Iosua
Waeuwa uawa
Buka ema bedewe girumalene wadia Israel apanawa bola Kanaan bedewe antone apana sape waimoia onau enane nanaumone aimoiena umanawa wade. Ita do mo bola odantone Israel damba uduudu 12 wanamoiena umanawa wade. Buka ema ebowa ipa Iosua ipawa buka ema bumpe Moses boleno aupawa Iosua wadene Israelwa uwaulene banlamona umanawa wade.
1
Iawe God Iosua diedia bola Kanaan wadepie mampesapi
Iawe God nolawa dewalala Moses boleno aupe me sausadie leidia, Nun otopa Iosua mampe Iawe God wane wanase, “Moses ne nolana dewasadia apanawa bolen. Sa baiwa tauma e imaitee ita Israel apanawa uduudu banlamoe esa Ioadan nawane bola ne wanamodinawo aitana. Bola uduudu bedewe odane wala ainuna bola sa ipa e ebaala, ne enalena mapo Moses sauasana rua. E bolala makawa ipa Negeb sala makowa ita alene wadi Lebanon waden. Ita do e bolala makawa Eupirates esawa omo wiseidia deneuwe, ita alene Itai apanawa bolau uduudu ita Mediterenian Owawa debamawa omo pamediawo enentuden. E wanempa walamawe mai mida da nanausiepia rua, dia. Ne ipa Moses do lakasantena ruawa e mai eepa, dia.
Ne apana ema nosinosiu mampo badowa sauantena tawo ema wanamopa. Sa baiwa e badowa mukamukaua enee apana ema banlamowo bola sa bedewe odapue wadapue mubaauwanalepi. E nana badowa mukamukaua enona. Tane ewaadewaita, anaana uduudu ne nolana dewalala Moses eneena ruawaitona. E dewa uduudu dewasano euda segalempa baiwa mai anaana ema saiee leusaitutee witaa on ba sen deneuweitaa, dia. Walama uduudu waeuwa ema waeuwaitona. Tane do walama ita tadina nuaa bedewe insamone os wanempa, ema epe dewaite anaana ema uduudu ruawaitaatuapi. Ema epeinta e ando nolaa bedewe debamaite ipuipua segaitaa.”
1:5 Ibru 13.5 1:6 Diutor 31.6-8,23