale nda fa-fa bee na huluinya Wa meline meubene eumihangkonde.”
22 Nebeibe Yesus yae weunge, “Rare riyarae a mekai wenaeijae isaeyeiboi.” Yesus euweke hokolo bere weumi, “Reyae andehinde bu kolaei mayae na hului aneisibe, ((Rare beko enaisehubande na hului mayae ennehubabe))?”
Yesusre weinye, “Meyae na hului.”
23 Nda beere Yesus weumi, “Nana hesele Reyae andehinde bu kolaeisa mayae aneisibe. Nebeibe Raei meline meubene ennekebe naeise Raei me einye ban. Nebei anuwau Maeko yae eleukoke ro miyaere yemmile naeise mokoungehake.”
24 Yesus na moisa orowate me bee hiwa yo nebei wanen a borokatene, hokolo beere ikele hele kowaimi.
25 Nebeinye Yesus nda yo nanemene kaeneumikoke mekate mo weumi, “Mayae maisaei, nda kani kelana yun-jun Allahre isian nekeyate holona naei kena hului yae naei me kelee u keleene nekate yore mokoyaimi. Nane merau ondofolo kose na keleena yore herawaimi weijei kaeiboi ban nekeyate.
26 Mai holona nekaube nolone nebei mekai ban. Nde yae kena kole mai nolone kabande yembonderena, mai yebaei bubaeise yembonde hele.
27 Nane merau nde yae mai nolone be neiboi rore yembondere kena kondena, mai yebaei bubaeise yembonde hele.
28 Rare erensebo, Reyae Allahle bokora mekale ro miyae uware yeubokale Kiyae Rare mokonaiselere mekale ban. Reyae ro miyaere mokoremilere mekale, nane merau ro miyae helen naei beko bako aherekonde baensonde naeise Raei uwa yae kinyeremibonde honaisebonde.”
Ro Bee Ijoko Kumba Yesus Onomi Ikeumi
(Mrk. 10:46-52; Luk. 18:35-43)
29 Yesus na moisa orowate yo bele Yerikho yora aibaleke hee ro miyae helen bolen Yesusre hakainyekoke ewate.
30 Yesus ewole nibi enene ro bee ijoko kumba roiboke nekewote. Yesus ele borowotene hokolo bee kali yae kaenewote, “Tuhan, aei Yahudi Ondofolo Daudle orona mena, Wa yanekoi yase yae maere ei meimaibo!”
31 Nane ro miyae helen bolen ate yo yae hokolo beere waimi, “Hileibo!” Nebeibe nda bee benen kali elae hele yae kaenete, “Tuhan, Ondofolo Daudle orona mena, maere yanekoi yase yae ei haweimeko!”
32 Nebeinye Yesus hebeunguke, hokolo beere kaeneumikoke mo, Yesus yae hineumi, “Rahebe mayae kena koube Reyae mokorebobere?”
33 Hokolo bee yae weinye, “Tuhan, maei kena ijoko eralere konde.”
34 Yesus kena beko hele hubawoungene, na mere mo nekeunge na ijokora me rameumihike. Nebei hee yae na ijoko keleikoke na hului erewote. Nebeisa Yesusre hakoinyeboke ewate.