8
Iawe e Godila insenune wanlempa
Mape Moses Israel apanawa diamone wanase, “Iawe e Godila ena 40 bedewe ambi sala makowa bedewe e banlalene odena insenuna. Me e poka enalena mampe wadaetaledie ewalepia baiwa. Ita e poka enaledia bedewe e ituaisiledie ewalepia baiwa me anaanawa ruawaitana ba, dia. Me dewaleno omana tolen, tane nana ebowa mana enaleno nalana. Nana sa e ita nosinosila do mai atenla, dia. Ita me ema epe dewalena mampe e ateitana baiwa, apana mai nana os tounawe wampua rua, tane Iawe God aiawa ruawantopue tounawe waimompa.
 
12 E ando nana debama nanune ita du eubu wadamonune bedewe wanlempa, 13 ita do e puela kau, sipsip ita gote uarantopu ita do dewa uduudu bedewe mauraidaitana, 14 tane ewanadewaitana, mai asowawaitana e Isibt apanawa nolau dewalala wainilano Iawe God banlaleno nolelana. Iawe God ita dima me dewasana insenuna, mai nuala awawalepi, dia. 15 Me banlaleno sala makowa debama bedewainta, ita sape mota kadiu uaraia ita nauapiapisa, ita do sala makowa esa dia bedewainta odalana. Tane me dewasano nauida bedewe esa nosen 16 ita nana ebowa mana nosinosila mapo mai da mo napona enaleno nalana. Sa ipa e wadaetalepio ituaisitane me anaanawa ruawaitane ompe euda donsana baiwa epe dewasan. 17 Tane ewanadewaitana mai eba insene wanaase, ‘No nuba mukamba mampe badowa nolantene mauraidanten.’ 18 Iawe e Godila insenuna, me saua badowa e nosinosila mampo saualen, saua sa me insene baiwa e muka enaledia nitu uduudu mampe mauraitana.”
8:3 Matiu 4.4; Luk 4.4