3
Jon lu taune ma'e au te'e fiyariteye.
(Matyu 3:1-12; Mak 1:2-8; Jon 1:19-28)
1 Awei meni Owane iyape Taiberias Sisar, Rom lo omo pani werese au noweinoweiteye. Le meni owane tutawe. Iyu menei ereti feni hesi lowe feni ta'i (15) i tepa'asiye su, awei lu owane tamo pani tewi a'i tewi a'i au noweinoweiteye. Meni owane Pontius Pailat, le omo pani Judia au noweinoweiteye. Meni owane Herot omo pani Galili au noweinoweiteye. Herot lo pa'ise Filip pani Ituria, omo pani Trakonitis aiwawe a'i, au noweinoweiteye. Meni owane Lisanias omo pani Abilene au noweinoweiteye.
2 Nowe ape se au heseyei lu owane hesi a'i iyape Anas, sosu Kaiafas, lowesi Owane Sitewi lo wesi tutawe au noweinoweiteye.
Sosu a'i pe Owane Sitewi lai meni Jon ma'e peri ta au te'eye. Jon Sekaraia lo meni eime pani ariye a'i saro howeiteye.
3 Le Owane Sitewi lo peri wanuwe su, le pani ariye a'i arunatiyewe, Sa'i Jordan tewiye feni ma'e fi. Le lu taune werese ma'e apou eiye, “Fene werese yo seni luwaru a'i fene lo me'iyeni ma'e atati arunatire. Owane Sitewi ma'e si tame atati awetotire. Fene Owane Sitewi ma'e si tame atati awetotiyei su, ane fene werese sa'i se au huwei. Owane Sitewi lai yo seni luwaru werese a'i fene lo au sasari pamoweyei.” [Ap 13:24]
4 Owane Sitewi lo peri au te'e siye meni ta iyape, Aisaia, le meni Jon ne apou leseye.
“Meni ta peri erasi pani ariye a'i sahe apou au uterowa. Apou au uterowa, ‘Fene werese Meni Owane Pefine lo yo mai aiyeyei ape au ariariye naneire. Yo mai lo au toso fareraiyere.
5 Nepesi werese awei horuse fu teme'eriyere. Omo werese horuse fiyarisawire. Omo werese yo mai lo, onu tawesisiya ape, horuse fiyarisawire. Yo mai, ape'i ape'iyei ape, fene fareraiyere. Yo tapiye a'i se, fene tapiye werese horuse sasarire. Serai yo mai ape lo potu wisere a'i heneraiyei.
6 Meni ape aiyerowa su, le lu taune werese, yo seni luwaru a'i iroteye ape, ete hene anirowa. Le yo seni luwaru werese a'i au sasari tepa'asirowa. Lu taune werese werese Owane Sitewi lo kairefiyeyei siyerowa.’ ” Ais 40:3-5
7 Serai meni Jon lu taune, le ma'e ani huwei ne fai ape, le lowe ma'e apou te'eye, “Fene haru aimesi lo yene, fene piyene fai awere? Eiwerai fene ma'e au te'eye, ‘Fene etiri luwaru a'i irowei su, Owane Sitewi lai etiri luwaru a'i itiya'u auwei. Serai fene ane ma'e sa'i ani huwei ne fai.’ [Mt 12:34; 23:33]
8 Serai fene ane ma'e sa'i ani huwei ne aiyeyei su, fene yo seni luwaru a'i werese fene lo arunatire. Marepi fene lo Owane Sitewi ma'e si tame atati awetore. Fene apou owe ape te'ere. ‘Meni Abraham ya'ariyei nomo lo ne. Nomo Owane Sitewi lo nihe se lu taune aseyaro a'i ne.’ Wawero tene! Ane fene ma'e au te'esiya. Owane Sitewi Pefine a'i, le a'i lai tapiye eite mo se Abraham lo eimane au ta'ane heneraiyei. [Jo 8:33,39]
9 Owane Sitewi lo peri ape apou wou a'i te'esiya, ‘Me ta me so wisere a'i ta'e ta'ame su, lu tamo lai me ape ourowawe, yehe ma'e fusawirowa.’ ” [Mt 7:19]
10 Lu taune werese peri lo wanuwe su, mi mi werese lowe le ma'e te'e toweriteye. “Nomo eiwerou irowei awere?”
11 Le lowe ma'e itiya'u eiye, “Meni ta ipari tahe hesi irosiya ape, le meni ariye a'i ape ma'e ipari tahe ta'i aure. Meni ta ene ayei tamo futeyei su, le meni, lau a'i irosiya ape, meni ape ma'e nonere.”
