5
Butoolenkee Kayi Ku Ofũ Onu Loo.
1 Otii lele niefũ eenu alɛ Yesu ninle Kristo wɔ di Yaa lɛpɛ ni ɔfɔɔ, Yaa obi ale. Otii lele kafɔɔ nimbɔmbɔ ote, mbɔmbɔ obi nɔɔ kafɔɔ.
2 Nse mumbɔmbɔ Yaa buoole nwɔ afiofa kafɔɔ yi, nni mun-yɔ muntofo bulɛ mumbɔmbɔ Yaa babi nɛ.
3 Diekye nse buole Yaa afiofa nwu nkpo yi, ni diotuo alɛ mumbɔmbɔ nwɔ. Afiofa nɔɔ nwu nkpo ole kafɔɔ nnaa osie.
4 Diekye otii lele ninle Yaa obi ntoolenkee kayi ka mmle. Lɛsaa le buɔyɔ buolenkee ni kayi ka mmle ninle ofũ onu loo.
5 Owe nimafuo kayi ka mmle olenkee? Otii wɔ lete nimafuo ni ninle nwɔ niefũ eenu alɛ Yesu ninle ni Yaa Obi nwu nɛ.
Asaa Atiɛ Ya Nin-yɛ Ni Yesu Kristo Suoto Ɔlaa Kamaa.
6 Yesu Kristo ninle otii wɔ niawa ni ku Yaa ntu okpeesa ku kukpi nɔɔ ntɔ. Atawa ku Yaa ntu okpeesa lete, kafɔɔ aawa ku ntu ku ntɔ nwu kamɛ. Yaa Ninwuna nwu nimu kafɔɔ n-yɛ ɔlaa nwu kamaa alɛ kute nkpo. Diekye Ninwuna nwu ninle nwaako ɔlaa nwu.
7 Asaa atiɛ ya nin-yɛ ni ɔlaa nwu kamaa ninle
8 Ninwuna nwu ku ntu nwu ku ntɔ nwu. Asaa atiɛ ya mmle amuu kafɔɔ ɔlaa onwii kamaa bayɛ.
9 Buofũ otii kamaa ɔlaa oyila buonu, kafɔɔ nse Yaa n-yɛ ɔlaa kamaa yi, nnwu, kuɔtaka katoo kulenke. Diekye nnwɔɔ nin-yɛ Obi nɔɔ kamaa nɛ.
10 Nkpo oso otii wɔ niefũ Yaa Obi nwu nkpo eenu ni n-yɛ ɔlaa wɔ mmle kamaa di otu nɔɔ kamɛ. Kafɔɔ otii wɔ ninanfũ Yaa anu nii, ntɔɔbla nwɔ laatɛ ku fununtɛ, diekye aafũ Yaa ɔlaa wɔ eebuɛ ni di Obi nɔɔ suoto anu.
11 Ɔlaa nwu nkpo kamaa oyila ninle alɛ Yaa lɛyɔ nkpa be ninnaa ni kaloo ɛɛta wo, nkpa nwu nkpo ɛɛta wo ni nsi di Obi nɔɔ kamɛ.
12 Otii wɔ niefũ ni Yaa Obi nwu nkpo yi, akpe nkpa be mmle. Otii wɔ kafɔɔ ninafũ ni Obi nwu nkpo yi, anaa nkpa be mmle nwu nkpo.
Bikpe Nkpa Be Ninnaa Ni Kaloo.
13 Kɔkpana kukũ ko mmle nkyesee aye ba niefũ Yaa Obi nwu nkpo bienu nii, nlɛ bitofo bilɛ bikpe nkpa be ninnaa ni kaloo.
14 Bukpe osuku onyu di Yaa anu, diekye buofũ buonu bulɛ nse buɔkaalɛ nwɔ lɛsaa di dibiesaa nɔɔ kanya, annu wo.
15 Nse buye bulɛ Yaa nkyɔɔ wo atoko nse buɔpɛ ɔlaa buɔtɔɔ, ni buye kafɔɔ bulɛ lɛsaa lele buɔkaalɛ nwɔ, anta wo.
16 Nse otii owo lɛnya owo nɔɔ kɔbla okpile wɔ ninamakpaa nwɔ kusifiko ni kukpi kamɛ yi, ni aapɛ ɔlaa ata Yaa diisi nɔɔ, Yaa kamatɔɔ nkpa. Nle mmle yi, batii ba nikɔbla ni sikpile se ninamakpaa ma sisifiko ni kukpi kamɛ nlaka. Kafɔɔ okpile owo nkpe nwu yi, kunkpaa otii kunsifiko kukpi kamɛ, diele nwu suoto nlaka nlɛ biapɛ ɔlaa minta Yaa.
17 Ɔsaabla lele ninante tinini yi, okpile kule. Kafɔɔ sikpile sewo nkpe sinankpaa otii siasifiko ni kukpi kamɛ.
18 Buye bulɛ otii lele ninle ni Yaa obi ninkple aasiɛ aatɔɔbla sikpile. Diekye Yaa Obi nwu nkpo nnyu nwɔ disi alɛ Kpiletɛ nwu nkpo ninfuo nwɔ amumu kuanwii ɔbla.
19 Buye bulɛ Yaa babi bulɛ, kuntɛ kayi ka mmle nwu nkpo kamuu nsi di Kpiletɛ nwu nkpo lɛkpaa kalɔ.
20 Buye bulɛ Yaa Obi nwu nkpo ntɔɔwa ɛɛbata wo lɛsɔnu, alɛ buafuo nwaako Yaa nwu nkpo otofo. Nkpa loo nfɛ nsi di nwaakotɛ Yaa nwu kamɛ di Obi nɔɔ Yesu Kristo kamɛ. Nwaako kafɔɔ nnwɔɔ ninle nwaakotɛ Yaa nwu ku nkpa be ninnaa ni kaloo.
21 Nkpo oso, babi nii, biblasa suoto di afiɔ ɔtɔ kamɛ.