3
Jesús quia rei ɨ tuchɨ Moisés sɨ
1 Seresenda, Dios que jemɨɨ ɨcúe umbaerã tuchɨ ra. Nyebe aɨco nguiã ñee tuchɨ Jesucristo rɨɨ̃ jẽje co. Secheẽ ndese jenyiisaquia tuchɨ quiatu quia. Jesucristo rei nandererecua tuchɨ cote. Sacerdote rerecua rã tuchɨ nande je cote.
2 Jesucristo que Dios cheẽ mumbayã tuchɨ quia mbae raã ja echeẽ nguire ra. Sã Moisés abe mbae raã ja Dios cheẽ nguire no.
3 Jesús quia rei ɨ tuchɨ Moisés sɨ. Ae que Moisés chao ra. Sã emo ndiqui tuchua ao no. Tuchua aosa quia rei ɨ tuchɨ tuchua uchɨao sɨ.
4 Mbia mo tuchua chao arondete raque. Dios mɨɨ nguia rei mbae ao ja tuchɨ.
5 Moisés que Dios cheẽ mumba eãte rei quia ra. Erimbachõ ño ngue ae ra. —Ã nda Dios saã je mbia je, ɨ chõ ngue Moisés quia ra.
6 Cristo quia rei ɨ tuchɨ Moisés sɨ. Ae quia rei Dios riirĩ tuchɨ. Dios chuchua rerecua tuchɨ chõ ae re. Nande rei Dios chuchua. Ae quia siqui nguiã nandechɨangui re co. Nandeɨco beɨ mose ndua erese. Nandeya beɨ nandeɨco mose abe erese.
Dios quiato ra uquenea ucua nyoɨ Dios récuaa
7 Jesús quia ɨ tuchɨ re. Nyebe Espíritu Turã ndiqui nguiã ñee nande je ã:
Dios cheẽ jeñandu rã namo.
8 Jeñɨa ãtãte ra jẽɨngochɨ̃ jẽ.
Sã cose ndare chɨã ãtã mbeɨte riqui Dios cheẽ andu sereã turúquiaa eɨco mose no.
Ũquɨ̃ ɨcuãte que eriqui Dios je ra.
Dios que ñɨmbirãcuã ñote quia ee ra.
9 Dios que siqui minguete quia ũquɨ̃ mbia je ra.
Cuarenta años chee que ra.
Mbia mae sayã ngue esaã saã mbeɨ quia ee ra.
“Ma Dios siqui minguete nande je”, ɨ rei que mbia jenameɨ nguia cose ra.
10 Nyebe Dios paama ɨ nguiã ñee ee.
“Siqui ɨcuã mbeɨte equia uchɨangui re ã. Siqui sereãte equia seɨcha ruɨ ã.
11 Aɨco paama ɨte ee co.
Uquenea nda eucua eã mbeɨ nyoɨ serécuaa”, ɨ tuchɨ que Dios erɨɨ̃ nda,
ɨ que Espíritu Turã ñee embesa ji huɨ̃ nda.
12 Cochee chõ jẽɨngo, Seresenda. Jẽɨcha eã sacuã Dios reco sɨ jeñɨangui re. Dios jẽɨcua beɨ sacuã jeñɨangui re no.
13 —Nandeɨco ɨ ɨ tuchɨ quiatu quia Dios rese, jenye jenye beɨ quiatu quia jenyue. Jendeco mose íbii. Ɨ̃ nda mbae ɨcuã jembɨɨrɨ̃ ɨrɨ̃ eã. Ɨ̃ nda jẽteã teã eã Dios cheẽ je no.
14 Sã nande Cristo nandeɨcua raque nyii no, eɨ̃ nande beɨ chõ nguia eɨcua ɨ ɨ. Ũquɨ̃ mose ra Cristo resenda tuchɨ nande cote.
15 Sã embesa ji riqui ñee ã no:
Dios cheẽ jeñandu rã namo.
Jeñɨa ãtãte ra jẽɨngochɨ̃ jẽ.
Sã cose ndare chɨã ãtã mbeɨte riqui Dios cheẽ andu sereã turúquiaa eɨco mose no,
ɨ que embesa ji ra.
16 ¿Aba chõ Dios cheẽ ñandu sereã eandure cose chã? Ae Moisés querao Egipto sɨ nae, ũquɨ̃ ño ngue resẽ.
17 ¿Aba je chõ Dios paama ɨ cuarenta años cose chã? Ae mbae ɨcuã saã saã nae, ũquɨ̃ ño ngue resẽ. Nyebe mano mano nguiã turúquiaa.
18 ¿Aba je chõ Dios ñee tuchɨ chã? —Jenguenea nda jẽucuayã mbeɨ oso serécuaa, ɨ chã. Ae echeẽ mumba quia nae, ũquɨ̃ je chõ ngue re.
19 Nyebe ngasẽ eã nguiã Dios récuaa. Dios ɨcua eãte quiatu ngue re.