12 Nowe ta se Takis ma'aru ani siye lu tamo lowe meni Jon ma'e sa'i au ani huwei ne fai. Lowe le ma'e te'e toweriye, “Atuatu siye meni, nomo eiwerou irowei awere?” [Lu 7:29]
13 Sosu le lowe ma'e itiya'u eiye, “Fene lu taune werese ma'e owe ape arearere. Fene lowe lo ma'aru owe ape ta'arei anire. Awei meni owane takis ma'aru tewi a'i ariariyeye. Takis ma'aru ape a'i anire. Ma'aru tere'e tomu ne'ese owe ape ta'arei anite.”
14 Ai atu siye lu tamo le ma'e te'e toweriyei ne fai. Lowe apou ei toweriye, “Ne nomo ne totere. Nomo eiwerou irowei awere?” Sosu le lowe ma'e itiya'u eiye, “Fene lu ta lo ma'aru owe ape ai atu ta'arei anite. Fene peri me'iyeni ma'e tiyati owe ape te'e narute. Ma'aru towafi fene lo, fene aniyei ape, fene marepi fetane a'i totete.”
15 Lu taune tomu ne'ese Jon ne marepi erasi a'i tote tiyatiteye. “Meni Jon eiwerai awere? Meni ape Krais awere? Le meni ape Owane Sitewi lai ariariyeye ape awere? Piyete awere? Tu naifa Owane Sitewi lai ya'ariyei nomo lo ma'e peri te'e naneiyei ta auwe. Nomo, meni ape lo aiyeyei ape ne, ninawesiya.”
16 Sosu Jon peri lowe lo wanuwe su, le lowe ma'e itiya'u eiye, “Fene ane ma'e siyere. Ane meni Krais se ta'ama. Ane sa'i wara'i a'i se fene au huwei ne fai. Meni ta ane mo'o aiyeyei ape, le Meni Owane Pefine a'i ne. Ane meni yahowa'i a'i ne. Ane lowe tahe lo wafei ani tahe eraurowata. Meni ape aiyeyei su, le fene ma'e Owane Sitewi lo Hepene Wara'i a'i se au huwei. Yehe aiwawe a'i se au hu-wei. [Ap 13:25]
17 Meni ape aiyeyei su, le meni ta wou a'i nau teineyei ne fi. Le nau hamei teineyei su, nau fi le'iye papu itorowa. Nau hamei seni ani fusawiyei. Nau teine tepa'asiyei su, le nau motowe se weniyei. Wesi sahe fuwei. Nau hamei seni foro'o a'i su, le yehe sahe fusawiyei. Yehe ape noruwerowata.”
18 Serai Jon lu taune werese ma'e Owane Sitewi lo peri heneruwe wisere a'i peri morose se au te'e atuatu fiyariye.
Jon lai Jisas sa'i au huwe.
(Matyu 3:13-17; Mak 1:9-11)
19-22 Nowe ta se Jon lu taune tamo ma'e sa'i se au huteye su, meni Jisas Jon ma'e sa'i se ani huwei ne fai. Sosu, Jisas Owane Sitewi ma'e au te'eye su, Owane Sitewi lai ni'arawe aine erauwiye. Owane Sitewi lo Hepene Wara'i a'i le ma'e irowe sapuwe wou a'i iyo'o sahe sine onurai. Peri ahi morose erasi a'i hire ma'e itorai. Jisas ma'e apou eiye, “Wanure! Ne meni eime ano ne! Ane ne ne marepi erasi a'i tote wawesiyenamisiya. Etiri werese no, ne iroteye ape, ane ne ne au wisereye nine'isiya.”
Herot lai Jon kalabus wesi ma'e ani fu arowe.
