15
Ipari wisere a'i tamo etiri orese a'i hi awei ma'e ani teroso arosawi.
Sosu a'i pe ane yaru nihari tere'e ta ni'arawe hire ma'e heneraiyei siyeye. Yaru nihari ape erasi wisere pefine a'i ne. Owane Sitewi lo ipari ereti feni werese feni hesi a'i (7) etiri orese erasi a'i ereti feni werese feni hesi a'i (7) ani teroso itorai. Etiri orese ye'ewi ape hi awei ma'e ani terosowei su, Owane Sitewi lo ai marepi tote po'uterowa.
Sosu ane lu taune ape mo, Jisas ne tote tawesi umasiteye ape, siyeye. Lowe sa'i eifariyai lo yaru mapine towafi lowe lo sahe ani ta'ame. Ane lowe hare ite sa'i tewiye sahe teiteyei siyeye. Ane hare ite erasi ta lutatei yehe ti mete wou ta'aneteye ape siyeye. Lu taune ape mo sa'i eifariyai ape, sosu nihari lo hawese metei sahe lese ta'aneye ape, sosu iyape lo nawiteyei ape, lowe ma'e ai atuwewe, hi ani ararowe ape, lu taune ape mo hare ite lutatei wou tewiye sahe teiteye. Owane Sitewi lai lowe werese gita ereti sahe aniteye ape, auwe. Sosu lowe meni Moses lo weni oso omoyawi ahi wou au sineteye. Meni ape Owane Sitewi lo wiyawi meni pefine a'i ne. Sosu lowe fe sipsip yene lo weni oso omoyawi ahi wou au sineteye. Lowe apou au te'e sineteye.
“Owane Sitewi, ne meni kairefi pefine a'i ne. Yo seni werese no erasi wisere wara'i a'i ne. Ne lu taune lo yo seni au hese ereiyei su, ne meni farere pefine a'i ne. Peri werese no wiyeme pefine a'i ne. Ne mi mi pasi pasi weriyei meni owane tutawe ironamitorowa. [Kis 15:1; Sng 139:14; 145:17]
Lu taune werese werese iyape no ei ani arowenamite. Owane Sitewi pefine, lowe ne ma'e au ta'ane sine nine'i arowete. Ne a'i lai meni wara'i pefine a'i ne. Yo seni werese farere a'i no ape mo ne, lu taune werese werese siye so'oruwesiya. Serene lu taune omo omo werese sahe irosiya ape, ne ma'e ta'uwerairowawe, ne ma'e au te'e nine'i wisereyenamirowa.” [Jer 10:6-7; Sng 86:9]
Sosu lowe weni oso omoyawi ahi au ta'ane sine tepa'asiye su, ane Owane Sitewi lo wesi tutawe ni'arawe hire ma'e siyeye. Tewi wesi wara'i a'i ape papu Owane Sitewi saro onunamisiya. [Kis 38:21] Sosu Owane Sitewi lo ipari ereti feni werese feni hesi a'i (7) Owane Sitewi lo wesi ape papu nowe ma'e henerai. Lowe Owane Sitewi lo ai marepi ani fu arosaiyei ne naneiteye. Lowe ipari tahe wapo pefine a'i ani asiteye. Lowe wafei gol se ta'aneye ape, metete sahe ti nateteye. Sosu etiri ta'i ta hepene norohuwe hesiyo hesiyo, le lai Owane Sitewi lo ipari ereti feni werese feni hesi a'i (7) lowe ma'e wahu ereti feni werese feni hesi a'i (7) Owane Sitewi lo ai marepi papu teme'eriyeye ape auwe. Le mi mi pasi pasi weriyei ironamitorowa. Sosu Owane Sitewi lo wesi tutawe ape sahe Owane Sitewi lo mi erasi pefine a'i, sosu kairefi erasi lo wesi tutawe lo ape sahe teme'eriyeteye. Serai Owane Sitewi lo wesi tutawe papu yehe itomu teme'eriyeye. Serai owe meni ta wesi tutawe ape sahe wirowata. Owane Sitewi lo ai marepi ereti feni werese feni hesi a'i ani teroso tepa'asiye su, lowe fara'u wesi ape papu si wirowa. [1 Kin 8:10-11; 2 Sto 5:13-14; Ais 6:4]