21
Saga Kar'ndahan pamah'nda ma saga Panubu' Benjamin
1 Mahē' ma Mispa ya saga kal'llahan bangsa Isra'il bay anapa anganjanji', “Halam aniya' ma sigām amah'lla'an anak sigām ni panubu' Benjamin.”
2 Puwas he' pehē' sigām ni Betel ati mahē' sigām aningkō' parahing anangis ni Tuhan sampay ni kasangoman.
3 Ya pangandahing sigām, “O Tuhan, ya Tuhan bangsa Isra'il, angay itu pat'kka ni bangsa kami? Ma buwattina'an, angay gi' subay aniya' dakayu' panubu' amutawan min bangsa Isra'il?”
4 Pagk'llat llaw in saga a'a inān angahinang pagtutukbalan ati maina'an pinat'nna' ya saga pagkulban maka huhulmatan pagdakayu' sigām.
5 Manjari in saga bangsa Isra'il magtilaw-tilawan di-sigām, “Sai ma saga bangsa Isra'il ya halam bay palamud ma pagdakayu'tam paharap ni Tuhan?” Sabab bay to'ongan kapagjanji'an e' sigām mahē' ma Mispa ma matahan Tuhan sasuku ya halam bay palamud ma pagdakayu' sigām subay to'ongan pinapatay.
6 Sakali magkarukka'an to'ongan in bangsa Isra'il ma pasal panubu' Benjamin ya pagkahi sigām. Ati yuk sigām, “Ma buwattina'an, dakayu' panubu' abutas min bangsa Isra'il.
7 Buwattingga kapah'nda'antam ya sasuku bay takapin panubu' Benjamin, sabab bay na to'ongan kitam makapagjanji' ni Tuhan mbal pamah'ndatam ni sigām ya saga ka'anakantam d'nda?”
8 Puwas he' magtilaw-tilawan di-sigām, “Sai min saga panubu' bangsa Isra'il ya halam bay makalamud ma pagdakayu'tam ni Tuhan ma Mispa?” Sakali tata'u e' sigām halam aniya' minsan dakayu' min panubu' Jabes-Giliyad bay pehē' ni pustu palamud ma pagdakayu' sigām.
9 Sabab ma waktu sigām magitung saga a'a, tata'u e' sigām halam aniya' maina'an minsan dangan min panubu' Jabes-Giliyad.
10 Angkan ya tumpukan sigām inān bay amapehē' sangpū' karuwa ngibu kal'llahan aesog magbono' ya bay tasoho' pehē' ni Jabes-Giliyad amapatay saga a'a pat'nna' mahē' beya' na saga kar'ndahan maka saga kaonde'-onde'an.
11 Yuk sigām, “Buwattitu ya hinangunbi. Papatayunbi saga a'a l'lla-d'nda liyu sadja min saga budjang.”
12 Puwas he' makapiha sigām mahē' mpat hatus kabudjangan ya halam lagi' bay makapagdakayu' maka l'lla, ati binowa itu e' sigām ni pustu ma Silo ya ma Kana'an.
13 Manjari ya saga tumpukan bangsa Isra'il bay amabeya' lapal pagsulutan ni panubu' Benjamin ma batu Rimun.
14 Angkan ma waktu he' magpole'an na pabalik ya saga panubu' Benjamin ati bay sigām binuwanan kabudjangan panubu' Jabes-Giliyad ya bay tabowa e' bangsa Isra'il. Saguwā' kulang gi' itu ma sigām.
15 Magkarukka'an to'ongan ya saga bangsa Isra'il ma pasal panubu' Benjamin ma sabab min kahandak Tuhan angkan halam na magdakayu' ya saga panubu' bangsa Isra'il.
16 Ati yuk saga pagmatto'ahan ma tumpukan, “Ma pasal magpatayan na ya saga kar'ndahan panubu' Benjamin, buwattingga kapamah'ndatam saga kal'llahan panubu' Benjamin ya bay takapin?”
17 Maka yuk sigām lagi', “Ya saga bay takapin allum inān subay taga-kapatut bo' mbal alungay panubu' sigām min bangsa Isra'il.
18 Mbal manjari tapamah'ndatam ni sigām saga ka'anakantam sabab kitam bangsa Isra'il bay to'ongan makajanji', ‘Minulka'an sai-sai amah'lla'an anak sigām ni panubu' Benjamin.’ ”
19 Saguwā' tapikil e' sigām, “Sōng na tahun haylaya paglami-lami ni Tuhan ma Silo ya tampal ni diyata'an Betel min deyo'an Lebona maka tampal ni sobangan labayan min Betel tudju ni Sekem.”
20 Angkan pinandu'an e' sigām ya saga panubu' Benjamin, “Pehē' kam patapuk ni pagtanoman anggul,
21 ati jagahinbi bang palabay na ya saga kar'ndahan Silo supaya palamud amayla, saggawunbi na min pagtanoman anggul ati dangan maka dangan min ka'am angā' na kam min sigām hinangbi h'nda ati bowahunbi na ni lahatbi panubu' Benjamin.
22 Bang magpuhun ni kami saga ka'mma'an sigām atawa saga danakan sigām l'lla, ah'lling kami ni sigām, ‘Angampun pa'in kam. Pasagarinbi na sigām sabab kulang saga kar'ndahan bay ta'ā'tam ma waktu bay pagbono'. A'awam kam sabab halam bay pamah'ndabi ma sigām ya saga ka'anakanbi d'nda.’ ”
23 Angkan buwattē' ya bay nihinang e' panubu' Benjamin. Ma sabu magpamayla ya saga kar'ndahan inān, dangan-parangan l'lla anaggaw dakayu' d'nda bo' binowa amole' ningā' h'nda e' sigā. Ati pabalik na sigā ni tana' sigām bo' binangun pabalik ya saga da'ira sigām ati mahē' na pat'nna'.
24 Sakali ala'an na minnē' ya saga bangsa Isra'il bo' amole' na pabalik ni saga panubu' maka kakampungan sigām pakaniya-kaniya paglahat sigām.
25 Ma waktu he', halam gi' bay aniya' magsultan ma Isra'il. Dangan-parangan ma sigām makahinang ma ai kabaya'an sigām.