2 Jon
2 Jon Peri Tutawe
Jon peri ta apou te'e ta'ame. “Ane one towe eite leseye.” Meni ape apou leseye, “Meni ya'ariyei naihe one towe eite leseye.” Lu tomu ne'ese apou a'i totesiya. Jon lai one towe eite leseye. Le one towe eite menitani ta, sosu eimane lo ma'e au leseye. Lu tamo apou a'i totesiya. Le peri anowe se au te'eteye. Menitani ape ne apou a'i totesiya. Le lu taune Jisas ne tote umasiteye ape, au leseye. Peri lo apou te'eteye. Nomo lu taune tere'e tote wawesiye tiyatite. Lu ape mo peri wawero au te'e atuatuteye ape, nomo lowe ne weiyai.
1
Ane, Owane Sitewi lo lu feni lo meni owane, menitani ta, Owane Sitewi lai ariariyeye ape, eimane werese lo aiwawe ma'e one towe eite ausawiyei. Owane Sitewi lo peri pefine a'i se ane fene marepi erasi a'i tote wawesiyesiya. Sosu aiwawe lu taune, tamo Owane Sitewi lo peri pefine a'i tote umasisiya ape, lowe fene ma'e marepi erasi a'i tote wawesiyesiya. Owane Sitewi lo peri pefine a'i marepi hepene nomo lo papu ironamisiya su, sosu mi mi pasi pasi weriyei nomo papu ironamitorowa. Serai nomo fene ne marepi erasi a'i tote wawesiyesiya. Owane Sitewi lo ferafereiyei, sosu seremareyeyei, sosu Owane Sitewi lo marepi fetane a'i, etiri ape mo Owane Sitewi, Tai Pefine, ma'e fai. Sosu aiwawe Jisas Krais Tai Pefine lo meni eime ma'e fai. Owane Sitewi lo peri pefine a'i sosu tote wawesiyeyei nomo papu irosiya su, etiri hesi a'i ape nomo mase ironamitorowa.
Ane peri ta eimane no tamo ne wanuwe su, lowe Owane Sitewi lo peri pefine a'i umasiteye ape, ane marepi erasi nine'iteye. Apou wou a'i Owane Sitewi Tai Pefine a'i nomo ma'e te'eteye. [3 Jo 3] Sosu a'i pe einei ano, ane peri ta ne ma'e ei towerisiya. Peri ape ne ane ne ma'e peri he'i a'i ausawi ta'ame. Ahowa, Owane Sitewi lo peri ape tu naifa weriyei nomo ma'e wanu tote tawesiye. Peri ape apou a'i ne. Serai nomo lu taune werese Owane Sitewi lo peri umasiteye ape, marepi erasi a'i tote wawesiye tiyatinamite. [1 Jo 2:7] Wawesiyeyei lo sitewi ape apou a'i te'esiya, “Nomo werese Owane Sitewi lo peri wiyeme a'i wanu tote tawesi umasite.” Fene peri ape tu naifa weriyei wanu tote tawesiteye ape, fene mi mi pasi pasi marepi erasi a'i tote wawesiyenamite. Fene Owane Sitewi lo tote wawesiyeyei papu ironamirowa su, lu tamo fene arearerowata. Lu taune areareyei a'i tamo peri wawero au te'e fiyarisiya. Lowe peri wawero apou a'i te'esiya. “Tu naifa Jisas Krais tahe pa'are se itorai ta'ama.” Lowe omo werese ma'e peri wawero lowe lo ape au te'e fiyarititeye. Marepi apou ape lai sepei luwaru areareyei a'i ma'e fai. Le Krais ma'e airame ai atu tiyatinamisiya. [1 Jo 4:1-3] Weiyai! Fene peri wawero lowe lo ape wanu tote umasirowa su, wiyawi wisere a'i ape mo, fene ta'aneteye ape, tote i'ane arunatirowa. Ahowa, fene Owane Sitewi lo peri pefine tote tawesi umasiyei su, Owane Sitewi lai ferafereiyei erasi lo fene ma'e aurowa. Lu taune tamo Krais lo peri arunatirowawe, peri wawero he'i a'i ape umasirowa su, lowe Owane Sitewi mase irotorowata. Ahowa, lu taune tamo Krais lo peri wanu tote tawesi umasisiya su, lowe Tai Pefine a'i, sosu meni eime lo aiwawe ironamisiya. 10 Lu taune tamo fene ma'e heneraiyei su, sosu fene ma'e peri wawero Krais ne au te'e fiyariyei. Fene wesi fene lo owe ape ei hene wire. Sosu aiwawe fene lowe ma'e owe ape eritere. 11 Lu taune tamo meni areareyei a'i ma'e eriteyei su, lowe lai meni areareyei a'i lo yo seni luwaru a'i aiwawe irowei.
12 Ane etiri tomu ne'ese fene ma'e au te'esiya. Ahowa, ane one towe, sosu kere se leseyei wou ta'ama. Ahowa, ane fene ma'e sewiyeyei ne totesiya. Serai ane nihari fene lo ma'e au te'e tiyatiyei. Serai ane fene ma'e aiyeyei su, nomo werese marepi nine'i erasi a'i au teme'eriyerowa. 13 Sosu a'i pe einei ano, Owane Sitewi lai ariariyeye ape, einei lo eimane lai fene ma'e au te'e erite ausawiyei.