15
Gə yə Jesu ha nəm ꞌyaw Pilad
(Matiyə̂ 27.1-2,11-14; Luk 23.1-5; Jã 18.28-38)
1 I gə jomni cor̰ə̂r̰ə̂ dəra me gechide nə̂nə̂ woni bwasa Mãr̰ĩ day me gechide nə̂nə̂ nare nə̂ Juwib day nə̂ ɗang me woni gələ̂ bii gə ꞌwoo gənə̂ Moyis duwa me woni aa sariya nə̂nə̂ nare nə̂ Juwib day nə̂ ɗang pad me dayar ma gwale gaba ꞌyaa Jesu di. Mwom da, cendi yə Jesu di magədəw me ha gandəw ꞌyaw gə Pilad.
2 Pilad di ur Jesu ba da: «Əjəm di me mə̂ i dole gənə̂ Juwib day di mo?» Jesu di cow lə̂ diyə̂ ba da: «Mə̂ way gwale gə ta di əjəm gang.»
3 Ər̰ə, gechide nə̂nə̂ woni bwasa Mãr̰ĩ day di sabəw Jesu gwale nan̰ ɗang bi bow dəwə̂.
4 Me Pilad di urəw ɗang bi me wayəw ba da: «Mə̂ way gwale mən bə̂də̂ mo? Mə̂ doy gwale gə pad gə cendi bom dəmə̂ ta di bə̂də̂ mo?»
5 Me Jesu di asəgə gwale mən lə̂ diyə̂ bə̂də̂. Ər̰ə, Pilad cor ərəm gwale dusəwə̂ nan̰e.
Gə yə Jesu dara ꞌyaw
(Matiyə̂ 27.15-26; Luk 23.13-25; Jã 18.39–19.16)
6 Managə wala gənə̂ nare nə̂ Juwib day gaba ala sii ꞌywala gənə̂ kərara gə daa kwaynani-yə̂ da, Pilad to gər i gun gə dange mən daa baa baa, i gun gə dange gə nare di me ur ba gə gərnə̂w daa cendi.
7 Me wala gə ta-lə̂ da, abe mən gə gə ꞌogəw Barabas ilə̂ dange-yə̂ gə kwandaw mən. Cendi tanga swa gə gwale gə nare nə̂ Rom me ꞌyaa nəm gə gun.
8 Nare nə̂ gər̰e di so ha ɗəbə̂ bədang dənə̂ Pilad-lə̂ me urəw nəm an̰ju ba gərnə̂gə gun mən daa ya to an̰ju ba al nəm pii pii ta di de.
9 Mwom da, Pilad di cor urgə ba da: «Anə̂ ur ba nə̂ gərnə̂ng i dole gənə̂ Juwib day di daa mo?»
10 An̰ji urgə yande da, i dara an̰ji ꞌocn̰e com dara i gə dusi də halgəni me gechide nə̂nə̂ woni bwasa Mãr̰ĩ day di ba hara gə Jesu di ꞌyaw nəm gandəw.
11 Ər̰ə gechide nə̂nə̂ woni bwasa Mãr̰ĩ day di nogə nare nə̂ gər̰e di gəndə̂gə daa, dara cendi ba wayna daa, an̰ju ba gərnə̂ i Barabas daa an̰ju.
12 Me Pilad di urgə ɗang bi ba da: «Nə̂ alna i na gə an̰ju gə anə̂ ꞌogəw dole gənə̂ Juwib day di mo?»
13 Ɗang bi da, cendi sojə mar̰jagə daa nan̰ me way ba da: «Ɓengəw ɓabər̰əw daa habda gə dagəla səwə̂! Ɓengəw ɓabər̰əw daa habda gə dagəla səwə̂!»
14 Me Pilad di urgə bi: «Ɓag da, an̰ji al i na nə̂ acn̰e mo?» Kaw, cendi sojə mar̰jagə daa nan̰ nan̰ bi ba da: «Ɓengəw ɓabər̰əw daa habda gə dagəla səwə̂! Ɓengəw ɓabər̰əw daa habda gə dagəla səwə̂!»
15 Pilad di ur dara nare sədə̂gə ba ꞌywalnagəle mwom da, an̰ji gərgə Barabas daa, me Jesu da, an̰ji kal asəngar gobəw gə bər̰aw do me ꞌyagə gandəw dara ba hana ɓengənaw ɓabər̰anaw nəm daa habda gə dagəla səwə̂ di sən̰.
Asəngar al Jesu mə̂ng
(Matiyə̂ 27.27-31; Jã 19.2-3)
16 Ər̰ə nəma nə̂ asəngar di yə Jesu ha nəm kərə̂, i bədang dənə̂ Pilad-lə̂ di, me cendi ꞌwaga kwandagə asəngar nə̂ pad di lə̂.
