Barweet nyēē /kikēēsirchi
Iburaneek
Taayta
Siriintēēt, yēē /kikēēsirē āk wōlēē /kikēēsirēē: Mēēnkētāktōōs ꞉chiichēē kisirē barwaani nteenee isōōtē ꞉biiko wōlēē wōō kule kisirē ꞉Ābōōlō. /Kēētwēchē mbo nkinee Barnaaba āk alak chēē chaang'. Nteenee /kikiiyēnchinē kung'eetee kēnyiitaab 400 ākoy nyēbo 1600 KK, kule Bāwulō ꞉nyēē kisirē barwaaniitēnyi. /Kikēēsirē kumanaaserwet ꞉Yēērusālēēm ām kēnyiitaab 70 KK, kuuyu kitākumiitē ꞉biiko kuyēyēē kōrōsēēk Kōōtaab Yēyiin. Nteenee kuuyu kibo ꞉kōrōsēēchoo bēsyōōsyēkaab kiirootyeet nyēbo kēny, māchē ꞉siriintooni kule kubēk ꞉ng'aleechaa ām lēēkitō (kur. 8:13).
Kiyēē mii āriit āk nyēē āmu: Bo koomānuut ꞉barwaani ām Kiirootyeet nyēē Lēēl. /Kikēēsirchinē biikaab Kiriistō choo kiinkētē kiruutēk āk ātēbuutēkaab Yuutayeek /ānkikēētākyinē miisin biikaab Kiriistō choo ki Yuutayeek. Kimāchē ꞉bichu ām keel ake kōōyēēchi ntāsimuutēkaab Yuutayeek. Ibānyboonyē ꞉siriintēēt komoswookik chēē chaang' chēē i-ārōōru kule kiikookeer ꞉kiirootyeet nyoo lēēl kiirootyeet nyoo bo kēny. Ibooru mbo kule kichokootyiich ꞉Yēēsu wōōrkooyoontiit tukul āk tukuuk tukul choo kiwuu kitōōntōyēēn. I-ārōōru ꞉komosta nyēbo taay kurubta keey Yēēsu āk malayikaanik. Kikoonyitē ꞉Yuutayeek choo kikiikoonkwel keey (Farisaayeek) malayikaanik miisin, nteenee wōō ꞉Yēēsu kusiir malayikaanichaa. Wōō mbo subak ꞉Yēēsu kusiir Muusa nyoo ki kāāntōōyiin nyēbo kwōng'uut ām bēsyōōsyēk choo kibo kiirootyeet nyoo bo kēny anku inee ꞉nyoo kiityooktēē Yuutayeek motwoornātēētaab Miisir. Kibkōrōs nyēē wōō ꞉Yēēsu nteenee ām kēēlto nyēē teer ām wōlēē mii ꞉mbo kibkōrōs choo wōōyēch chēbo kēny. Kichokutoow ꞉Yēēsu bēēlsēētaab kōrōsēēk ām kēēlto nyēē lēēl ānku inee ꞉kibkōrōs nyēē wōō kuchōōnēē barak ānkuwēētii kibchuulyo. /Kikiikeeree kōrōsēēk tukul choo kibo kēny choo /kikēēyēyē kēnyiit ake tukul kōrōsyoontēēt akeenke, nto nyooto ku Yēēsu nkityōōniin. Kichokutoow mbo subak ꞉Yēēsu kiirootyeet nyēē lēēl āk biiko tukul ām kōōrēēt kusiir kiirootyeet nyoo bo kēny nyoo /kikēēyēyēē Tulwēētaab Sinaay. Ng'ooraat ꞉kiirootyaani lēēl ām komoswookik chēē chaang' chēbo kiirootyeet nyoo bo kēny. Nyēē tookunoot miisin ku nyēbo Cheremnyaa 33:31-34 nyēē twekaat ām barwaani bo Iburaneek 8:8-12.
