21
Manase ipa Iuda bolawa warerewa
1 Tane Manase enawa 12 wadeno warerelen. Me Ierusalem bedewe warerelene wandio enawa 55 diasan. Me inawa ipa Epsiba.
2 Manase Iawe God aiawa mai ruawalepona. Me ipa sa bauta Kanaan bolawa bedewe waimoio Iawe God Israelwa danauwo tanamono nomoiena me bola daitada mai God atentopona dewau kadiwaida dewamodie.
3 Manase mamba Esekia laga wadaposiwa bolawa kadimon tane me sanaamon. Me pue pulontompa watawa dewamon ita mo god Baal wadaposisampa baiwa. Ita me Asera wadaposisampa iawa eindoden Israelwa warereu Eiab dewalena rua. Manase kipora uduudu uba tampe mampo uwawa epentee wadaposimon.
4 Mapo Iawe God wanase, “Ne wadaposina duwa Ierusalem bedewe enedia, ne ebona sape winompa.” Tane Iawe God duwa Manase dewasano god da pueu pulontompa watawa segalen.
5 Tane God duwa bola empuempula nata bedewe Manase dewasano kipora uba tampe wadaposiwa bolawa segalen.
6 Manase meba otopaida ia bedewe pulolene sun, wene dewasan ita nepoanalen, waigiolen ita me aleu kadiu mampo gagalolen. Me dewa kadiwaida dewamono Iawe God awasinasano nuawa kadilen me mampe.
10 Tane Iawe God benema ema me perowetawa, mida me simbiasaia wanamon.
11 Me wanase, “Kanaan apanawa dewa kadiwa dewamoiena tane warere Manase dewa kadiuida dewamon. Me Iuda apanawa dewamono mo godiu kokoitaubu wadaposimoiena.
12 Sa baiwa ne, Israelwa Godiu Iawe, poka debamaia Ierusalem ita Iuda tawowa osowe itupa. Ita mo poka sa umanawa etapue nuau saidalepi.
13 Ne bola debama Samaria ita warere Eiab duwa bedewe wanwanlala kadimonatuwana rua bola debama Ierusalem matangelasapa. Ne apana laukai bedewa mitedie leusaditudedia rua apana uduudu Ierusalem bedewe mitaaubamopa.
14-15 Ne apanana Isibt tawowa ene nomoiena ita tauma walamawa osowe, mo kadiwa daitada dewasane awasinaneieno nuana kadiidalen mo mampo. Sa baiwa ne apanana tauma inawaa waimoia dabuamope emopo Iuda emalawoau apanawa mampentopu. Mo emalawoau sa Iuda apanawa dogou mamposapu ita nitubu uduudu poisamopu.”
16 Tane do Manase apana uaraia eubu epaboiamon, sa baiwa bola debama Ierusalem intawa uduudu osowe osina weuwan. Tane me osowe Iuda apanawa dewamono kadiwa dewasane kokoitau wadaposimoiena ita Iawe God adiananasaiena.
18 Ita Manase boleno apana warere duwa ebowa Usa iraiwa bedewe dobontoiena. Ita me aupawa otopa Amon warerelen.
Amon ipa Iuda warerewa
19 Tane walama sawo Amon enawa ipa 22 wadeno Iuda warerewa enen. Ita me warerelene Ierusalem bedewe wandio ena nata dialen. Me inawa ipa Mesulemet Aru anoopa bolawa debama Iotba apanawa.
20 Amon mamba Manase rua Iawe God aiawa mai ruawalepona.
21 Amon mamba dewalena rua kokoitau daitada wadaposimodie.
22 Me nosiwa Godiwa dabuasan ita Iawe anaanawa mai ruawalepona.
23 Warere Amon nolawa apanawa debamau me bosapua gagalontone ita warere duwa bedewe bosaiena.
24 Sa baiwa Iuda apanawa nola dewalala Amon bosaiena sipoa mo bomoiena. Ita me aupawa otopa Iosia itueno warerelen.