A brifi di
Yakobus
skrifi
Wan wortu na fesi
Yakobus ben de wan brada fu Masra Yesus. A ben de wan fu den tiriman fu a gemeente na Yerusalem. A pisten dati ben tranga gi furu Kristensma bika sma ben de nomo na den baka fu du den ogri. Fu dat'ede Yakobus skrifi a brifi disi gi den Dyu na ala sei di teki bribi, nanga ala tra Kristensma. Yakobus ben e broko en ede fu sabi fa a ben e go nanga den bribisma di ben e nyan ala sortu pina a pisten dati. A skrifi a brifi disi fu sori tak' takrufasi no bun, èn fu sori tu fa wan Kristensma mus tyari ensrefi dya na grontapu.
San de ini a buku disi:
A libi san abi warti gi Gado (1:1-27)
Bribi nanga lobi (2:1-26)
A krakti fu a tongo nanga a koni di e kmopo fu Gado (3:1-18)
Yakobus e warskow den sma (4:1 – 5:6)
Fa bribisma mus libi nanga makandra (5:7-20)
1
Odi
1 Gi den twarfu lo fu den Dyu di panya na heri grontapu,
Disi na wan brifi fu Yakobus, wan knekti fu Gado nanga Yesus Kristus. Mi e bari un odi.
Fa fu du te tesi e miti unu
2 Brada nanga sisa, un mus si en leki wan prisiri sani te ala sortu tesi e miti unu.
3 Bika un sabi tak' efu a bribi fu unu e psa a tesi, un o man hori doro.
4 Ma un mus tan hori doro te leki un kon de soleki fa Gado wani tak' un mus de. Dan sma no o abi no wan enkri sani fu taki na un tapu, èn noti no o mankeri na unu.
5 Efu wan fu unu no abi nofo koni, dan a mus begi Gado fu A gi en. Bika Gado e gi ala sma sondro fu hori wan sani na baka, èn sondro fu taki na den tapu.
6 Ma a sma mus begi nanga bribi. A no mus begi nanga tu ati. Bika efu a e du dati, dan a de leki wan skwala fu a se di winti e seki go seki kon.
7 Sowan sma no mus prakseri tak' Masra o gi en wan sani.
8 Bika a e kenki prakseri ala leisi. Tide a wani du so, tamara a wani du dati.
Pôtisma nanga gudusma
9 Wan pôti bribisma mus prisiri tak' a abi wan hei presi ini Gado ai.
10 Ma wan gudu bribisma mus prisiri tak' Gado gi en wan lagi presi. Bika neleki fa bromki na sei pasi de fu wan syatu pisten nomo, na so en srefi de fu wan syatu pisten tu.
11 Te a son kon faya, a e bron a bromki. A bromki e drei gwe, a e fadon, èn noti no de fu si moro fu a moi fu en. So a de tu nanga a guduman. Ini a wroko di a e wroko, a e dede.
Takru lostu na a m'ma fu sondu
12 Blesi de tapu a sma di e tan hori doro te tesi miti en. Bika te a psa den tesi, Gado o gi en a libi fu têgo leki wan grani. Gado pramisi ala sma di lobi En a sani disi.
13 Te wan sma e psa wan tesi, a no mus taki: “Na Gado poti mi ini a tesi disi.” Bika soleki fa ogri no man tesi Gado, na so Gado no e tyari sma kon na ini tesi.
14 Ma te wan sma e psa wan tesi, dan a de so tak' den takru lostu fu en e kari en, den e hari en.
15 Dan te a gi ensrefi abra na den takru lostu disi, den e meki wan sondu. Te a sondu disi kon gro kba, a e tyari dede kon.
16 Lobi brada nanga sisa, no meki sma kori unu.
17 Ala sani di bun èn di no e mankeri noti, e kmopo na loktu fu Gado a P'pa di meki a son, a munkenki nanga den stari. Gado no e kenki, A faya fu En no e kenki kon dungru.
18 Gado ben teki a besroiti fu meki un kon sabi a tru boskopu, fu un kon kisi a nyun libi. Disi meki tak' wi teki a fosi presi na mindri fu ala sani di A meki.
Arkiman noso duman
19 Mi lobi brada nanga sisa, disi na wan sani san un mus sabi: Ibri sma mus gaw fu yere, ma a no mus gaw fu taki èn a no mus gaw fu kisi atibron.
20 Bika wan sma di kisi atibron, no e du san bun ini Gado ai.
21 Dat' meki un mus poti ala doti fasi nanga ala takru fasi fu libi na wan sei. Nanga sakafasi un mus teki a boskopu di Gado poti ini un ati, a boskopu di kan ferlusu un sili.
22 Un no mus arki wawan san Gadowortu e taki, ma un mus du en tu. Noso un e kori unsrefi.
23 Bika a sma di e arki a wortu, ma a no e du san a wortu e taki, gersi wan man di e luku ini wan spikri fu si fa en eigi fesi tan.
24 Di a du dati, a gwe, èn a srefi momenti a fergiti fa en fesi tan.
25 Ma blesi de tapu a sma di e tan ondrosuku a boskopu fu Gado di no abi fowtu èn di e meki sma kon fri. Gado o blesi en ini den sani san a e du efu a no fergiti san a yere, ma a e du san a boskopu e taki.
26 Efu wan sma prakseri tak' a e dini Gado, ma en mofo e tak'tak' sani, dan a e kori ensrefi. A dini san a e dini Gado no abi warti.
27 A soifri fasi fu dini Gado a P'pa sondro fowtu, na te yu e yepi sma ini den nowtu, soleki pikin di no abi m'ma nanga p'pa moro, uma di masra dede kba, nanga te yu e sorgu tak' yu no e du den ogri sani san den sma fu grontapu e du.