2
Owane Sitewi lai Krais lo hepene norohu a'i nomo ma'e aurowa.
1 Tu fene yo seni luwaru a'i Owane Sitewi ma'e ironamiteye. Aiwawe a'i yo seni luwaru werese, fene Owane Sitewi ma'e iroteye ape, serai marepi hepene fene lo temeniyeteye.
2 Ei, tu naifa fene awei lo yo seni umasinamiteye. Fene sepei luwaru a'i tutawe iyape Satan umasinamiteye. Sepei luwaru Satan lai lu taune, Owane Sitewi lo peri arisisiya ape, papu ironamisiya. [Kl 3:7; Ta 3:3]
3 Tu naifa nomo werese marepi arisiyei lowe lo apou ape tote umasiteye. Nomo marepi luwaru a'i nomo lo nine'iyei ne umasinamiteye. Marepi luwaru a'i towafi nomo lo umasiye su, sosu aiwawe a'i tahe pa'are nomo lo yo seni toteye su, nomo yo seni luwaru a'i apou ape umasiteye. Nomo yo seni luwaru a'i apou ape umasiteye su, Owane Sitewi lai nomo ne ai marepi totenamiteye. Nomo lu taune tere'e werese Owane Sitewi lo peri arisiteye ape aiwawe a'i ne! [Kl 3:6]
4 Ahowa, Owane Sitewi lo ferafereiyei wisere erasi a'i tene. Le nomo werese ne marepi erasi a'i tote wawesiyenamisiya.
5 Nomo yo seni luwaru a'i Owane Sitewi ma'e iroteye su, marepi hepene nomo lo temeniyeye. Ahowa, nomo Krais ne tote tawesi umasiteye su, Owane Sitewi lai marepi hepene he'i a'i nomo ma'e auwe. Owane Sitewi fene ma'e ferafereiyei lo au atuatuwe su, fene marepi hepene temeniyeteye ape, awera'iyenatiyewe, sosu le fene ma'e marepi hepene he'i a'i aunamiye. [Kl 1:21; 2:13; Ro 6:13]
6 Owane Sitewi lai Krais si tame au ani ta'ane norohuwe sineye su, le nomo aiwawe si tame au ani ta'ane norohuwe sineyewe, marepi hepene he'i a'i nomo ma'e auwe. Nomo Krais Jisas papu ironamisiya ape, le nomo yaru Krais mase omo hire ma'e au fu onuwe. [Kl 2:12]
7 Serene mi mi pasi pasi weriyei Owane Sitewi lo ferafereiyei lo erasi pefine wisere a'i au atuatunamitorowa. Le nomo ma'e marepi wisere a'i lo au atuaturowawe, ferafereiyei lo atuatu fiyari areiyenamirowa.
8 Fene Krais Jisas ne tote tawesi umasisiya su, Owane Sitewi lai fene ma'e ferafereiyei lo ape au atuatuwe. Sosu fene marepi hepene temeniyeteye ape awera'iyenatiyewe, le nomo ma'e marepi hepene he'i a'i aunamiye. Fene marepi hepene he'i aniyei ne ta'anerowata. Ahowa, fene Krais Jisas ne tote tawesi umasisiya su, Owane Sitewi lai fene ma'e neri a'i auwe.
9-10 Owane Sitewi lai nomo werese au ta'aneye. Nomo Krais Jisas ne tote tawesi umasiyei su, Owane Sitewi lai nomo lu taune he'i a'i au ironamiteye. Serai nomo yo seni wisere aseyaro a'i fa ironamite. Tu naifa le yo seni wisere aseyaro a'i ape mo nomo irorowa ape, le marepi lo se ariariyeyei ne toteye. Nomo ne marepi lo se le apou toteye. Nomo mi mi werese yo seni wisere a'i ape mo fa ironamite. Fene peri ta apou te'erowata. “Ane yo seni aseyaro a'i ironamiteyei su, ane meni aseyaro a'i ne. Ane marepi hepene he'i a'i aniye.” Serai fene marepi kuseriyei owe ape totete. Serai fene iyape towafi fene lo owe ape ei ani arowete. Fene Krais Jisas ne tote tawesiyei su, Owane Sitewi lai marepi hepene he'i a'i fene ma'e neri a'i aurowa. [1 Ko 1:29-31; 2 Ti 1:9; Ta 2:14]
Krais sahe nomo werese ta'i a'i ne.
11 Serai etiri ape tote tawesire, mai fene lo auteiye su, fene lu tewi tere'e ma'e fai. Fene Juda lo lu tewi ta'ama. Lu Juda werese lowe mene'e se tahe lowe lo yaru tewi touwe. Serai lowe fene ma'e apou te'eye, “Fene lu tahe yaru tewi tou ta'ame su, fene Juda lo lu ta'ama. Serai fene Owane Sitewi lo lu tewi pefine a'i ta'ama.”
