19
Allahre Na Bumane Hele Kaemande
1 Nebeisa reyae borale ro miyae helen mae elate a wanen surgara nda a kaenate,
“Allahre na bumane hele kaemande!
Aei Allah holere moloumeboke Kiyae
na mekai sele Neyae nene waewae bele elae wake bele nekenende,
2 rabuhine ban na hele yae nane merau na ijen mae Allah yae walire hului ikolowoumi.
Nebei rore rainyeke yoko miyae kaeimae miyae naei yoko kaeimae kowole yae nda kani kela na ro miyae na u bene beko mokowoumi kiyaere Allah yae me nokeunge.
Nebei miyae Allah Naei kalia mokowate yore houkoke kiyaere Allah ehee bukulu na mekaibe ikeunge.”
3 Nebei surgana ro miyae helen mae benen kaenate,
“Allahre na bumane hele kaemande!
Nebei yore hukelele i ongkou no ban hee ban kitenende.”
4 Nebeisa nane 24 yoyo koseyo bele yebaei bubaei keli nauwa obu yoku ma yo bele Allah kendan wameranne nuweuboke nekele Kiyae bene be are roraiboke ei molainye wa kaenate,
“Amin, Allahre na bumane hele kaemande!”
5 Nebei kendan wameranda a mbai borale elele,
“Allahle kaliare mokoyaube ro miyae Nare hubara haeisa yaneyaunge yo ebimbin kaban-kaban nanemene Allahre bumane kaenne!”
6 Nebeisa reyae borale ro miyae riya kaban naei a wanen, na kulun nauwala hayele bele ku kaendolo rorole bele kulun wanen a kali kaenate,
“Allahre na bumane hele kaemande!
Rabuhine ban aei Allah Elaelo Wakelo yae nda hee mere mokoumile.
7 Men, eyae rei mai koma, me bin me foka boma, Nare hili hebeman!
Rabuhine ban Allahle Domba Kelu miyaere rowende ya yeuboke
nane merau na miyae neme nenaeijae nauwa mokoungehake.
8 Hirengkonde naei malo lenan yolo-yolo bele wili halaman bele nare ikainyele.”
(Yesus Naei eleuboke wekeumi holona na u mekai wa mekai foi mokate malo lenan maye-mayere ahuneuboke.)
9 Nebei malaikat yae rare weufe, “Nda moloiko: Ro miyae Allahle Domba Kelu miyae neme rouke eraman bulau mokombondere kaeneumikoke yo, onomi foka yae hubanainyende.” Baraungeboke weufe, “Nebei a yoni-yoni Allahlene na hele are yaeiboke.”
10 Nebei malaikat noro bene reyae be are nekale nare ei molorendere, nebeibe rare weufe, “Ae, nebei mekai omokoijae! Reyae waeinya wanen mbai Allahle yebaei bubaei nane merau waei aka baeke Yesuslena are isaeinyaimile yo bele na hului mbai. Allahre mo ei moloungele! Rabuhine ban Yesuslena isaeyaimi a faeu nanembai Allahle Roh ro miyae walora huwate a faeu.”
Kuda Keleumonde Helaukeunge Ro
11 Nebeisa reyae erale surga wekainyele. Erale bae kuda keleumon mbai yakauboke. Helaukeungele kiyae na roALLAH WEUNGE A HULUINYE NEKELE nane merauNA HELE. Buloo felane melesayeumi yore na ijen mae me noyoumi.
12 Na ijoko i faeu wanen, na yunde ondofolo yoni-yoni naei fokoma helen feleukoke. Na uwane ro mbai molaikoke Nenaeijae mo naeisaei, hi yae ha yae isian hele.
13 Na malo hane yawaisikebe hireukoke. Na Ro Allah Naei a elele Kiyae.
14 Surgana felayo na malo lenan maye-maye keleumon sele hiraiboke, kuda keleumon randa hawaiboke, Nare hakainyekoke.
15 Bere neuboke Kiyaele euwara ramiyaeli mbai henengkaei sele meukuke. Nebei ramiyaeli yae kani hi hina Allahre ei omoloi ro miyae melemmihande, yanekoi yase ban mae mehukun besi mokaiboke yae nare mere mokommikonde. Anggur ani rande oratene anggur malangka inyaibonde wanen mae, Neyae Allah Elaelo Wakelo Na romou han kolene ro miyae beko mokommile.
16 Na malone bele noro baerene bele ro mbai molaikoke nda niyae:
ONDOFOLO YONI-YONI NAEI ONDOFOLO
TUHAN YONI-YONI NAEI TUHAN.
17 Nebeisa reyae erale malaikat mbai hu ranne hebele aye bumara nakaikoke yore nanemene a elaekei sele yae kaeneumi, “Ndane mo memarilensi, Allah yae eraman bulau kaban mokoungehakere anengkombe naeise.
18 Mayae na hului nda ro miyae naei melen anembe: ondofolo yoni-yoni naei, fela yun-jun naei, elae wake bele yo naei, kuda naei, kudare helaukainyele yo naei, ro miyae yebaei bubaei, yebaei bubaei ban, fele-fele, kaban-kaban, nemene naeise anembere.”
19 Nebeisa reyae erale nebei obo yoku kiyae bele nda kani kelana ondofolo yoni-yoni na felayo bele arilaisike kuda keleumon moko randa helaukeungele Kiyae na felayo bele felare relenainyelere.
20 Nebei obo yoku kiyae bele iwau mahi-mahire mokowole obo yoku bee nendo ame-amere kelewoumi yendo kayaalo kaenewainye kiyae bele na beene ikilaikoke. Na bere nebei iwau mahi-mahi mokowole kiyae yae nebei obo yokule ro uwane molaikoke ro miyae na be yoi ma mokaiboke rambunde ei molaimiyeke yore ame-ame wabewaimile. Nebeisa hokolo bee na wali-wali yae yaraikoke bumoko belerang bele i buloo-buloo benendene hayaeikoke.
21 Nebei obo yoku kiyaele felayo hiwa nanemene, kuda keleumon moko randa helaukeungele Kiyaele euwara meukuke ramiyaeli yae houkoke. Nebei yo houkoke naei u melen aye nanemene mekate anewate, yarele u kaekae bewate.