1 TIMOTIUS
1
1-2 Onomi foka Timotius. Weyae Wali Ondofolo Naei a elelere hila rabo halaenaene reyae ware kelu hele yae erawale. Reyae Paulus, Allah aei Holelo bele Yesus Wali Ondofolo bele rare ukeisele huluinye Yesus Naei abu akore yeubokale. Eyae hila rabo halaende Yesus Wali Ondofolo wali hena bona yemmele Kiyaere yeuboke.
Reyae ebeli banale Allah aei Ako Kiyaele Yesus Wali Ondofolo bele ware kena buhae aere ban mae heneyete, yanekoi yase yae ei haweyete, rei mai inyeyete.
3 Reyae Efesus yora kulun bowale Makedonia kanire erelere hee yae ware moi hurewawale Efesus yone uwa heraweungele nekele. Nebeinya ro miyaere wali nibi na ijen ban ekeleijae nane merau
4 Yahudi yo mei-mei relime bele na yobe kamahe bele u bene enekeijae weyae a elae weumile naeise nekele. Nebei a yoni-yoni mokommile ro miyae u bene nenaei nenaei nekenaimile, Allahle kaliare omokoyei. Wali Ondofolo Naei a elelere hakainye ro miyae walora Allah kaliare mokole.
5 U bene bele kena u bele yolo-yolo yae nekate ro miyae, Wali Ondofolo Naei a elelere na hele hila rabo halaeinyele yo, naeise naeise kena buhae u buhae haeimile. Ro miyae nebei wali ma nekenate naeise, nebei a elae weumile.
6 Ro miyae hiwa nebei mekai walira aiweke yo a bangka-bangka mo huwate.
7 Nebei yo Musale walora wali heere foloukoke are kelaeimi holona ro miyaere inyaibondere kena hele kate. Nebei homofae be bele rabuleiboyate kelaeimibe, nebeibe a na haraungebokere onaete nane merau nebei kelaeimi a na mekaise, nenaeijae isaeyeiboi.
8 Eyae isaeyaendeboke Musale walora wali heere foloukoke a na meli mekai yae mokomalena, na foi bele.
9 Nane merau eyae isaeyaendeboke Allah yae Musale walora wali heere foloukoke a ro miyae wali himalainyeboke yo naeise ikeumi ban nebeibe nda u mekai ma yo naeise: yun laeibo-laeibo koyate naei yun-junde oboroiboi yo, walire eharaiboi sului yo, Allah Naei elele are ei ehaweyei yo, me u beko mokoyate yo, Yesus Naei eleuboke wekeumi holona u mekai ban yo, Wali Ondofolole wali nibire aukaka kainye yo, ro miyae ako nakere hoyate yo, ro miyaere hoyate yo,
10-11 yoko kaeimaere koyate yo, ro akobae bele uwa mbai hononete yo, ro miyaere ikilenate naise henate yo, ame-amere yaneyate yo, a na hele ban rambunde na hele yae elate yo, nane merau u mekai hiwa Wali Ondofolole wali nibi a faeu hului ban. Wali Ondofololena a foi faeu foi hufemiyende naeise, Allah eise molanne Kiyae rare eleufeboke. Nebei a faeu na foi sele.
12-13 Aei Tuhan Yesus Wali Ondofolo rare elae ikeufe Kiyaere helen foi sele wanale, rabuhine ban naendae mekai horo reyae Yesusre aukakare kowanale kiyae, Nare hakowainye holona yore weitasi koumiyekale, nane merau ro nansau nekewale, Allah rare yanekoi yase yae ei hawewoufe. Nebei hee reyae Yesusre hila rabo ehaleinye nebei yoni-yoni mokowalere onewale handawale. Naendae wanen horo reyae nda wali ma nekewale, Allah yae Naei a elelere hila rabo halaete yo yae erekeufe nane merau a ukeufe Naei kaliare mokorelere.
14 Aei Tuhan Wali Ondofolo na kena buhae u buhae aere ban mae rare heufekokebe melei-melei melele. Neyae elae ikeufe Naei a elelere hila rabo halewale nane merau ro miyaere kena buhae u buhae hewamaele.
15 Reyae na helebe wamale, nda are hila rabo halen: Yesus Wali Ondofolo beko bako bele ro miyaere hole molommibonde naeise nda kani kelare meke. Nebei ro miyae nolona reyae, Paulus, beko bako yae eufemeleke kiyae.
16 Reyae nebei u mekai yae nekewale hororebe, Yesus Wali Ondofolo yae reyae u mekai na beko hele nekewale kiyaere yanekoi yase yae ei hawewoufe. Ro miyae Nare hila rabo halenate wali hena bona enaijaronde yo ijoko erenate Yesus Wali Ondofolo kena hebaen-sebaen na kaban sele nekele naeise, Neyae rare yanekoi yase yae ei hawewoufe.
17 Mana raei kena rowanale yae elerekonde, Allah, Ondofolo Hubalo Mando, huba ban haei ban be hinenainyende, hili hebenainyende. Neyae Allah mbai mo, ijoko yae ekamboi, wali huba ban haei ban Kiyae. Amin.
Allah Yae Paulusre Kena Buhae Aere Ban Mae Heungele
18 Timotius raei kelu wanen yeubokae. Na bere jemaat be yun be yebae hebate yo yae Allahle Roh ukeumi a walora waei naeise a nulainyekoke. Weyae nebei a usaei hakoumile walora Wali Ondofolo wali nibi aerene han felare weyae na mekai yae releungele naeise, reyae nda homofaene molale benen nebei nulainyeboke are wawale.
19 Nane merau weyae releungele yae Wali Ondofolo Naei a elelere hila rabo haleungele nane merau kena u yolo-yolo yae huba haleungekonde naeise, nebei a wawale. Ro miyae hiwa Wali Ondofolo Naei a elelere oboroiboinye, naei kena une beko hubanainyele nane merau naei hila rabo mohi-mohi kamai-kamai yaeiboke, kakai ruka ranne ruwae yae hayeukokene beko yembonde wanen.
20 Nebei nolona ro bee Himeneusle Aleksanderle. Na hibi mo Allahre aukaka koneinyele belene, hokolo bee walobo yunbe me einye kinyeungebokale.