Niamaia
Waeuwa uawa
Buka Esra ita Niamaia girumantoiena bedewe ambi Iuda apanawa Babilon tawowa bedewe wanwanlala leuntone muba bolauwo antoiena ita mo God duwa bola debama Ierusalem bedewe osowe wadeiena umanawa dianede.
8
Esra Iawe God anaanawa apana mampo wisialeide
Apana uduudu wimone auweia bolawe sabamo du moawa ebowa waia Esa Gonaala Intawa Moape sape mo auweiena. Ita mo anaana waeuwa apana Esra dieiena Moses anaanawa bukawa Iawe God Israelwa wanamona wadepie wimpi.
Sa baiwa uaboa 7 wadeno walama dea ualeno pirisi Esra* anaana bukawa wadene apana uduudu mona ita ioto ita seda eiau gagalo etapue atentopua mampo wisen. Esra auauwa bolawe sabamo anaana bukawa apana uduudu mona ita ioto ita seda eiau gagalo etapue atentopua mampo wisialen. Me omo wisedio anaana bukawa wisialeidio enautalen ita mo deaitopa asisusaie.
 
Esra apana danauwo ia tabataba osowe enedie ita apana uduudu me eweie. Ita me anaana bukawa wadenaubene wisialepia baiwaleidio mo uduudu ewane enanawimoiena.
Esra Iawe God me ipa debamawaida wadaposisan. Ita apana uduudu me sipoasane waienase, “Sa ulaipa!” Ita mo witapu wadaposimoiena. Tane mo dunentone Iawe God wadaposisaiena.
 
Liwai apanawa God anaanawa bukawa wisiantone waeuwantono gagalo ipawa sabamoleno apana atentoiena.
Tane apana anaana gagalowa etane ke waiena sa baiwa gabemani Niamaia, anaana waeuwala Esra ita Liwaiwa mo mida waeuwantoia apanawa uduudu mampo wane waienase, “Walama ema ipa kakaiwa Iawe e Godila baiwa ita e mai nuala parelepio ke wana!”
10 Niamaia wanase, “Tauma e aitane esa ita nanala eubu uwatauwa namona ita mo mida mai dima da wadape wimopona nanala moa wanamona. Walama ema ipa kakaiwaida Iawe God mampe. Iawe God e nuaeu enalen ita e muka wadana sa baiwa mai nuala parelepi, dia.”
* 8:2 Esra ipa pirisi ita do anaana waeuwa apanawa.