7
Israel Kanina Ro Miyae 144.000
1 Nebeisa reyae erale malaikat keli hele nda kani kela na huba keline hebaiboke. Neyae nda kani kelane, bu yaunge, o hane, nda kani kelana alu boye keli erawei naeise hunde ranainyehindere.
2 Malaikat hi kayeero reyae erenale hure kitele anuwaufa yeuwakauboke. Allah wali bele Kiyae na meterai mokole rambunde nda malaikat yae roweimeyele. Malaikat keli nda kani kela bele bu yau bele bekore mokonainyebondere kinyeumiboke yore nebei malaikat yae a elae hele yae kaeneumi, weumi,
3 “Meyae Allahle yenjo kayaayo naei feline namman meterai obokoi mo, nda kani kela, bu yau, o ha beko omokoijae ba.”
4 Nebeisa rare yae weufe borale Allahle meterai yae na feline iwau merau baikoke ro miyae nanemene 144.000. Nda ro miyae Israel yoho me bee oro nen bee belera yaraikoke.
5-8 Na yoho yohora 12.000. Na yoho niyae:
Yehuda, Ruben, Gad,
Asyer, Naftali, Menasye,
Simeon, Lewi, Isakhar,
Zebulon, Yusuf, Benyamin.
Ro Miyae Holo Kaban
9 Nebeisa benen reyae erale bae, ro miyae riya fena-fena (kaban) na helen mere ebaeikoi sului. Nda holonara ro miyae hebate: kani yoni-yoni, yoho yoni-yoni, afaeu yoni-yoni nemene. Nebei ro miyae helen nebei kendan wamerande yae nane merau Domba Kelu hebelere na be baeiboke hebate. Na malo koko keleumon hiraikoke, na mene palem no maensa bele mo.
10 Nda yo a elaekei sele yae kaenate,
“Aei Allah kendan wameranne nekele Kiyaele nane merau Domba Kelule
aere hole moleimeboke.”
11 Malaikat nanemene nebei kendan wameran nane merau yoyo koseyo holona bele Allahle yebaei bubaei keli nauwa obo yoku ma yo belere yanaimikoke hebewate. Malaikat holona na kendan wameran bene be ane waitoroukoke Allahre einye molainye,
12 na a bele yae wainye,
“Amin!
Allahre ro buma hosoro kaeinye bele,
hili hebei-sebei bele, isaei hebaen bele, helen foi bele, be hinei-sinei bele, elae wake bele, meli mekai bele
huba ban haei ban nekewende. Amin!”
13 Yun-jun nekate nolora ro mbai yae rare hineufe, “Malo keleumonde hiraikoke yo, nde naei nane merau makeisa mewate yo?”
14 Reyae wanale, “Tuhan Wembai Waeisaei sele.”
Nebeisa rare weufe, “Nda yo weitasi kowaimi mon nolora mate, na malo keleumon yeiboise Domba Kelu ha yae kuyaikoke.
15 Nebeinye, nebei yo Allahle kendan wameran bene hebate, reniai rai Allahre ei mom-mom imaene Naei kaliare mokate. Allah kendan wameranne nekele Kiyae nebei yore ningkang roroumiyende.
16 Nebei yo benen monire bukire ehubaisi, nane merau rolonsan naume nauwane oboi,
17 Rabuhine ban kendan wameran nolone nekele Domba Kelu yae Naei be yun be yebae rore yembonde. Neyae nda yo yawemmibonde walire yemmi bu nore enate. Nane merau Allah nebei yo naei ijoko ibo inse emmihobengkonde.”