15
Malaikat Yoni-Yoni Yo Bei Yan Bei Bele
1 Nebeisa reyae erale yakune iwau hi kaban nane merau mahi. Malaikat mehine bee hele riyau ungaibonde naei yo bei yan bei mehine bee na mene ikilaikoke. Nebei yo bei yan bei yae Allah Na ikele han romou bele haneuboke kole riyaufe weungebondere.
2 Reyae erale naubu kaca i bele alaeinyeboke ma wanen enene nane obo yoku bele na be yoi ma mokaikoke rambun bele na ro na nomor belere melaimihake ro miyae hebate. Naeise naeise Allah yae ikeumi kecapi na mene ikilaikoke.
3 Nda yo Allahle yebaei bubaei Musa yae kowole bele Domba Kelu kowole bele koi bae kate,
“Tuhan Allah Elaelo Wakelo,
Waei me u mokowoyae kaban sele nane merau era mahi hele.
Weyae kani kelana nemene naei Ondofolo mere mokoimeyamae.
Waei wali nibi a na ijen sele nane merau na hele.
4 Tuhan, ro miyae nemene fomene Ware huba haeisa yanayete,
nane merau Waei Rore hili hebayete.
Rabuhine ban Tuhan, Wembai sele nene waewae bele.
Kani yoni-yoni nemene hokonaimende,
Ware ei molonayete,
rabuhine ban Weyae na ijen bangka mo mokowoyae naeise yakauboke.”
5 Nebeisa reyae erale surgana Allahre ei mom-mom imae Allah yae isaeiwoumi homofae honole anuwau wekeunge.
6 Malaikat mehine bee yo bei yan beise mehine bee bele nebei imaera maibaleke. Na malo hiraikoke nda ma: lenan yolo-yolo wili halaman, nimoko ha mas.
7 Allahle yebaei bubaei keli nauwa obo yoku ma yo nekate nolora hi aunguke malaikat mehine beere naeise naeise ebe emas yae mokaiboke waheumikoke. Nebei ebe einye Allah wali huba ban haei ban nekenende Kiyaele romou han rilaikoke.
8 Allahre ei mom-mom imae ei Naei nene waewae bele Naei elae wake bele ongkou wae maemae koungekoke. Nebei imaere hi yae ha yae eyeisi sului mende nda malaikat mehine bee yo bei yan bei mokonaibonde baensonde.