4
Keriso amonawa daitada sumanailala wanamode
Ne Tatamba simbiasadina baiwa mo ne diburaneieno wainedina, sa baiwa dima ne wapaa baiwantedina e etane ruawaitana. God e sonabalene apalena me apanawaida kakaibu wanaitene wainilana, sa baiwa ne badowaida iririledina e wanwanla kakaiwa dodomana God menasadia rua wanlempa. Asowawa ene eba ituaisitonune ita nuala bibia mampe wanlempa. Nuaewaewa uduudu bedewe nuawadawada mampe eda sauitonune saila awanenuna ita etela aiaisiwa mamoo wanlempa. E Aleu kakaiwa bedewe deaiten ita wanwan obasa euwa bedeweitene wainilana. Sa baiwa nuala uduudu mampe nolaitonune wanlempa, deaitene wainilana kadisana sawa. God apanawa mai empuempula bedewe waimoipona, dia, mo uwa dea, sa ipa ete dea rua waimoi. Ita Aleu kakaiwa dea os mo bedeuwo nolaleide. God e apalena e insaisala Keriso os mampe ituna baiwa, mai insaisala ituna intawa da wineipona, dia. God apanawaida Tatau dea, mai da, ita sumanaibu dea os, mai sumanai da, dia, do babatutu dea os.
Mo Godiu dea os, mai da, me ipa apana uduudu Mambu, ita apana, do nitu uduudu me atowentoputuwapio oniamompa. Ita dewa uduudu ipa sa me bedewe nolaleidituwade ita me os uduuduleide. Tane Keriso dima menasana ruawalene no deadea amonawa neneno wadatana. Sa baiwa buka bedewe wadi wadiase,
“Me onawa nanausimone banlamone do odene alen. Ita sape waine apana amonau daitada wanamon.”
Buka bedewe epe wade, “Me odene alen.” Ema dima umanawa wade? Sa ipa Keriso bauta sue tawo osowe iena baiwa leulene bolawe odene alena umanawa wade. 10 Me mida iena deawaa leulene odene alene uboo wain. Me epe dewalena nitu uduudu mampe me os uduudulepia baiwa.
11 Keriso amonawa daitada apanawa wanamodio mampe nolantoi. Mo isiwa aposeliwa, isiwa perowetawa, isiwa Gagalo euda amonalala, do isiwa ekelesia onionialala, ita isiwa waeuwa apanawa teamon. 12 Keriso amona sa God apanawaida wanamona muka wadapue imaantopue rua me nolawantopu. Keriso menasadia amonawa nolawa daitada mampee me etepa, sa ipa ekelesiawa, inilepie badolepi. 13 Do menasadia me amonawa nolawa dewasante wainenta ita no uduudu sumanaimba bedewe deaidantate God Otopa dauwa etate atenidantata. No nolantonte wainenta Keriso bedewe debamantate sumanaimba badoidalepi ita dima uduudu dewasanta mampe Keriso insaisawa uduudu bedembolepio ruawaidantata.
14 No Keriso bedewe muntate debamantata ando sumanaimba bedewe mai seda kerakera ruau wainenta, dia. Ita no Keriso bedewe sumanaimba badolepio laga apanawa mainimbo wimopue menamodia gagalo sanaa daitada mampe, ba laga kadiwaida mampe banlakadisanempo no mai tauwadea ulaipa sumanai intawa ete mo gagalou sanaa sa bedewe sumanaimba itute waroromota, dia. No mai ina lanunu wisedie sudio leusaituleidia, ba kaisaka abaia awanedie leusaitusadia rua dewantonte wainenta, dia. 15 Tane no nuawadawada mampe ulaipa gagalowa baiwa badowa enonte wasabamosante apana diamonta. Ita no Keriso bedewe debamantate dewa uduudu dewasantaa mampe me mida no uwamba nepa bedewentate ruawaidantata. 16  No uduudu me etepa wainitana ita ete moawa uduudu me oniamodio nolauwonolauwo dewasaio ete dealeide. Tane ete moawa uduudu Keriso mukawa wadeiena rua nolauwonolauwo dewasampo ete inilepie debamalepi, ita nuawadawada mampe eda sauntompo badolempa.
