4
Aleu dainea ulaipa ita dainea lagawaa rubumote ewate atenmota
1 Nuana sosowa, apana uara wimopue wapuase, “No God Aleupa kakaiwa banlanedio me gagalowa waite leitana.” Mo epe wampo, mai tauwadea memesaitane sumanaibuitana, dia. Tane bauta e mo rubumone ewane ateitana, mo ide ulaipa Aleu God mampe wadane gagalontoie lai, ba dia. Ne ema epe wadina, ipawa peroweta lagawaau uara aitamana nomone tawo uduudu bedewe antonatuwaiena.
2 E mo rubumone ewane ateitana aleu apana bedewe waine banledio gagaloleidia ulaipa God mampea, ba dia. E banuitane donsanadewaitana, ipawa apana ulaipa Aleu God mampe wadena me wasabamoleidie wadiase, “Ne Iesu sumanaiwantedina, me ipa Keriso Inawamba God wanaubeno wisene apanaida etemba wadene no ruambalen.” Apana mida wasabamoleidie epe wadia, me ipa sa Aleu God mampea wadene ulaipa gagalowa benemaleidie leide.
3 Tane apana mida Iesu wakoasadie wadiase, “Iesu, me mai Keriso Inawamba God wapaaubepono apanaida etemba wadapona, dia,” apana sa mai aleu God mampea wadape nolaleipona, dia. Tane me bedewe aleu da waine banledio nolaleidia, aleu sa ipa Keriso onawa. E etalana wadiase, “Keriso onawa aleupa ando wisepi,” tane aleu sa aitamana tawo osowe wisene nolaleide.
4 Tane e ne obaina, e bumpala ipa God bedewe winede, ita e mai peroweta ema lagawaau sumanaibuitipona, dia. Tane e mo nanaumolana, ipawa Aleu kakaiwa mida e bedelawo wandia, me ipa mukawaaida, mai aleu lagawaa tawo ema mampea rua.
5 Waeuwa apanawa lagawaau mo bumpau ipa tawo ema bedewe winede, sa baiwa mo gagalou uduudu tawo ema mampea waie lai. Ita ema baiwa tawo ema apanawa mo gagalou eteie tauwadea os sumanaibuntoie wauwo antoi.
6 Tane no aposel, mida Iesu ibuwa ewate do wankasantene me waaubanena, no bumpamba ipa God bedewe winede. Eueuwa ema no ewate atentata mida bedewe ulaipa aleupa wande ita mida bedewe Keriso onawa aleupa wande: Apana mida God atemba me no waeuwamba asisusadie mampesade, tane me mida mai God mampea, me mai no asisuneipona, dia.
God ipa nuawadawada
7 Nuana sosowa, no sumanailala ideita nuawadawadantonta, ipawa nuawadawada bumpawa ipa God bedewe winede. Sa baiwa mida nuawadawada bedewe wandia, me bumpawa ipa God bedewe, ita me God atemba.
8 God, me ipa nuawadawada. Sa baiwa apana mida mai nuawadawada bedewe wainipona, me mai God atensapona, dia.
9 Tane God me nuawadawadawa inta ema inta no baimba sabamosan: Me Otopaida wanaubeno tawo osowe wisene inawawa itune ene bolen, no me bedewe inaida winakasala donsataa baiwa.
10 Tane God nuawadawadawa ipawaida ipa ema epe: No mai bauta God nuawadawadasapona, dia, tane me no di nuawadawadanene me Otopa wanaubena bolepi pulo eudida no kadiwamba malesawa ita ema bedewe no dodomananepio God sosowaida wanantataa baiwa.
11 Nuana sosowa mida ne nuawadawadaledina, ema insenadewaitana: God nuawa uduudu mampe nuawadawadanen, sa baiwa no do eda nuawadawadantipona.
12 Mai mida da God ibuwa ewapona, dia. Tane naita no nuawadawadantonta, ema mampe no sabamosaitana God no bedembolene wande ita me nuawadawadawa no bedembo nolaleide. Ema bedewe God nuawadawadawa ipawaida sabamoleidie sapaidaleidio apana ewei. Sa baiwa no ideita nuawadawadantonte wainenta.
13 God Aleupa kakaiwa no neneno wadatana mampe no eweite atentitana no aitamana God do deanten ita me bedewe wankasantata, ita God no bedembo wankasalepi.
14 Tane no aposel Iesu emamboido ewate ita benemawantite waitanase, “God, no Mamamba, me Otopa deaida wanauben tawo ema kadi bedewe inasapie euwa osowe itupia baiwa.”
15 Apana mida wasabamoleidie wadiase, “Iesu, me ipa God Otopaida,” me sabamoleide God me bedewe wande ita apana sa God bedewe wande.
16 Tane no nubaida winene God nuawadawadawa atentene sumanaiwanten. God ipa nuawadawada. Sa baiwa apana mida nuawadawada bedewe wandia, me nuawadawada sa mampe sabamosade me God bedewe wande ita God me bedewe.
17 No nuawadawada bedewe wainenta God kotuwa walamawa wisepio mai sawantata, dia. Tane no badowa God danawe enata, ipawa tawo ema osowe no Keriso waina rua wainitana. Ema bedewe no ewate atentata nuawadawada no bedembo inilene ipuipua debamalene sapaidaleide.
18 Nuawadawada bedewe mai sa da wineipona, dia. Tane nuawadawadaida nuasasana tanedio nosedie aleide. Matangela donsataa baiwa no nuamba saleide. Ita mida nuawa bedewe sa winedia, sa ipa sabamosade me bedewe God nuawadawadawa mai inileipe debamaleipona, dia.
19 No nuawadawadantitana, ipawa God bauta no nuawadawadanen.
20 Tane apana mida wadiase, “Ne God nuawadawadasadina,” tane sowaida nibuasadia, me ipa lagawaaida. Ambi me God ewasiawaia nuawadawadasapi, ipawa me sowaida emawe sabamo ewedia mai nuawadawadasaipona?
21 Keriso anaana ema no witambosano wadatana: “Me mida God nuawadawadasadia me sowaida do nuawadawadasampe waimpa.”