Nowe mo'o ta se Jon meni Jisas sa'i au hu tepa'asiye su, le awei Owane Herot ma'e apou eiye, “Ne yo seni luwaru a'i irowe. Ne pa'ise no lo tani Herodias tafa'e yo seni luwaru a'i iroteye. Yo seni werese no luwaru a'i ne.” Herot Jon lo peri wanuwe su, le Jon ma'e ai marepi erasi a'i toteye. Le Jon kalabus wesi ma'e hene fu arunari. [Mt 14:3-4; Mk 6:17-18; Jo 1:32]
Jisas lo ya'ariyei lo lu tewi a'i ne.
(Matyu 1:1-17)
23 Sosu a'i pe Jisas nowe iyu menei meni ta werese, meni tere'e ta ereti feni hesi a'i (30) iroteye. Nowe ape se le wiyawi tutawe lo ta'aneye. Lu taune tamo le ne apou toteye, “Meni ape Josep lo meni eime awere?”
Josep, Eli lo meni eime. Lu 4:22; Jo 6:42
24 Eli, Matat lo meni eime.
Matat, Livai lo meni eime.
Livai, Melki lo meni eime.
Melki, Janai lo meni eime.
Janai, Josep lo meni eime.
25 Josep, Matatias lo meni eime.
Matatias, Amos lo meni eime.
Amos, Nahum lo meni eime.
Nahum, Esli lo meni eime.
Esli, Nagai lo meni eime.
26 Nagai, Mat lo meni eime.
Mat, Matatias lo meni eime.
Matatias, Semen lo meni eime.
Semen, Josek lo meni eime.
Josek, Joda lo meni eime.
27 Joda, Joanan lo meni eime.
Joanan, Resa lo meni eime.
Resa, Serubabel lo meni eime.
Serubabel, Sealtiel lo meni eime.
Sealtiel, Neri lo meni eime.
28 Neri, Melki lo meni eime.
Melki, Adi lo meni eime.
Adi, Kosam lo meni eime.
Kosam, Elmadam lo meni eime.
Elmadam, Er lo meni eime.
29 Er, Josua lo meni eime.
Josua, Elieser lo meni eime.
Elieser, Jorim lo meni eime.
Jorim, Matat lo meni eime.
Matat, Livai lo meni eime.
30 Livai, Simeon lo meni eime.
Simeon, Juda lo meni eime.
Juda, Josep lo meni eime.
Josep, Jonam lo meni eime.
Jonam, Eliakim lo meni eime.
31 Eliakim, Melea lo meni eime.
Melea, Mena lo meni eime.
Mena, Matata lo meni eime.
Matata, Natan lo meni eime.
Natan, Devit lo meni eime.
32 Devit, Jesi lo meni eime.
Jesi, Obet lo meni eime.
Obet, Boas lo meni eime.
Boas, Salmon lo meni eime.
Salmon, Nason lo meni eime. Rut 4:17-22
33 Nason, Aminadap lo meni eime.
Aminadap, Atmin lo meni eime.
Atmin, Arni lo meni eime.
Arni, Hesron lo meni eime.
Hesron, Peres lo meni eime.
Peres, Juda lo meni eime.
34 Juda, Jekop lo meni eime.
Jekop, Aisak lo meni eime.
Aisak, Abraham lo meni eime.
Abraham, Tera lo meni eime.
Tera, Nahor lo meni eime.
35 Nahor, Seruk lo meni eime.
Seruk, Reu lo meni eime.
Reu, Pelek lo meni eime.
Pelek, Eber lo meni eime.
Eber, Sela lo meni eime.
36 Sela, Kainan lo meni eime.
Kainan, Arpaksat lo meni eime.
Arpaksat, Siem lo meni eime.
Siem, Noa lo meni eime.
Noa, Lamek lo meni eime. Stt 11:10-26
37 Lamek, Metusela lo meni eime.
Metusela, Enok lo meni eime.
Enok, Jaret lo meni eime.
Jaret, Mahalalel lo meni eime.
Mahalalel, Kainan lo meni eime.
Kainan, Enos lo meni eime.
38 Enos, Set lo meni eime.
Set, Adam lo meni eime.
Adam, Owane Sitewi lo meni eime. Owane Sitewi lai Adam awei peperi se ta'aneye. Stt 4:25-26