17 Cendi diy gənin̰ dara ba gə al Jesu mə̂ng. Cendi hurə̂w barge gə kwamge səwə̂ ərməw ya dole de, me kuu jagwa də habde gangər̰agə nə̂ jimdi hurə̂w dəwə̂ me ca.
18 Mwom da, cendi ɗəbə ilə̂ alaw labiya ba da: «Nə̂ alamnin labiya, dole gənə̂ Juwib day!»
19 Me cendi gobə dəw gə dərwa me, ɓəsəbəw lade səwə̂ me, piy gubərə̂gə dodə̂ dərə̂wə̂ me, ajbə dərə̂gə dodə̂ sən̰a-lə̂ me ca.
20 Managə ba gə aləw mə̂ng di ꞌyen̰ bam ɗəm da, cendi n̰ər̰əw barge gə kwamge di bam səwə̂, me hurbə̂w barge duwa di səwə̂. Ər̰ə cendi dəm gandəw iche dara ɓengaw ɓabər̰aw daa habda gə dagəla səwə̂.
Gə ɓengə Jesu ɓabər̰əw daa habda gə dagəla səwə̂
(Matiyə̂ 27.32-44; Luk 23.26-43; Jã 19.17-27)
21 Managə cendi ilə̂ haragə-lə̂ da, cendi ɓamar gə abe mən gə ciri də gə ꞌogədə Siren. Abe di, gə ꞌogəw Simõ, i nə̂ Alegsandər day gə Rupu abragə. An̰ji swa i bam. Asəngar di yəw gə dwana ba unə̂ habda gə dagəla gənə̂ Jesu di.
22 Cendi ha gə Jesu managə mana mən gə gə ꞌogəw Golgota, gəndəw də biyə̂ ba i «mana gaba dii kungəng dəra».
23 Ər̰ə cendi al Jesu ba chana gani gənə̂ yabər̰a yaa duwa gə ɓaməw gə charwa də gə ꞌogədə miirdara ba chinə̂w wamani dodə̂, me an̰ji gən̰ chaa bam.
24 Ɗang da, asəngar di ɓengə Jesu ɓabər̰əw daa habda gə dagəla səwə̂. Me cendi lay barge duwa gobə gə jagi ba gə yə̂r nəm gaa i wi me ba ha wama barge duwa gə woy woy mo? Mwom da, i wi kaw lay barge duwa gə an̰ji wom baa baa.
25 I gə dawa dunamən gə jomni dəra managə gə ɓengəw ɓabər̰əw nəm daa habda gə dagəla səwə̂ di.
26 Gə jangə managə mani-yə̂ dara biyə̂ gə gwale gə gə bow dəwə̂ di gəndəw də gə ꞌyə̂w nəm ba da: Dole gənə̂ Juwib day.
27 Asəngar di ɓengədə ɓabər̰ə woni ꞌyaa mana sər daa habde nə̂ dagəla sədə̂gələ̂ Jesu tuləwə̂, gə mən əsə̂w gə abe-yə̂ me, gə mən əsə̂w gə jele-yə̂ me ca. [
28 I ya ta di me gwale gə gə jangəw managə Magtubu dənə̂ Mãr̰ĩ-yə̂ di yala alal kərab. Gə jangə ba da: «Gə asəw i managə nare woni ꞌyaa mana di dwar̰agələ̂.»]
29 Nare nə̂ jə̂ə̂gə lə̂ ta di, gəgədə dədə̂gə, me cadəbə Jesu ba da: «Cheye, i əjəm gaba waya ba mə̂ ha meyanda kulə gaba bwasa Mãr̰ĩ di bam me ba mə̂ ha cwara awaw daa gə wala subu dalawə̂ di bə̂də̂ mo?
30 Ladə, kədə səm dəma daa gə əsə̂m dəma əjəm gang, me chə dodə̂ habda gə dagəla di səwə̂.»
31 Gechide nə̂nə̂ woni bwasa Mãr̰ĩ day di me woni gələ̂ bii gə ꞌwoo gənə̂ Moyis duwa me di kaw aləw mə̂ng yande di dige dige me ca. Cendi wajə gwale bulə̂ day-ə̂ ba da: «An̰ji kədə̂ nare nə̂ ɗang daa me neyem kədə̂ səw duwa daa gang bə̂də̂ mo?
32 Dole gənə̂ nare nə̂ Israyel day gə Mãr̰ĩ biyə̂w gə Kris di, kal a chinə̂ dodə̂ caga ka habda gə dagəla di səwə̂ ɗəm. Də̂ yarnang yande do me də̂ harang kala dusərə̂ndə dəwə̂ sən̰.»
Me cendi nə̂ gə ɓengədəgə ɓabər̰əgə daa habde nə̂ dagəla sədə̂gələ̂ di kaw, cadəbəw me ca.
