3
Kadi bumpa segalena gagalowa
1 Tane Iawe God pue uduudu dewamona bedeuwo mota ipa laga wawa atembaida. Walama dea mota i diene wanase, “Ide ulaipa, God dialena irai Iden bedewe ia uduudu naumoia ipawa mai namona, ba?”
2 Tane i mota sipoasane wanase, “No ia uduudu irai bedewe inintoia ipawa namonta rua.
3 Tane God wanase,
‘Irai bedewe ia sawanoido enedia ipawa mai wadane nana ba ibuwa wadane etana, dia. Naita epe dewaitana e ando boitana.’ ”
4 Tane mota i sipoasane wanase, “E mai boitana, diaida.
5 Ipawa God atemba, e wadane nanaa walamawe e ando me ruawaitana, euda ita kadiwa ateitana.”
6 Sa baiwa i ia ipawa eubu wineio ewamone nuausan. Ita do me menasana ia ipawa napie aten iwa debama segalepia insene ita ia ipawa wadene nane ita isiwa badawa waneno nan.
7 Ita mo nata emau wadenaubeno nikoakoa waimoia ewane ita ia asiwa dewasane tauiena.
8 Ita rawilene sala obasaleno mo Iawe God irai bedewe iedio wawa moinawa eteina. Ita mo Iawe God mampe santone ia eneia bedewe wereganton.
9 Tane Iawe God apana apasane wanase, “E naepe?”
10 Tane apana me sipoasane wanase, “Ne e irai bedewe waiano eteena tane nikoakoa wainedine baiwa santene wereganten.”
11 Me waitaralene wanase, “E nikoakoa wainiana umanawa mida dieen? Ne ia ipawa umanawa e anaanaena dauwa e naana, ba?”
12 Ita apana sipoalene wanase, “E i ema ne nata wainenta baiwa neaana me ia ipawa wadene neno nana.”
13 Tane Iawe God i waitarasane wanase, “E dima dewasaana?”
Ita i me sipoasane wanase, “Mota ne laganeno ia ipawa nana.”
14 Tane Iawe God mota diene wanase,
“E epe dewaitena baiwa
pue manasau ita pue daitada dobinoa waimoia
bedeuwo ne matangelaedina
buawobuawo teteitone tawo popokauwa nane lakasaitaa.
15 Ita ne e dewaepo i nata emalawoaitonuna
ita e bedelawoa deawaa dewasampa.
Ita i bedewea e uwaa ampitutudepi
ita e i bedewea wawa kampa adaa.”
16 Ita me i diene wanase,
“E buitee wanempa bedewe
ne poka debamaia osoawo itupa,
ita oto mulempa walamawe e poka debamaia etona.
Tane e ideita badaa baiwaitona
ita do e ideita badaa atoweitone aiawa ruaitona.”
17 Tane me Adam mampe wanase,
“Ne ia ipawa nanawa anaanaena e mai nana,
tane e manainaa aiawa etee ruaitene naana baiwa ne tawo ema matangelasapa.
Ita e walama uduudu nolaitone poka etone nana ipawa itumpo wadone nane wanempa.
18 Tane dogo osowe bodu ita gedara inintopu
ita do eba iraite poka etee
ita nae tounawe wana.
19 E iraitone anawo pola nosepio
nana ipawa itupio wadee nae tounawe wana.
Tane ando e boitee leuite dogo bedewe aitaa.
Ne tawo popokauwa mampe e dewaena
tane ando leuite popokau wanaita.”
20 Tane tauma apana manainapa ebowa wane ituna Iwi. Ebo ema ipawaida ipa, me ando apana uduudu inau wanalepi.
21 Ita Iawe God pue etepa dewasane wadene ita Adam manainapa nata wanamono tauiena.
Iawe God Adam Iwi nata irai bedewee waaubamon
22 Iawe God wanase, “Apana ema tauma no ruambanton mo insaisa euda ita kadiwa ewaewa atenton. Sa baiwa mo mai ina iawa ipawa wadapue napu, dia. Mo napue inawaa wankasantopua sawa.”
23 Sa baiwa Iawe God mo waaubamono irai Iden bedewe waimoia ene nomone anton dogo sa mampe dewamona osowe wampue iraintopu.
24 Ita me apana waaubamono nomone anton. Aupo me Iden iraiwa omo wiseidia deneuwe ensel kerubim teamon, ita do isima moamoaua idie bumedie leusaituleidie winedie ita mo irai bodane eneie ipawa mai apana da ina iawa mampe wisepi.