139
Iawe God atemba debama ita onionia
Dawid sasawa
 
Iawe God, ne nuana bedewa banuitene ewaana,
e ne atenidaneana.
Ne wainedina ba enedina e atenaida,
e nowa dauwoido wainiana tane insaisana uduudu atenaida.
E ne ewaneiano leidina ba bubuantedina,
dewa uduudu dewamodina e atena.
Muriwa gagalo da moanawo nosepi,
e bauta ateitiana muriwa ne wadina.
 
E ipa gonaa rua ne pananeana,
e mukaa debama mampe gonaaneana.
E ne ateineiana atemba ipa debamaia,
ne mai atenteapaa rua.
 
Ne naepe anteapo e mai ewanea?
Mai bola da wineipona bedewe anteapa,
ne naepe antape wampona e sape wainiana.
Ne odape uboo anteapa, e sape wainiana;
ba bolala bolauwo iape anteapa, e sape wainiana.
Naita ne omo wisediawo anteapa,
ba omo pamediawo anteapa,
10 e bola sa bedewe ne witana wadae banlanea,
ita e mukaa mampe ne gonaanea.
 
11 Ne dubawa diapo wereganepi,
ita sapa diapo iwinlepie dubalepi
12 tane dubawa e mai bodeepia rua
e manawo dubawa ipa walama sapawa rua.
Dubawa ita sapa e manawo ipa deawau os.
 
13 E ne etena moa daitada dewasaana,
ita inana bupa bedewe awodeasae ituneana.
14 E dewa pokawaa dewasae dewaneana baiwa wadaposiedina;
nitu uduudu e dewamoiana ipa eubuida.
Ne nuana uduudu mampe atenten.
15 Ne neaina uduudu dewamoana,
ita deaitopanee inana bupa bedewe ituneana,
sape werego muntedino,
e ateiten ne sape wainedine.
16 E ne ewaneano muriwa munten.
Ne wampaa walamawa
umanawa e bukaa bedewe girumaiten
ita muriwa walama sa ualen.
 
17 God e insaisaa uduudu ne mai atentapatuwapia rua,
ipawa e insaisaa uarakadinton!
18 Ne mai wisiamopa rua
ipawa e insaisaa ipa uaraia,
nela wisiasiawaia rua!
Ne itu bedewe enapawineapa,
e ne tainawo onianeiana!
 
19 God, ne menaidanedia e apana kadi dewasaia bomoa!
Ne mainawo wita kadilala tanamowo nambe antopu.
20 Mo e wakadisaei,
mo e eboa mai wiwirawantoipona.
21 Iawe God, mo mida e dabuaeia ne dabuamodina.
Mo e aiaa amboitusai.
22 Ne nuana kadiidaleide mo mampo;
sa baiwa mo ipa ne emalawoana apanawa.
23 Ne nuana bedewa banuitee ewaa
ita insaisana uduudu ateitaa.
24 Naita kadi dewalala intau asiasi antepina waeuwanea,
ita e ina winakasala intawa asiasi banlanea.