Duba apanawa dewau eidasataa gagalowa
17 Epe wana baiwa Tatamba ebowe ne badowaida dialedina e wanwanla bedewe mai duba apanawa dewantoia rua dewaitonuna, diaida! E bauta ipa epe wainile, tane tauma ne badowa dialedina mai wanwanla bauta wainilana rua wanlempa, eidasana! Duba apanawa waimoia bedewe insaisa diapanau insamoie dewamoi. 18 Mo uwau dubawa bodedio insaisau kiokioleidio mai dima atentoipona, dia. Ipawa mo nuau badoidaleno God mai atensaipona, dia, ita ina sanaa God nanaleidia mo mai wadeipona, nambeido waimoi. 19 Mapo kadi dewasaie malawantoie, tane tauma mo nuau badoidalena baiwa kadi dewasaie mai malawantoipe sawantoipona, dia. Mo insaisau uduudu ete ewanuauwa kadiwa daitada mampe ituie dewasai. Mo kadi uduudu dewasaie mai pokamoipono eipona, dia, tane osoweosowe dewasampaa menaidamode. 20 Keriso mo mida me aiawa amonantoia bedeuwoe mai dewa kadiwa ema waeuwalepona, diaida!
21 Mo Keriso benemawa dodomana diadewasaleiena ita ulaipaida Iesu mampea waeuwaleieno etale wadalana. Ema ipa ne ateinaida. 22  Keriso waeuwa intawa ipa ema epe: E mapo nuala insaisawa tontawa bedewe eba ewanuaula rua duba dewawa daitada dewamoile. Tane e nuala insaisawa ita dewala tontawa uduudu tauma riasane eidasana, e insaisala ita dewala tontawa ete ewanuauwa daitada banlakadisasane kadiidasan. 23  Sa baiwa e wanwanla tontawa bedewe wainilana dewawa ena. Tane Aleu kakaiwa e nuala ita insaisala leusapio sanaaidalepi 24  ita nuala insaisawa sanaa nopelepi. E tauma apana sanaa segaitene wainilana. Sa ipa God me inainamba rua dewalena banlalepie dewalepio dewa eubu dodomana kakaibuida dewamonuna. 25 Sa baiwa laga dewawa uduudu eidasana! No God obampa dan dea rua wainitana, sa baiwa sosola mampo ulaipa gagalowa os wanuna. 26 E nuala kadilepia nuakadila sa mai banlalepio kadi dewasana, dia. Ita nuala kadilepio e mai nuakadi do wanlempo omo pamepi, dia, tane tauwadea nuala dodomanasana. 27  Naita nuasigasiga bedelawo winompa, sa ipa du moawa wadeilaaubeilana Seitan odepia baiwa. E mai epe dewaitana, dia! 28 Mo mida pointoia poi dewawa eidasapue dewa euda dewasapue muba simbiantopue osowe waimompa. Tane mo nuaparelala saumompaa baiwa nolawantompa, mai muba os insaisau wadompe nolawantompa, dia. 29 Gagalo kadiwa mai wanuna, diaida. Tane gagalo euda os wanuno apana dima menamodio kewa waia etalepue insaisau badolepio sau euda wadapu.
30 E God Aleupa kakaiwa mai dewasano nuaparelepi, dia. God Aleupa kakaiwa enalena, sa ipa e makasalen me mebaawaida tauma ita ando inaida ipawanalempa walamawe do baiwa. 31 Nuakadilala uduudu, nuasigasiga ita ete gedarala, aia badobado mampe rasala, ituaisi gagalowa, warebasa, ita dewa rebareba daitada emonatuwapi. 32  Tane e euda dewasanuna ita sosola nuapareuitane saumonuna. Sosola kadileia kadiu insadabuamonuna God e kadila Keriso bedewe insadabuamona rua.
4:2 Kolosi 3.12,13 4:16 Kolosi 2.19 4:22 Kolosi 3.9 4:24 Kolosi 3.10; Bumpai 1.26 4:32 Kolosi 3.13