27
Roma jeman Pablo raankana
Jatian noa Italiain raanti shinanxon, Pablo betanbi wetsa presobo, jan jato bonon ixon, sontárobaon koshi *capitán Julio menikana iki. Ja iká iki, icha mai iboaa romamea apo betanbi iká sontárobo ikinai.
Jaskatax Adramitio repintiainoax, pishitaitonin noa nanékana iki. Ja wapóro iká iki, Asia main iká jemabotiibi taxna taxnakaini kaai. Jatian Aristarcoribi nobé kaa iki, ja iká iki Macedonia main iká, Tesalónica jemamea.
Nete xabáketian, Sidón ikain noa nokota iki. Jain ixon ja *capitán Julionin jakon shinanya ixon, Pablo jawen onanabo jato oinni kanon ixon raana iki. Já maxkata jawékinin jabaon akinkanon ixon.
Ja Sidónhainoax pishitax noa kaaitian, niweaban bechiteabi, ja Chipre nasi keebaini noa kaa iki.
Jainoax ja Cilicia betan Panfiliabi winobaini kaax, Miranko noa nokota iki, ja jema iká iki Licia main iká.
Jainoara ja sontárobaon *capitánman, Alejandríainoa wapóro Italiain kaai nokoa iki. Jatianra ja capitánman noa jain nanékiina iki, jaskataxa noa tekíkaini kaa iki.
Icha netera noa ishtomashoko kaa iki, jaskatira masábires meboi, Gnido jema keiba noa nokota iki. Jatian noa kaaikirikeax niwe koshi beaitianra, ja Creta nasi keebaini mayati kaax, ja Salmona keiba noa nokota iki.
Jatian masábires mehananbi ja nasi kexabi ochó kaax, ja Buenos Puertos akin akanainko noa nokota iki. Ja iká iki Lasea jema ochóma.
Moa icha neteira kaxon oinna, jenetiati ochóma ikax, kati onsá iketian, Pablon jato neskáakin yoia iki:
10 —Ninkákanwe jonibo, en oinnara noa kaabi kikin onsá itiki, jaskara ikenbi noa kaaitianra, wapóro bechonman jikimaa icha non neno boai jawékibo non bomati iki, jawekeska ikax noaboribi keyokanti atipanke —akin.
11 Ikaxbi jaskáakin Pablon yoiabi, sontárobaon capitánman, ja wapóro ibon joi betan ja wapóronin teetai capitánman joires ninkáxona iki.
12 Jatian jain noa taxnata repinti, jainxon matsi winómati jisáma iketian, oinxon shinankana iki, jain iamai, tanati ja Fenice repinti kaman nokóti. Ja iká iki Cretan westíora repinti, bari kaai mekayao itan bari kaai mexkaori aniparohoriti bechia.
Aniparomea jato niweaban aká
13 Jaskákenbi ja bari kaai mexkaokeax, niwe koshimashoko bei peokoota iki, jaskara oinnax jaton *ancla nebíbaini, ja Creta tenamanbi moa bokana iki.
14 Noa kakatainbi, niwe koshi bexon, noa jan kaai wapóro tsakaa iki, jawen jane iká iki Nor este.
15 Jaskáxon niweaban noa chitea, moa kati atipanyamaketian, niwen ja wapóro ishto boaitian non bomaresa iki.
16 Jatian kaaira, ja Cauda janeya nasi pekáobi noa kaa iki, jao niwe koshimatani ikaori. Jatianra ja maxko bote chirontameta, teebires meexon non mapémaa iki.
17 Jaskáakin moa mapémaxonra, ja wapóro kaxkénaketian, kikinhakin non risbikan neaa iki. Jatian ja Sirte janeya mashi benes tsakanaketian, rakékin, ja toxbatai *ancla nenankana iki, jaskáaxon niwe bomareskana iki.
18 Jatian moa nete xabáketian, ja niwe bebon koshibirespari iketian, ja wapóroninmea jawékibo jeneki potakin peokana iki.
19 Jatian jawen kimisha nete itin, ja wapóro jayá niai jawékibo, moa jeneki potakana iki.
20 Moa icha netebires bariamaa iki, wishtínbobi non yamé oinyamaa iki. Jatian ja niweaba jeneyamaitian non shinanna iki, moa noa keyotaires.
21 Jatian moa basiora jawékiama ixon, Pablon jato yoia iki: —Jonibó, ja Cretainoax noa pishitamatianbi en mato yoia, ea ninkáxonhibataxa, neskara jakonmabo noa winóyamakeanke, itan jawékiboribi jenekibo non nepóyamakeanke.
