2
Efesoain ikana joi akaiboki kirika bomaa
1 Ja Efesoain ikana joi akaibo jato ikinti en imaa joniki, nato kirika neskáakin wishaxon bomawe. Jawen mekayao mekenman kanchis wishtin keska yatannaton, itan ja kanchis lamparin orobires keská napo niaitonra, neskáakin ea yoiimai.
2 Enra maton ikábo onanke; matora ikai kikini teeti, mato riki manatiabo; jainoax matonra ja jakonma jawékibo akai jonibo amaboresti atipanyamake. Jaskara ixonra, ja Diossenamabo ikaxbi noara Diossen raana iki ikaibo min jato tanaxon onanna iki, jabo jansoires ikanai.
3 Jainxon ea kopi masá tenekinbi, shinan namanyamakin maton ea jeneyamaa iki.
4 Ikaxbi westíora jawéki riki nokon keenma: Ja reken ea noikin peonontian aní keskáakin moa maton ea noiama.
5 Jaskara iken shinankanwe, jawekeskarainxon maton ea jenearin ixon. Moa akonkin jakonma jawékibo jenetaanan, jakiribi mato ikátiai keskati jakoni jakanwe. Mato jaskayamaitianra ja lamparin en moa wetsanko taxketi iki.
6 Ikaxbi nokon keen riki, ja en omisai keskáakinribi ja *Nicolaitabaon jakonma jawéki akaibo maton omisai.
7 ¡Ja ninkataibaon ninkákanwe, ja Diossen Shinanman joi akaibo yoiai! Jaweratobaonki eki koshixon jakonma jawékibo janharesai, jabaonra ja Diossen jakonhira jatínko iká, jan jati jiwi bimi kokokanti iki.
Esmirnain ikana joi akaiboki kirika bomaa
8 Ja Esmirnain ikana joi akaibo jato ikinti en imaa joniki, nato kirika neskáakin wishaxon bomawe. Ja rekenainoa, itan senentiainoa, itan ja retekanabi jirinitonra ea neskáakin yoiimai:
9 Enra maton masá teneaibo, itan mato jawebiomashokobo onanke, matokaya jawékinin senenabo ikaxbi. Jaskaribiakin en onanke, judíobo iki ikaibo ixonbi mato ramiaibo, ja jaskataibora *Satanássen jonishamanbores iki.
10 Jaskara iken mato masá tenemakanti jawékiboki rakéyamakanwe. Enra mato yoiai; jatíribi mato xaranmeabora *Satanássen amaa tanakin, mato cárcel meran anoxikanai, jatianra chonka nete senen mato masá tenemanoxikanai, jaskara iken, ja mato ikai jawékibo mawatai kamanbi tenexon senenhanoxikanwe; jatianra ja maton biti jati en mato meniti iki.
11 ¡Ninkataibaon ninkakanwe, ja Diossen Shinanman joi akaibo yoiai! Jaweratoboki eki koshixon, ja jakonma jawékibo janharesai, jabora ja rabeti mawáti masá tenetiain katima iki.
Pérgamo jemamea joi akaiboki kirika bomaa
12 Ja Pérgamo jemamea joi akaibo jato ikinti en imaa joniki, nato kirika neskáakin wishaxon bomawe: ‘Jawen espada okenbekonbi kikin kenshoyatonra mato yoiai:
13 Enra onanke, ja *Satanás yakatainkoribi mato jakanabo. Jaskara ixonbira maton ea ikonhakin jeneyamai, itan jaweatibira non ikonhaa ikibo mato iamaa iki, ja ea jan akonkin onanna Antipas, ja Satanás jain iká jemanxon retekanainbi.
14 Ikaxbi jaweti jawékira jake ja nokon keenma: Ja matoiba ikábo, ja Balaamman esekan yoiai keskatibo ikaibi maton oinresai iketian. Janra anike ja Balac esekin, ja ikonma diosbo menikana nami pimaxon, itan wetsabo betanbires yorantibo amaxon, *israelitabo ochamanon ixon.
15 Jainxonribi akai maton, ja *Nicolaitabaon onanmaa jakonma esekan yoiai keskati ikaibo maton jato jaweayamakin.
16 Jaskara iken, ¡Moa akonkin ocha akin jenekanwe! Mato jaskáyamaitianra basima ea matoiba kati iki; ja nokon kexakameax pikotai espadanin jato betan reteanani.
17 ¡Ja ninkataibaon ninkakanwe, ja Diossen Shinanman joi akaibo yoiai! Jaweratobaonki atikoma jawékibo janharesai, jabora maná jeneya joné pan en jato pimati iki, itan westíora joxo makanshoko bená jane wisháya en jato meniti iki. Jara tsonbi onanyamake, ja makan biaitoninresa onanke’.
Tiatira Jemamea joi akaiboki kirika bomaa
18 Tiatira jemankonia ja joi akaibo jato ikinti en imaa joniki, nato kirika neskáakin wishaxon bomawe: ‘Ja Diossen Bake, chii tiri keská beroya, itan *bronce penéakana keská taeyatonra mato neskáakin yoiai:
19 Enra maton iká jawékibo onanke: Matonra jato noike, itan matora eki koshiabo iki, matonribira jato akinnai, itan maton ea jeneyamai. Jainxonribi en onanke, ja reken ikátiai bebon jakonbires rama mato iitai.
20 Ikaxbi westíora jawékira nokon keenma iki: Ja Jezabel janeya ainbaon jakonma jawéki akainbi maton jaweayamaitian. Jara ikai janbixbi *profeta ainbaon shinanmeeti. Ikaxbira paranhanan, nokon tee akaibo jawen esé onanmakin akai jato neskáakin, ja wetsabo betanbires yoranti, itan ja ikonma diosbo, yoina retexonkana nami pitiboribira ochama iki akinbo.
21 Ja ainbo jaskatibo jakenbira en nete nenkeaxonboreske, jawen ochabo akonkin jenetaanan abanon Dios ikonhakin ixon. Ikaxbira ja ainbo wetsabo betanbires yorantibo akí jenekashamai.
22 Jaskara kopíra, ja ainbo rama masá tenemakin en chexakaamai, jatian ja wanoya ixonbi jabé yoranti akaibora, akonbireskin en masá tenemati iki. Ja ainbonin jato onanmaa keskati ikí jenéyamakanaitian.
23 Jatian ja ainbaon bakebora en jato mawámati iki. En jato jaskáaketianra, jatíbi nokon joi akaibaon onankanti iki, jonibaon shinan reboyabi jaton jointibo en onanna. Jainxonra ja maton akábo kopí westíorabo mato en castigannoxiki.
24 Jatian rama ja jatíribi mato Tiatiranko ikanabo ixonbi, ja esé chibanyamaibo, itan ja *Satanássen joné jawéki akin akanaibo onanyamaabora en mato yoiai; wetsa eséra, maton senenhanon ixon en mato yoiamai.
25 Ikaxbi ja maton ikonha jawékibo jeneyamakanwe, jakiribi ea joái kaman.
26 Jaweratobaonki atikoma jawékibo jatonharesai, itan en yoiai keská akin jeneyamai, jabora jatíbiainoa jonibo ikinti koshi en imati iki.
27 Ja nokon Papan jawen koshi ea menia keskáribiakin. Yami bastónyaxonra jan jato ikinti iki, jainxonra ja mapó kenti beshéai keskáakin jato ati iki.
28 Jainxonra ja nete wishtinribi en mato meniti iki.
29 ¡Ninkataibaon ninkákanwe, ja Diossen Shinanman jawen joi akaibo yoiai!’ akin aká iki.