10
Noekan chiní bakebo
(1 Cr. 1.5-23)
Noekan bake Sem, Cam itan Jafetnin, jenen ewa winota pekáo jaton bakebaonbi bakeabora natobo iká iki.
Jafetnin bakebora iká iki Gomer, Magog, Madai, Javán, Tubal, Mesec, itan Tiras.
Ja Gomernin bakebora iká iki Askenaz, Rifat, jainoax Togarma.
Javánman bakebora iká iki Elisa, Tarsis, Quitim, jainoax Rodanim.
Ja Jafetnin chiní bakebaon bakebora iká iki, aniparo kexakea maibo biax, jemaax ja rarebobires ikax; jatonbiribi mai iboax, jaton joinbiribi yoyo iki jakanabo.
Ja Camman bakebora iká iki Cus, Mizraim, Fut, jainoax Canaán.
Ja Cussen bakebora iká iki Sebna, Havila, Sabta, Raamá, itan Sabteca. Ja Raamá bakebora iká iki Seba betan Dedán.
Cus iká iki, Nimrodnin papa, jara iká iki nato main; reken koshi shinanya joni.
Ibon shinanman imaara, Nimrod ikonbires yoinanin mecha iká iki. Jaskara yoiira ikanai: “Mia Ibon imabanon, Nimrod iní keská ikonbires, yoinanin mecha iki”, ikibo.
10 Ja apo iketian, jawen mainmea ani jemabora iká iki Babel, Erec, Acad, jainoax Calne. Jatíbi jabora Sinar mainmea jemabo iká iki.
11 Ja mainmeaxa Asur pikota iki, janra Nínive, Rehobot-Ir, Cala jemabo aká iki,
12 ja ani jema Resénribira aká iki, ja jemara Nínive betan Cala naxaran iká iki.
13 Ja Mizraimhainoaxa, meskó jonibo jaai peokota iki, Ludeobo, Anameobo, Lehabitabo, Naftuhitabo,
14 Patruseobo, Casluhítabo jainoax Caftoritabo jabaon bakebora filisteobo iká iki.
15 Canaánman reken bakera Sidón iká iki, jainoax jawen chiní bakera Het iká iki.
16 Canaánman chiní bakebaon bakea bakebora iká iki, jebuseobo, amorreobo, gergeseobo,
17 heveobo, araceobo, sineobo;
18 arvadeobo, zemareobo, jainoax hamateobo. Jaskata pekáora, jatíbi cananeo jonibo janbískana iki.
19 Ja cananeo jonibaon maira Sidón jemankoniax Gaza jeman senen iká iki, jara Gerar maiori iká iki, itan Sodoma, Gomorra, Adma, Zeboím jemabo ikáorira iká iki, ja Lasa jema senenra iká iki.
20 Jabora Camman chiní bakebo iká iki, maiabotiibira ikana iki, itan ja rarebobires jaton mainbiribi ikana iki, jainoax jaton joinbiribi yoyo ikaibora ikana iki.
21 Semra Jafetnin wetsa reken iká iki, jawen bakeboribira jaa iki. Jatíbi Hebernin bakebora Semman chiní bakebo iká iki.
22 Elam, Asur, Arfaxad, Lud itan Aram, jabora Semman bakebo iká iki.
23 Aramman bakebora iká iki Uz, Hul, Geter itan Mas.
24 Arfaxad iká iki, Selakan papa; itan Selabiribira iká iki Hebernin papa.
25 Jaskatax iikin Hebernin rabé bakeaa iki: ja wetsan jane iká iki, Péleg. Jaskáakinra janea iki, ja pikónontian ja mainmea jonibo, janbískana iketian; jainoax Pélegkan wetsan jane iká iki, Joctán.
26 Ja Joctánman bakebo iká iki, Almodad, Selef, Hazar-mavet, Jera,
27 Adoram, Uzal, Dicla,
28 Obal, Abimael, Seba,
29 Ofir, Havila jainoax Jobab. Jatíbi jabora Joctánman bakebo iká iki,
30 Mesa mainkoniax peokotax Sefar mai ikain senen iká mainkobo jakanara iká iki, jara bari pikotaiori iká manan maibo iki.
31 Jabora Semman chiní bakebo iká iki, maibotiibira ikana iki, itan ja rarebobires jaton mainbiribira ikana iki, jainoax jaton joinbiribi yoyo ikana iki.
32 Jabora Noekan bakebaon rarebobo iki, jaton rekénboainxon peokooxon bakeakanabora meskó keska jaton chiní bakebo iká iki, itan jatonbiribi maiabora ikana iki. Jenen ewa winota pekáora jatíbiain janbiskana iki, jabaonra nato neten maibotiibi iká jemabo akana iki.