7
Jenen ewani
Japekáora Ibon Noé yoia iki: “Ramatian iki miabichores, jatíbi jonibo xaran nokon keena keskáres akí jaa joni. Jaskara ikax, maton bakeboyabi wapóro meran weikanwe.
Rama jatíbi kerásma yoinabo weimawe, kanchis bene jainxon kanchis awin. Ikaxbi kerás yoinaboribi, bene betan awinbichores weimawe.
Jainxonribi weimawe kanchis meskó noyai yoinabo, bene betan awin kataxabo, ja yoinabo nato neten keyoyamai jati kopi,
nenoax kanchis nete senenketianra, chosko chonka nete itan chosko chonka yamé en oi bemai. Nato mainmea jatíbi jiriabo itan jatíbi ja en joniabora en keyoai”, akin.
Jatianra Noekan jatíbi Ibon ja ati yoia keskáshamanbo aká iki.
Ja jenen ewan keyokin mai maponontianra, sokota pacha baritiaya Noé iká iki.
Jatianra jenen ewan retenaketian Noé, jawen awin, jawen bakebo jainoax jawen baban ewabo wapóro meran weikana iki.
Kerásma itan kerás yoinabo, noyai itan main norex iki niaibora,
Noé betan wapóro meran weikana iki, rabé rabébo, bene betan awinbora iká iki, Diossen jato yoia keskára ikana iki.
10 Ja kanchis nete senenketianra, jenen ewan moa mai mapokin peoa iki.
11 Baritia peokota rabé oxe, chonka kanchis netera iká iki. Jatianra Noé sokota pacha baritiaya iká iki. Ja netenshamanribira aniparo xamameax jene jokonai kinibo toebetana iki, jainoax bochikia naikanmea ani xepótibo kepemebotana iki.
12 Chosko chonka nete itan chosko chonka yaméra, nato main oi bei jenéyamaa iki.
13 Ja oi bei peokootai netenribira, Noé, jawen bakeboya Sem, Cam, Jafet itan jawen awin jainoax jawen baban ewabo betan wapóro meran jikia iki.
14 Jatíbi meskó yoinabo, inaatima itan ináatibo, itan jatíbi meskó norex iki niaibo itan noyai yoinabora jato betan weikana iki.
15 Jatíbi yoinabora, rabébo Noé betan wapóro meran weikana iki.
16 Ja meskó yoinabora, bene betan awinbo weikana iki; Diossen Noé yoia keskáshaman ikanketianra, Ibon ja wapóro xepoa iki.
17 Chosko chonka nete kamanra jenen ewa bea iki. Ja jenetiataitoninra, wapóro toxbati peokota iki.
18 Ja jene bei keyáinataitoninra, wapóroribi toxbainata iki.
19 Jaskati ikonbiresi jenetiaxonra, jatíbi nato mainmea ani manan keyábo, keyokin mapoa iki.
20 Ja ani manan keyábo mapokin keyoa pekáora, kanchis metro bebon keyá jene iká iki.
21 Jaskatax, jatíbi nato main jaa joniboyabi, noyaibo, ináati itan ináatima yoinabo, main norex iki niaiboribi mawáti keyokana iki.
22 Jatíbi nato mainmea jiriabo, jiria ixon joinnaibo mawati keyota iki.
23 Noé betan wapóronin ikábobichoresa, jiria banékana iki; ja jain iamaabora mawati keyokana iki: jonibo, inaati yoinabo, noyaibo, jainoax main norex iki niaibora keyota iki;
24 pacha pichika chonka nete kamanra, jenen ewan mai mapoa iki.