22 Ikaxbi rama masá shinanyamakanwe, tsoabira mawáyamai, ja wapóroresa ikai jikii.
23 Yaméra ja en tee axonai Diossenbi raana westíora ángel eki pikówanke.
24 Janra ea neskáakin yoiwanke: ‘Rakéyamawe Pablo, miara ja icha mai iboaa romamea apo bebonmeax yoyo iki kati jake, mia kopíresibira ja mibé wapóronin boaibo, tsoabi Diossen mawámayamai’, akin.
25 Jaskara iketian koshiakin shinankanwe jonibo, enra Dios ikonhai, ja ángelnin ea yoiwana keskábo iti.
26 Ikaxbira westíora nasikira noa tsakati kaai —akin jato aká iki.
27 Jatian rabé semana ja Adriático janeya aniparon noa kaaitian, ja wapóro niwen oke boxon neke boxon aabaina iki. Ja yaméra moa yamé pochínikon, ja wapóronin teetaibaon onankana iki, moa mai kexa taxnati bokanai.
28 Jaskáxon nemin meekana iki, kimisha chonka sokota metro, jatian moa orichaa kaxon aríbakana iká iki rabé chonka kanchis metrores.
29 Jatian moa shanka tsakai kaai shinannax, rakékana iki. Jaskáxon, jan wapóro tewanai chosko *ancla, ja wapóro poinkikirixon jenenko potakana iki, abanon jan tewankin ixon. Jaskáaxon ishton netenon ixon Dios yokákana iki.
30 Jatian ja wapóronin teetaibaon, moa jainoax jabáti shinankana iki, jaskáakin shinanxon ja rebonkonia jan tewanmati ancla jene meran raantiki paranax kaxon, ja maxko bote jeneki pakekana iki.
31 Jatian jaskákanaitian oinxon, ja sontároboyabi capitán, Pablon jato neskáakin keshana iki: —Ja wapóronin teetaibo nenobi iamai jabákanketianra jawekeskataxbi mato kishpintima iki —akin.
32 Jato jaskáa ja sontárobaon jan nexaa kabo xatekana iki, jatianra maxko bote jenenko paketa iki.
33 Jatian moa nete xabáketian, jawékiatanikanon ixon Pablon neskáakin jato yoia iki: —Moa riki rabé semana, jawemein noa winotai ixon masá shinankin, maton jawékiayamaa.
34 Jaskara ikenra en mato yoiai, jawetanishoko moa pikanwe. Jaskatax maton yora koshiinakiranon ixon, neskara winotibira tsoabi mawáyamai —akin.
35 Jaskáakin jato yoitaanan, Pablon pan bixon, jatíbi jonibo bebonxon Dios iráke ataanan, ja pan tobaxon pia iki.
36 Jaskáaitian oinxonra, koshi shinantaanan, jabaonribi pikana iki.
37 Jatian ja wapóronin noa ikana iki, jatíbiainoax rabé pacha sokota chonka sokota joni.
38 Jatian moa kikinhakin jawékiax potóxon, ja trigobo moa jeneki potakana iki, ja wapóro keyátani toxbanon ixon.
Moa wapóro jikia
39 Jatian moa nete xabáketian mai oinxonbi, jawen janerin ixon, ja wapóronin teetaibaon onanyamakana iki. Ixonbi westíora paboro mashi kerakaya oinkana iki, jainxon shinankana iki, jain ja wapóro taxnanti.
40 Jaskáaxon ja wapóro tewanmaa *ancla nexaa kabobo xatekana iki. Jainxon jawen timón nexaaboribi expaakana iki. Jaskáaxon ja rebonkonia chopa panaaboribi keyaakana iki, jaskáakana mashioriakin ja wapóro niwen boá iki.
41 Ikaxbi ja wapóro niwen boá kaxon mashi tsakaax, jain tekeyanmeta iki. Jaskáketian ja wapóro poinkikiri bechonman tsakaxon, toeyona iki.
42 Jaskáaitian oinxon sontárobaon shinankana iki, nonoax jabakanaketian, jatíbi presobo reteti.
43 Jaskáati shinankanainbi, ja capitán keenyamaa iki, ja Pablo jato retemakashamai. Jaskáakin jato amayamaxon jato yoia iki, ja nonoti onanbopari jene tsakataanan boax mainko nokókanti.
44 Jainoax jatíribibo tablanin perakaax, itan wapóroninmea toxbatai jawékibaon perakaax bokantibo, jaskatax boax jatikaxbi mainko nokotax tsoabi noa mawáyamaa iki.