Made dənə̂ Jesu duwa
(Matiyə̂ 27.45-56; Luk 23.44-49; Jã 19.28-30)
33 Managə dawa ba də ɗəbə ciri dwar̰ə-lə̂ da, mana gədə changa kədab sən̰a gəndədələ̂ pad, bəraa dawa pagar nəm.
34 Ər̰ə managə dawa ba də pagar gə i dawa subu ɗəm da, Jesu soy mar̰jaw daa nan̰: «Elowi, Elowi, lema sabagtani?» Gəndəw də biyə̂ way i ba da: «Mãr̰ĩ ni, Mãr̰ĩ ni, dana me mə̂ gən̰ən bam mo?»
35 Nare ɗəbə lə̂ mana gə ta-lə̂ di doy, me nə̂ yab dwar̰agələ̂ way day ba da: «An̰ji ꞌogə i Eli.»
36 Ər̰ə gun day mən dwar̰agələ̂ wa gə gidi, gər ha laya mani nə̂ gə ꞌogəgə «epõjə» suw managə gani gə yale gənə̂ yabər̰a yaa duwa lə̂. Mwom da, an̰ji legər epõjə di managə dərwa bəwə̂ me gələw Jesu dara ba chichəmənə̂. Ər̰ə an̰ji gang way da: «Kalna jang, də̂ yarang sən̰ Eli di gaa haralə̂ biyə̂w chə̂w dodə̂ mo?»
37 Cor Jesu soy swaya gə geche mən me bəw som.
38 Mana gə ta-lə̂ da, barge gə geche gə gə jə̂w managə kulə gaba bwasa Mãr̰ĩ di dalawə̂ dara sabaw dodə̂ sər di chə̂wor dodə̂ korgin̰ sər ka me ka me, swa daa bəraa hara dodə̂ baj.
39 Asəngar nə̂ Rom geche day mən ɗəbə lə̂ Jesu di dərə̂wə̂ me yə̂r dara an̰ji mar made də ya ta de di mwom da, an̰ji way da: «I sədə, gun gə ta di i Mãr̰ĩ gorəndəw ꞌyang.»
40 Namde yab kaw ɗəbə hin̰ ilə̂ yara-lə̂. Namde nə̂ ta di dwar̰agələ̂ da, i nə̂ Mari də ciri dəra i Magədala, me Mari də nə̂ Jak gə gə ꞌogəw gə dwe di day gə chendəw gə Jose idə̂gə, me Salome me ca.
41 I cendi me pii pama Jesu tarəw me gaməw ladə managə an̰ji wara nəm wama gə Galile-yə̂ di. Namde nə̂ ɗang nan̰ nə̂ pii bwaw naga hara nəm managə Jursalem kaw, ilə̂ me ca.
Gə al Jesu kumbə duwa managə munə-lə̂
(Matiyə̂ 27.57-61; Luk 23.50-56; Jã 19.38-42)
42-43 Managə dawa ba də cor turgə da, Joseb gə ciri duwa i Arimate, hara. An̰ji i woni aa sariya nə̂nə̂ nare nə̂ Juwib gun day gə mən gə nare aləw horəmbə̂ nan̰e. An̰ji kaw ɓedə i wala gə Mãr̰ĩ ha lama gə dwãr̰ĩ duwa lə̂ di me ca. Caga da, wala gə ta di i wala gaba ɗangər̰a sii gə nare nə̂ Juwib ɗangər̰ə gə sədə̂gə dara sanga da, i wala day gaba bwa gwayni di. Mwom da, an̰ji yə səw abnani me ha ꞌywa Pilad me urəw dara ba kalnaw bərmə̂ baa u Jesu kumbə duwa.
44 Ər̰ə, Pilad di doy dara Jesu ba mar bam kalang ɗəm da, an̰ji ərəm gwale nan̰e. An̰ji ꞌwaga asəngar nə̂ Rom geche day di me urəw, Jesu di ba mar i ɓəgəden̰ mo?
45 Me managə asəngar nə̂ Rom geche day di cow lə̂ diyə̂ ba an̰ji ba mare ɗəm da, Pilad kaləw Joseb bərmə̂ ba unə̂ Jesu kumbə duwa di.
46 Ər̰ə Joseb ha kələ̂ bagəda, me biyə̂ Jesu kumbə duwa managə habda gə dagəla səwə̂ dodə̂ me, legərəw daa me asəw nəm managə munə gə gə poləw managə kur̰a dwar̰ə-lə̂. Targin̰ ɗang da, an̰ji nongər̰ə kur̰a də geche ɗesə gə munə di bəw daa.
47 Me Mari də ciri dəra i Magədala me, Mari də Jose iw me, yə̂r mana gə gə al gə kumbə dənə̂ Jesu lə̂ di.