16
Owane Sitewi ma'e ma'aru auwei ne totesiya.
1 Sosu a'i pe ane fene ma'e peri tere'e au te'e areiyesiya. Fene ma'aru tamo ani ta'uweyewe, Owane Sitewi lo lu feni omo Jerusalem sahe, ma'aru ariye a'i ape, ausawiyei. Tu ane lu taune omo werese Galesia sahe apou ei toweriye. Serai lowe ma'aru tamo Owane Sitewi lo lu feni omo Jerusalem ma'e ausawi. Ane fene ma'e aiwawe a'i ei toweriyei. [Ro 15:25-26; 1 Ko 8:1-9]
2 Owane Sitewi lai fene ma'e ma'aru tamo auwei su, fene nowe Nowe amou werese se ma'aru tewi a'i fene ani ta'uwe fute. Serai ane fene ma'e aiyeyei su, fene ma'aru erasi a'i fu tepa'asiyei. Serai ane fene ma'e aiyeyei su, ane ma'aru fene lo ei anirowata.
3 Sosu ane fene ma'e heneraiyei su, fene lu tamo ei ariariyere. Ane one towe tamo lowe mase le se ausawiyei. Sosu ane lu ape mo omo Jerusalem ma'e ma'aru werese fene lo mase eimawesawiyei. Sosu lu ape mo lu taune werese ma'aru, ariye a'i ape, fara'u nonetiyei.
4 Ane lu ape mo aiwawe a'i iyei awere? Piyete awere? Ane so'oru ta'ama. Owane Sitewi lo marepi piye te'esiya awere? Ane Owane Sitewi lo marepi umasiyei.
Pol piye marepi totesiya awere?
5 Ane omo pani Masedonia iyei ne totesiya. Ane omo pani Masedonia ma'e sewiye tepa'asiyei su, ane fene ma'e heneraiyei. [Ap 19:21]
6 Ane omo Korin ma'e heneraiyei su, ane nowe tamo fene mase iroteyei. Yame ta'i yame hesi ane fene mase iroteyei. Ane so'oru ta'ama. Ane nowe naretei a'i fene mase iroteyei awere? Ane so'oru ta'ama. Ane omo tere'e ma'e iyei ne toteyei su, fene ane pati henetire. [Ro 15:24]
7 Ane nowe oso a'i fene mase iroteyei ne totesiya ta'ama. Ahowa, ane nowe pite a'i fene mase ironamiteyei ne totesiya. Ane Meni Owane Pefine a'i nomo lo lo marepi umasiyei.
8-9 Ahowa, pereye nowe eite se ane omo Efesus sato irosiya. Lu taune tomu ne'ese Jisas lo peri wanu anireme. Sosu Juda ta'uwe hereiyei iyape Pasova, i tepa'asiyei su, ane lowe arunatirowawe, fene ma'e heneraiyei. Omo Efesus sahe lu tomu ne'ese Owane Sitewi lo peri einamisiya. Serai ane Owane Sitewi lo lu feni werese tote tawesiyei lowe lo au kairefiyeyei. [Ap 19:8-10; 2 Ko 2:12]
10 Sosu a'i pe meni ta iyape Timoti fene ma'e iyei su, fene le au noweinoweite. Le Owane Sitewi lo wiyawi aninamisiya. Ane wiyawi aiwawe a'i ta'anesiya. Serai fene marepi fetane a'i le ma'e aute. Serai le atoweiyerowata. [1 Ko 4:17]
11 Meni Timoti fene ma'e iroteyei su, fene apou owe ape totere, “Meni ape yo'orei meni. Marepi lo luwaru a'i ne. Nomo peri lo wanuwei ta'ama.” Ahowa, fene werese luwaru a'i le ne owe ape totete. Le omo tere'e ma'e iyei ne toteyei su, fene le pati hene arosawire. Fene marepi fetane a'i le ma'e aute. Serai le ane ma'e si tame aiyeyei. Ane le lu tamo aiwawe a'i Owane Sitewi lo peri umasisiya ape, ninawesiya. [1 Ti 4:12]
12 Sosu ane Apolos ne, kaiyemo nomo lo, fene ma'e au te'esiya. Ane le ma'e kairefi a'i se au te'eye, “Ne omo Korin ma'e sewiyeyei ne ire.” Ahowa, marepi lo se apou a'i toteye, “Ahowa, pereye nowe eite se ane lowe ma'e sewiyeyei ne irowata. Sosu nowe mo'o su marepi ano ta'uwe tepa'asiyei su, ane lowe ma'e sewiyeyei ne iyei.” [1 Ko 3:6]
Pol peri ye'ewi lo lowe ma'e au te'eteye.