12 Tu naifa fene Krais eyeri ma'e iroteye. Pani Israel lai omo pani sitewi fene lo ta'ama. Owane Sitewi lai fene ma'e peri te'e naneiyei lo au te'e nanei ta'ame. Ahowa, le Juda lo lu tewi ma'e peri te'e naneiyei werese au te'e naneiteye. Tu naifa fene te'e naneiyei lo ninawe te ta'ame. Tu naifa fene hi awei sahe iroteye ape, fene Owane Sitewi pefine so'oru ta'ama. [Kl 1:21; Ro 9:4]
13 Ahowa, pereye nowe eite se fene Krais Jisas ne nate tawesisiya. Krais me tape'i sahe temeniyeye su, Owane Sitewi lai fene le ma'e atahe a'i henetai. [Kl 1:20]
14 Juda lo lu tewi, sosu lu tewi tere'e lowe ai marepi tote tiyatiteye. Krais a'i lai marepi fetaneyeyei nomo lo ne. Le Juda lo lu tewi, sosu lu tewi tere'e marepi ta'i a'i hene ta'uwe aniye. Fisahe ape peri anowe apou wou a'i, ai marepi totenamiteye. Serai fisahe ape lu tewi werese werese ponei sahe erauwiteye ape, le lai ani erau tapeti fiyarisawi. [1 Ko 12:13]
15 Juda lo yo peri sahe, Moses leseye ape, peri amou tomu ne'ese iroteye. Peri tere'e tomu ne'ese, lu werese fa wanu umasite. Ahowa, Krais yo peri werese ape iro po'utesawi. Krais lo marepi sitewi apou a'i ne. “Ane Juda lo lu tewi sosu lu tewi tere'e lowe lu tewi pefine ta'i he'i a'i hene ta'uwe anirowa.” Serai Krais lai lowe werese ma'e marepi fetane a'i aitairowa. [Kl 2:14]
16 Krais me tape'i sahe temeniyeye su, le lu tewi hesi lo ai marepi tote tiyatinamiteye ape, iro po'utenamiteye. Sosu mo'o le lu tewi hesi a'i ape lu tewi he'i pefine ta'i a'i iro henerai. Le lowesi Owane Sitewi ma'e si henetaiyei ne toteye. Serai le me tape'i sahe temeniyeye su, le lu tewi hesi werese Owane Sitewi ma'e si henetai. [Sek 9:10; Kl 1:20,22]
17 Serene le marepi fetaneyeyei lo peri fene ma'e Owane Sitewi eyeri ma'e iroteye ape, au te'e fiyari areiyeyei ne fai. Sosu aiwawe a'i le marepi fetaneyeyei lo peri Juda lo lu tewi ma'e, Owane Sitewi atahe a'i iroteye ape, au te'e fiyari areiyeyei ne fai. [Ais 57:19]
18 Serene nomo Krais ne tote tawesiyei su, nomo, lu tewi hesi a'i Owane Sitewi lo hepene ta'i se a'i fara'u Owane Sitewi Tai Pefine a'i ma'e aiyerowa.
19 Serai Owane Sitewi lo nihe se fene ipari lu omo eyeri ma'e fai ape ta'ame ne. Ahowa, fene lu tewi ta'i a'i, lu taune Krais ne tote tawesiteye ape, aiwawe a'i henerai. Fene Owane Sitewi lo lu tewi pefine a'i henerai. [Ef 3:6]
20 Fene Owane Sitewi lo wesi tewi a'i wou henerai. Owane Sitewi lo wesi ape sahe Krais Jisas lai me tou sitewi a'i ne. Sosu lu tamo tu Krais lo peri au te'eteye ape, sosu lu feni pefine a'i lo lowe wesi ape lo me tou tere'e tere'e henerai. [1 Ko 3:11]
21 Serai nomo werese Owane Sitewi lo wesi ape tewi a'i tewi a'i henerai. Owane Sitewi lai nomo werese wesi lo sahe funati. Nomo werese Krais ne tote tawesi umasisiya ape, ta'uweraiyei su, nomo Owane pefine sahe wesi tutawe aseyaro wara'i a'i henerai tepa'asirowa. [1 Ko 3:16]
22 Sosu aiwawe a'i fene, Krais sahe irosiya ape, sosu Juda lo lu tewi Krais sahe irosiya ape, Owane Sitewi lai wesi pefine lo ta'uwe ta'anerowa. Serai le wesi pefine lo ape sahe Hepene Wara'i a'i lo se ironamitorowa. [1 Pi 2:5]