11
Dawid ita Besiba
1 Madia walamawe mo dewau rua warere nomoie ona awa antoi. Sorodia uwaula apanawa ita do Israelwa sorodiau uduudu ona baiwa anton ita Dawid Ioab do wanaubeno alen Amon apanawa do onantopua baiwa. Walama sawo mo antone Amoniwa ona apanawa bomonatuwaiena. Ita enee bola debama Raba enane paneiena ita mai mida wisepie odepi ba nosepie alepi, dia. Tane Dawid bola debama Ierusalem bedewe wandie.
2-4 Tane walama dea rawileidio Dawid ituleidie enenwisene ita duwa iwa osowe enedie leidie, ita i esa bedewe duadileidio ewen. I sa ipa uwatauwa ewaewa eudida. (Me uaboa wadeno mo dewau rua duadileidio Dawid ewen). Sa baiwa Dawid apana dea wanaubeno alen i ewepie atenlepia baiwa. Ita me atensane leulene wisene wanase, “I sa Besiba, Eliam anoopa Itai apanawa ebowa Uria manainapa.” Sa baiwa Dawid gagalo wanaubeno ita Besiba me mampe wiseno nata ituntone ita ene leulene duwe alen.
5 Tane i wandie bulene ita gagalo wanaubeno Dawid mampe aleno wanase, “Ne bunten.”
6 Tane Dawid Ioab mampe gagalo wanaubene wanase, “Uria Itai apanawa wanaubeno ne mainawo wimpi.” Ita Ioab Uria wanaubeno leulene Dawid mampe alen.
7 Uria Dawid mampe wiseno ita waitarasane wanase, “Ioab ita sorodia tauma ambi dewantoi ita ona tauma ambi aleide?”
8 Tane Dawid Uria diene wanase, “Aie duawo ita bubuaita.” Uria warere duwa ene aleno wawe pulowa wadane antone waneiena.
9 Tane Uria duwe mai alepona, dia. Tane me alene warere duwa nope itulen Dawid nolawa dewasaia apanawa do.
10 Ita mo Dawid diane waienase, “Uria mai duwe alepona, dia.” Dawid Uria diene wanase, “E inta daumaia wien, dima baiwa e mai duawo aitapona?”
11 Tane Uria Dawid diene wanase, “Saua badowa bokisiwa ape bedewe winede ita Israelwa ita Iuda apanawa do ape bedewe waimoi. Ita ona ualeidia apana Ioab ita me sorodiawa sabamo apua saradountone waimoi. Sa baiwa ne mai dunawo anteape nana ita esa nape do manainana nata ituntata. Ne ulaipaida diedina mai epe dewanteapa rua, dia.”
12 Sa baiwa Dawid Uria diene wanase, “Ande e mape bubuaite wankasaitaa ita imonepi ne waaubaepo leute aitaa.” Ita Uria Ierusalem bedewe wandio walama nata diantono ene alen.
13 Ita sape Dawid Uria apasano mampe wiseno nana ita esa naiena. Ita Dawid esa badowa Uria waneno nane ua koakoalen. Tane rawiwa Uria nosene alene nogiwa osowe itulen Dawid nolawa dewalala apanawa do, mai duwe alepona, dia.
14 Tane tadinaida Dawid leta girumalen Ioab mampe alepia baiwa ita leta sa Uria waneno wadene alen.
15 Tane leta sa bedewe wadiase, “Uria wadee ona pokawaida nambanepe ituwo enepi ita sorodia da otamoe Uria adiwe teamowo enapu. Ita mo me epuiapuo meba nambanepe enepio epapubolepi.”
16 Tane Ioab bola debama Raba ewedie insaisawaleidie ita me atenlen sorodia mukawauida naepe eneia bolawa me atemba. Sa baiwa me Uria wanaubeno bola sa osowe alene enen.
17 Ita bola debama sa apanawa nomone antone ita Ioab apanawa do onantone ita Dawid apanawa isiwa bomoiena. Ita do mo Uria bola Itai apanawa bosaiena.
26 Ita Uria manainapa badawa boleno umanawa etene kewa wadie.
27 Tane kako walamawa dialeno Dawid apana da wanaubeno Besiba banlepie me duwe wimpia baiwa alen. Ita Dawid Besiba wadene mampesane manainapa wanasan. Tane Besiba otopa mona gamosan. Dawid dewawa kadiwa dewamodia baiwa Iawe God mai nuawa eulepona.