6
Apana kadiu tawo osowe debamaleide
1-2 Walama sawo tawo osowe apana muntoie uarantoio bedeuwo God obampa* ioto ewaewau eubuida mo ewamone nuaumono sonabamone naimoiena. Ita Iawe God wanase, “Ne aleuna mai apana inainambu ema etepu oaoara ando bolepie dialepia bedeuwo waimpo walama daumaia dialepi, dia. Sa baiwa ne mo enau 120 os wanamona bedewe tawo ema osowe wampu.”
Walama sawo ita adiwe odene su alena apana mubu debamau tawo osowe waimoie. Tane walamaipa God obampa apanaida iwoa do ituntoia sedau gamomoie. Ita seda sa ipa mukamukaua ita dewa pokawaa dewalala do ebou alala ita do mo dudunau wawalala.
Iawe God apana kadiwa daitada tawo osowe dewamoie waimoia ewamodie. Ita mo walama uduudu dima inseie dewamoia ipa kadiwaida. Sa baiwa Iawe God nuawa parelen ita do nuawa pokaida wan apana me dewamone tawo ema osowe teamono waimoia mampo. Ita Iawe God wanase, “Tauma ne apana uduudu tawo osowe waimoia kadimopatuapi. Ne nuana pareidaleide dima baiwa ne mo dewamona. Sa baiwa ne apana uduudu ita pue debamau ita kerakera tawo osowe tetelala ita nene iono laia do kadimopatuapi.” Tane Iawe God apana dea ebowa Noa ewene nuawa eulen.
Noa dudunawa
9-10 Noa obampa do dudunau ema epe.
Noa obampa natadea, mo ipa Sem, Am ita Iapet. Walama sawo Noa me ipa apana euda dodomana mai wawu da do apana bedeuwo wandie. Tane me God aiawa ruawaleidie wadaposisadie wandie.
11 God tawo ewena ipa kadiidalen ita apana uduudu tawo osowe dewa daitada rebarebaida dewamoie waimoie. 12 Ita do God tawo ewena ipa rebarebalene kadiidalen ipawa apana uduudu kadiwa daitada inseie ita dewasaie waimoie.
13 Sa baiwa God Noa diene wanase, “Tawo osowe kadi debamaidalen ipawa apana waine kadi dewasai. Ne insedina tawo ema ita apana uduudu ne kadimopatuapi.
14 Sa baiwa ne menanedia e ema epe dewaita: Tauma e eba baia waa debama ia euda badou mampe dewasa. Ita waa sa bedewe bola empuempumoa. Ita ema aupe waa bedewa ita adiwa ia bodipa mampe pasisabodaitaa. 15 Ema epe rua waa dewasaa: daumalepia mitawa 140 ita debamalepia mitawa 22 tane odepi alepia mitawa 14 wadepi. 16 Waa iwa dewasane bela ita du iwa sawanauwo naga awopawa witaa uraupe ita kompa oso nosena rua daumawa ea. Tane du moawa waa sainape itua ita waa bedewe wanwan bolawa iono, sawano ita atowe dewamoa.”
17 Ita God wanase, “Asisuitana! Ne abaia wapaaubepo wisepie nitu uduudu tawo osowe inawa waimoia ita do nitu isiwa nonau tounawe waimoia kadimopituapi. 18 Tane ne sauana badowa e manawo wadina. E ita obana, manainaa ita do obana manamanainapu do waa bedewe odana. 19-20 Ita do pue daitada natanata mona ita iwoa manawo wimopuo otamoe waa bedewe aimoa. Tane nene daitada do pue debamau ita kerakera isiwa tetelala inawaa waimompa baiwa natanata otamoe aimoa. 21 Ita do nana daitada nanalala e eba baila ita do pue baibu otamoe waa bedewe adibaitaa.”
22 Ita God badowa Noa diena rua uduudu dewasantuan.
* 6:1-2 Aia God obampa ipawaida mai mida da atenlepona ensel ba sumanailala umanau wade. 6:1-2 Iob 1.6; 2.1 6:4 Nambas 13.33 6:5 Matiu 24.37; Luk 17.26; 1 Pita 3.20 6:9-10 2 Pita 2.5 6:22 Ibru 11.7