Ikwēnyē ꞉siriintēēt ām kurkeetaab 11 āk 12, biiko chēē kitookunootiin ām soboontaab biikaab Isrāyēēl ānkōōbooru kule icheek ꞉chēē kikiikunam ng'aleekaab kāāyēnēēt. Itēryēēchēē ꞉barwaani kāā-āmiisēēt nyēē mwooyē kule, “Okany kiirōōtootē Yēēsu nyoo intōōwēēch kiikaasee keey Yēyiin. Tāsē taay ꞉inee kōōtitiirēēch ākoy tabanta.” (Kur. 12:2)
1
King'āloolwēēch ꞉Yēyiin kubununēē lakwanyii
1 King'āloolchinē ꞉Yēyiin kēny mbo kuuko areet chēē chaang' ām kēēlwookik chēē chaang' kubununēē *wōōrkooyikyii,
2 nteenee ām bēsyōōsyēchu bo lēt king'āloolwēēch kubununēē lakwanyii nyēē kiikurōōbchi kiy ake tukul. Lakwanaata ꞉nyēē kiyēyēē ꞉inee kōōrēēt barak āk ng'wēny.
3 Kēēkāsēē lakwanaa wōōyintaab Yēyiin. Inee ꞉nyooto kerkeey Yēyiin bakeenke ānkubāwu kōōrēēt barak āk ng'wēny ām kāāmuukēywēēkaab ng'ālyoontēēnyii. Yu kāwokume sukōōtiliil biiko ām choolwookātēēng'waa, kuwēēchi keey kibkōōnkōy wokutēbunēē āwutaab taay nyēbo Yēyiin nyoo bāwu kiy ake tukul.
Wōō ꞉Yēēsu kusiir malayikaanik
4 /Kikeeyey lakwanaa kunyōōr wōōyinto kusiir malayikaanik. /Kēēkuurē inee kule Lakwataab Yēyiin, kaayna nyēē wōō kusiir nyēbo malayikaanik.
5 Ara, *malayikeet nkōnō ꞉nyēē kiikumwoochi ꞉Yēyiin kule,
“Inyiing' lakwanyuu!
Kāāyēku ra kōōn.”?
Mānāāmwooy yēēt ake ꞉Yēyiin kurubta keey malayikeet kule,
“+Māāyēku kwaan
ānkuyēk lakwanyuu.”
6 Nto subak yu kēēyook ꞉Yēyiin lakwanyii kibooreet kuchō kōōrooni, kimwooy kurubta keey lakwanaa kule,
“Kukutunkyi ꞉malayikaanik tukul inee.”
7 Kurubta keey āk malayikaanik /kikēēmwooy kule,
“Kiiyookiintēētaab Yēyiin mbo ꞉wusōōnēēt
ānku motwooriintēēnyii ꞉nkinee iileet.”
8 Nto kurubta keey āk Lakwataab Yēyiin /kēēmwooyē kule,
“Wēētii ꞉bāytooyiisyēēng'uung' ākookoy ōō, Yēyiin!
Ibāytēē ꞉inyiing' biikuuk manta.
9 Ichāmē ꞉inyiing' kiyēē bo man,
‑āmēēriiku ng'al chēbo rōkōs.
Kiyooto ꞉nyēē kiyey Yēyiin kung'aabing',
ānkukōōning' ng'erekweek kusiir bāytooyiin ake tukul.”
10 /Kikēēmwooy subak kule,
“Ām taayta, 'kiiyey ꞉inyiing' Mokoryoontēēt kōōrēēt wōlēēb ng'wēny
ankiiyey nkinee wōliin bo barak.
11 Mākubot ꞉barak āk ng'wēny,
nteenee imiitē ꞉inyiing' ākookoy.
12 +Mākung'ētyo kuu sira nyēē yoos
ankiimaman kuu kōōtiit nyēē kibsānkāti
nto yityo ikeeree alak chēē leelach.
Nteenee inyiing' ku nyooto bo kwaak
nyēē mākoy iyoosiitu bēsyēēt ake.”
13 Ara malayikeet nkōnō ꞉nyēē kiikumwoochi ꞉Yēyiin kule,
“Ibuurunēē āwunyuu nyēbo taay
ākoy yoo kaayeyiing' itēbēē buunikuuk.”?
14 Ng'oo ꞉malayikaanik nanyuun? Icheek ku tāmirmirook choo iyooktooy ꞉Yēyiin ānkuyēētyēēchinē biiko choo mii /bokiirāroochē.