5
Kalangan si Debora
1 Ma llaw ina'an du, magkalang si Debora maka si Barak ya anak si Abinowam. Yuk pagkalang sigā:
2 “Pudji ni si Yawe!
Saga a'a bangsahan angatas na magmunda' ma pagkahi sigām bangsa Isra'il,
lilla' isāb saga a'a anukbalan baran sigām.
3 Pakale kam, saga sultan! Pakale kam saga a'a bangsahan.
Angalang aku ni si Yawe, angalang aku.
Anukbal aku kalangan pamudji si Yawe ya pagtuhanan bangsa Isra'il.
4 O Yawe, pagla'annu pa'in min lahat Se'er,
paglanjalnu min lahat Edom,
ajogjog dunya, alandos makalandu' ulan,
patumbuk ulan min kagabunan.
5 Ajogjog saga kabūran ma kapi'itu si Yawe,
ya Tuhan tag-suku'an būd Turusina.
Aho', ajogjog ma baihu'an si Yawe, ya pagtuhanan bangsa Isra'il.
6 Ma waktu kapaghukum si Samgar anak si Anat,
maka ma waktu si Ja'el,
halam aniya' bay makalabay min lān aheya.
Sasuku magtulakan subay palabay min saga lān kabiklu'-biklu'an.
7 Akulang du bay makapaglahat ma kahuma-huma'an tana' Isra'il,
sat'ggol halam bay patuwa' si Debora,
ya kinilā pagina'an bangsa Isra'il.
8 Ma waktu kapapinda bangsa Isra'il ni saga tuhan-tuhan saddī,
waktu isāb kat'kka bono' ma pagsōran da'ira,
halam aniya' tampan atawa budjak
ma saga l'lla bangsa Isra'il mpat ngibu hekana.
9 Akōg pangatayanku ma saga a'a Isra'il bangsahan,
maka ma saga a'a ya magmalilla' palamud ma pagbono'.
Pudji ni si Yawe!
10 Pakale kam, sasuku kam pakura' ma kura' pote',
ya aningkō' ma lampik pakol alingkat,
beya' isāb ka'am magbabaklay ma lān,
kalehunbi
11 lapal saga magkakalang
ya patimuk ma atag kak'ppongan.
Niusul e' sigām pasal kahinangan PANGHŪꞋ-Yawe, kahinangan a'adil lullun,
niusul kahinangan saga a'a Isra'il ya aesog amono'.
Maglūran na saga ummat PANGHŪꞋ
pehē' ni tongod lawang ya pagsōran da'ira.
12 ‘O Debora, pakosog ka bo' pakosog!
Pakosog ka magkalang!
O Barak, pakuyas ka!
O Barak, ka'a anak si Abinowam,
saggawun saga a'a bay anaggaw ka'a.’
13 Sasuku takapin allum ma bangsa Isra'il
bay patipun ni saga pagnakura'an sigām.
Bay patimuk ma aku saga ummat si Yawe,
beya' isāb saga a'a ya aesog amono'.
14 Aniya' sigām kasehe'an bay min lahat Epra'im,
ya bay paglahatan bangsa Amalek ma waktu tagna'.
Ina'an isāb saga panubu' si Benjamin
bay palamud ma saga a'a ya anehe'an ka'a.
Aniya' saga kapitan palūd pina'an bay min Makir.
Aniya' isāb saga a'a Sibulun amowa tungkud kapitan.
15 Saga a'a bangsahan min bangsa Issakar bay parongan ma si Debora.
Aho', ina'an saga panubu' si Issakar parongan ma si Barak,
magdaganan maka iya ni kapantayan.
Saguwā' magduwa-ruwa pikilan bangsa Rubin,
mbal agon makapagdakayu' gara'.
16 Ka'am bangsa Rubin, angay kam bay pat'ddas ma koralanbi,
anaenghog tiyup-tiyup ya pangalingan a'a ma bili-bili sigām?
B'nnal, aheya pagduwa-ruwabi ameya' maka mbal.
17 Saga a'a Giliyad bay magpa'bba ma dambila' sapa' Jordan,
maka bangsa Dān bay angagad sadja ma saga kumpit.
Bangsa Aser isāb bay pat'ddas ma bihing tahik,
halam sigām bay magla'anan min deyom kalo'okan.
18 Malaingkan in bangsa Sibulun bay anawakkalan kallum sigām ni pagbono'an,
damikiyanna isab bangsa Naptali ma kabūd-būran.
19 Sakali magt'kkahan saga sultan bangsa Kana'an.
Pakuyas sigām magbono', apaslod pagdugpak sigām
ma kuta' Ta'anak ya ma bihing bohe' Megiddo,
saguwā' halam aniya' pangalta' bay talangpas sigām.
20 Palamud isāb saga bitu'un amono' ma si Sesera.
Anabang saga mamahi sabu pa'in maguntasan min sobangan ni s'ddopan.
21 Talaran si Sesera maka saga tendogna e' s'llog,
talaran sigām e' sapa' Kisun, ya sapa' bay awal gi'.
Ah'llingan aku di-ku. Paesog ka, yukku, palanjal ka.
22 Jari takale to'ongan tagandak saga kura' si Sesera.
Ina'an saga kura'na aesog magdaganan na pa'in, magdaganan.
23 ‘Sapdahin saga a'a ma kauman Meros,’ yuk mala'ikat si Yawe.
‘Sapdahin sigām to'ongan,
sabab halam sigām bay palamud anganggapi' ma si Yawe,
halam sigām bay pagapi' ma iya angatu ma saga a'a ga'osan.’
24 Bang pa'in binarakatan si Ja'el, h'nda si Heber bangsa Kēn.
Bang pa'in iya binarakatan labi min kamemon kar'ndahan
ya pat'nna' ma luma' tolda.
25 Angamu' pa'in bohe' si Sesera, gatas ya pamuwan e' si Ja'el,
gatas pinapīt ni'isi ma pinggan,
pinggan tōp pagi'inuman a'a bangsahan.
26 Pagubus, pina'abut tanganna dambila' ni tuku tolda,
tanganna kowan ya pang'ntanna tukul.
Jari binono' e'na si Sesera, ap'ssa' kōkna,
nirugsu' iya ma kīd tuktukna bo' alopot kōkna.
27 Ati palukbu' iya ma dahūan tape' si Ja'el.
Pahantal iya maina'an,
jari maina'an kamatayanna.
28 Ina'an ina' si Sesera patīk min tandawan,
ina'an iya ma bilikna maglemong na pa'in.
Magtilaw-tilawan di-na, ‘Ai bahā' makat'ggolan kalesana?
Angay halam gi' takaleku tagandak saga kura'na?’
29 Manjari sinambungan iya e' dakayu' tendogna
ya aladju pikilanna min kaheka'an d'nda.
30 Ya du isāb ina' si Sesera ah'llingan di-na, yukna,
‘Tantu sigām t'ggolan magbahagi'an pangalta' ya talangpas sigām,
dakayu' atawa duwangan d'nda ma dakayu' l'lla,
saga s'mmek ahalga' pamahampit si Sesera,
saga s'mmek buldahan, s'mmek alutu' durukanna,
pamasalay ma k'llongku.
Tantu aheka tataban e' sigām.’
31 Ya PANGHŪꞋ, bang pa'in alaglag kamemon palbantahannu!
Malaingkan sasuku alasahan ka'a,
bang pa'in sigām asahaya sapantun mata llaw bang pasinag to'ongan.”
Sakali aniya' kasannangan ma paglahat inān ma deyom mpatpū' tahun.