4
Didibri tesi Yesus
Markus 1:12-13; Lukas 4:1-13
1 Baka dati a Santa Yeye tyari Yesus go na ini a dreisabana fu didibri tesi En.
2 Yesus tan drape fotenti dei nanga fotenti neti sondro fu nyan. Baka dati angri bigin kiri En.
3 Dan didibri go tesi Yesus. A taigi En taki: “Efu Yu na a Manpikin fu Gado, taigi den ston disi fu den tron brede.”
4 Ma Yesus piki en taki: “A skrifi taki:
Wan sma no sa libi
fu brede wawan,
ma fu ala wortu di Gado e taki.”
5 Baka dati didibri tyari Yesus go na a santa foto Yerusalem, dan a poti En tnapu na a lantyi fu a daki fu a mamakerki fu den Dyu.
6 A taigi En taki: “Efu Yu na a Manpikin fu Gado, trowe Yusrefi go na gron. Bika a skrifi taki:
Gado sa seni den engel fu En
fu tyari Yu na tapu den anu,
fu Yu no stotu Yu futu
na wan ston.”
7 Ma Yesus piki en taki: “A skrifi tu taki: Yu no mus tesi Masra yu Gado.”
8 Te fu kba didibri tyari Yesus go tapu wan bun hei bergi. A sori En ala den kondre fu grontapu, nanga a gudu fu den.
9 Dan a taigi En taki: “Mi sa gi Yu ala den sani dati, efu Yu fadon tapu Yu kindi fu anbegi mi.”
10 Ne Yesus piki en taki: “Kmoto na Mi tapu, Satan! Bika a skrifi taki:
Yu mus anbegi Masra yu Gado,
èn na En wawan yu mus dini.”
11 So didibri gwe libi Yesus. Ne engel kon sorgu gi En.
Yesus bigin nanga En wroko
12 Di Yesus yere tak' den poti Yohanes a Dopuman na ini straf'oso, A go na a distrikti Galilea.
13 A no tan ini Nasaret, ma A go libi ini Kafarnaum di ben de sei a Meer fu Galilea, ini a kontren fu den bakapikin fu Sebulon nanga Naftali.
14 Na so a sani san a profeiti Yesaya ben taki kon tru.
15 A ben taki:
Un arki,
sma fu Sebulon nanga Naftali,
di e libi na a pasi di e go na se,
ini a kontren di de na a tra sei
fu a Yordanliba,
un sma fu Galilea,
pe furu sma e tan di no de Dyu:
16 Unu di e libi na ini dungru,
si wan bigi faya.
Unu di e libi ini a kondre
pe un de fu dede,
wan faya opo kon gi unu.
17 Bigin fu a ten dati, Yesus bigin taigi den sma taki: “Un drai un libi, bika her'esi Gado o bigin tiri libisma.”
Den fosi man di bigin teki leri fu Yesus
Markus 1:16-20
18 Di Yesus ben e waka na a syoro fu a Meer fu Galilea, A si tu fis'man di ben e fisi nanga den tyasneti. Den tu man disi ben de brada. A wan ben nen Simon, di den sma ben e kari Petrus, èn a trawan ben nen Andreas.
19 Yesus taigi den taki: “Un kon waka nanga Mi, dan Mi o meki un tron fis'man fu libisma.”
20 Wantron den man poti den tyasneti na wan sei, dan den bigin waka na Yesus baka.
21 Di den waka pikinso moro fara, Yesus si tu tra brada, Yakobus nanga Yohanes. Den ben de ini wan boto nanga den p'pa Sebedeus e lapu den tyasneti. Dan Yesus kari den.
22 Wantron den libi a boto nanga den p'pa, dan den bigin waka na Yesus baka.
Yesus bigin leri den sma
23 Yesus waka ini heri Galilea, èn A gi den sma leri ini den Dyukerki. A ferteri den sma a Bun Nyunsu tak' Gado o bigin tiri libisma, èn A dresi ala sortu siki di den sma ben abi.
24 Dan a nyunsu fu Yesus panya go te na ini heri Siriakondre. So den tyari ala sma di ben siki tranga kon na Yesus: sma nanga ala sortu siki nanga hebi skin-ati, sma nanga takruyeye na den tapu, nanga sma di ben e kisi stoipi. Srefi sma di ben lan den ben tyari kon na Yesus. Dan Yesus meki ala den sma dati kon betre.
25 Bun furu sma ben e waka na Yesus baka: sma fu Galilea, sma fu Dekapolis, sma fu Yerusalem, sma fu Yudea, nanga sma fu a tra sei fu a Yordanliba.