13 Mi mi werese fene yo seni luwaru werese a'i ape ne tei kairefiye noweinoweite. Tote tawesiyei fene lo kairefi a'i tei ironamite. Lu tamo fene ma'e au luwaruweyei su, fene owe ape atoweiyere. Lowe fene ma'e au luwaruweyei ne toteyei su, fene kairefi a'i tei irote.
14 Fene Owane Sitewi lo wiyawi ta'aneyei su, fene lu taune werese marepi erasi a'i tote wawesiyenamite. Sosu lowe ma'e au pati anite.
15 Sosu kaiyemo mo, ane fene ma'e au te'esiya, Peri ano wanure. Fene Stefanas lo peri wanure. Ane omo pani Akaia sahe Owane Sitewi lo peri au te'eye su, le tani lo nohuweripi awaripi aiwawe a'i, lowe tutawe Owane Sitewi lo peri wanu umasinamiye. Pereye nowe eite se, lowe Owane Sitewi lo peri lu taune Jisas lo peri wanu umasinamisiya ape, lowe ma'e tote tawesiyei lowe lo au kairefiyeye. [1 Ko 1:16]
16 Meni ape Owane Sitewi lo peri au te'e areiyeyei su, fene peri lo wanu umasinamite. Serai fene meni ape unahi onure. Sosu aiwawe a'i lu tamo, Owane Sitewi lo wiyawi ta'anesiya ape, meni ape wou a'i fene peri lowe lo wanu umasinamite.
17 Ane fene siye ta'ame su, marepi ano orese a'i ne. Sosu fene lu hesi heta ane ma'e eimawesai. Lu ape mo Stefanas, Fortunatus, Akaikus, lowe ane henerai su, ane marepi wisere erasi a'i toteye. Lowe yaru fene lo aniye. Serai lowe marepi ano au kairefiyeye.
18 Lowe ane ma'e fai su, lowe peri heneruwe wisere a'i fene ne ane ma'e au te'esai. Lowe marepi wisere a'i ane ma'e auwe. Sosu fene peri ano wanuwei su, marepi fene lo aiwawe a'i au te'e wisereyeyei. Serai fene lu ape mo ne au te'e wisereyere.
Pol lowe ma'e au te'e wisereyesawi.
19 Lu taune werese Owane Sitewi lo peri wanu umasinamisiya ape, omo pani Esia sahe lowe fene werese ma'e au te'e wisereyesawi. Nohuweripi Akwila, tani lo Prisila, lowesi fene ma'e erasi a'i au te'e wisereyesawi. Lu taune werese lowesi lo wesi sahe, Owane Sitewi ma'e au te'e wisereyeyei ne ta'uwerai ape, lowe fene ma'e au te'e wisereyesawi. Lu taune werese ape mo Owane Sitewi lo peri wanu umasinamisiya. [Ap 18:2,18,26]
20 Lu taune werese Owane Sitewi lo peri wanu tote tawesi umasinamisiya ape, lowe fene ma'e au te'e wisereyesawi. Fene Krais lo lu feni ta'i ta'i a'i tiyati eritere! Sosu eire, “Owane Sitewi lai fene ma'e au wisereyeyei.”
21 Ane Pol fene ma'e eriteyei ano lese ausawiyei. Ane Pol ereti topo ano se eriteyei ano fene ma'e lese ausawiyei.
22 Lu tamo Meni Owane Jisas Krais ne marepi erasi a'i tote wawesiye ta'ame su, Owane Sitewi lai lowe ma'e fofowei erasi a'i au irowei. Sosu Owane Sitewi lowe yehe omo ma'e ani fu arosawirowa. Serai ane apou totesiya, Meni Owane Jisas Krais witane a'i si tame itorairowa. [Ga 1:8-9]
23 Sosu Owane Jisas Krais lo ferafereiyei fene ma'e ironamiteyei.
24 Ane fene werese ma'e marepi erasi a'i Jisas lo iyape se tote wawesiyenamisiya. Wiyeme a'i tene! One towe ano tepa'asiye.