HIBRU
Zu mbal tuku waŋe
Gabat ande nu Zu mbal afu Yesus tuku son ŋginaig ta nane tuku waŋe kuyarna te tugunu teŋenmba.
Zu mbal afu Yesus tuku kume tuku saŋgri tomba tiŋginaig sulumba naŋgine tukul maŋau ambokok kusrekinaig. Kusrekinaig ta naŋgine mbal afuŋge piti serniŋginaig le nane maŋ tukul kame ta dubikinaig. Taŋanaig le Yesus dubiwanu gabat andeŋge waŋe te nane tuku wamdus te-tiwam tuku kuyarna.
Yesus nu ambokok maŋau ŋakmba kumumba maŋau kitek te-mayokna. Nu kumna sulumba nuŋe ndarembi sine muskil nduiye kile-tidiŋga siŋgine pris gabat suŋgo minit. Ta tuku nane maŋau ambokok saŋgri kugatok ta nduiye kusreka Yesus ndo dubiwaig ŋga nu waŋe te kuyarna.
1
Kuate tuku Kiŋo nu eŋel kame liniŋmba o mbolŋge minit
1 O buk Kuate nu maŋau kise kisembi nuŋe pasa tugusek tuan taŋgo tuku miŋge mbolŋge kile-mayokka minanu le sine tuku wa mbuŋ kame nane isanu.
2 Ismba minnaig le ma ma kugawam tuku ait te mbolŋge nu nuŋe Kiŋo nuŋe mbolŋge nuŋe pasa te-mayokmba sasiŋgina. Agaŋ ndende ŋakmba nu wai mbolŋge patikam tuku nu Kiŋo nuŋe pilna. Tugu mbolŋge Kuate nu sakina le Kiŋo nuŋeŋge kilke te te-mayokna.
3 Kuate tuku kilŋa nu minit tuku maŋau ŋakmba nuŋe Kiŋo nuŋe mbolŋge minig le kaŋgerkeg. Nale ndindo minik. Kiŋo nuŋeŋge pasa saŋgrinu sakate le agaŋ ndende ŋakmba naŋgine ma mbolŋge minmba kumumbi piroka minmba minig. Nuŋe Kiŋo taŋge taŋgo tuku une sauke suluna sulumba Kuate Suŋgo Ndindo nu tuku ndinam kumamŋge samba mbolŋge minyokina.
4 Taŋana le Kuate nuŋe Kiŋo nyu suŋgo te-mayokna le nu tuku nyu taŋge eŋel tuku nyu liniŋgina. Ta tuku nu nuŋe miroŋ mata eŋel kame ŋakmba liniŋgina.
5 Kuate nu nuŋe Kiŋo ta teŋenmba sana.
Ne ye tuku Kiŋo. Kite ye ne tuku Mam mayok kinet ŋgina. Mune 2.7
Kuate nu eŋel ande taŋamba sa ndana. Nu maŋ nuŋe Kiŋo sana:
Ye ne tuku Mam mayok kaŋgit.
Ne ye tuku Kiŋo minamŋgat ŋga sana. 2 Samuel 7.14
Nu eŋel ande taŋamba sa ndana.
6 Kuate nuŋe Kiŋo mulum kilke te mbolŋge te-mayokam bafuna sulumba nu nuŋe Kiŋo nuŋe tuku teŋenmba sakina.
Yiŋe eŋel kame, tane nu tuku nyu te-duŋga nu mbariŋap ŋgina. Lo 32.43
7 Kuate nu nuŋe eŋel kame tuku teŋenmba sakina.
Yiŋe eŋel kame nane bubre taŋaŋ kile-mayokket.
Yiŋe kukul mbal pa mane taŋaŋ kile-mayokket ŋgina. Mune 104.44
8 Nu nuŋe Kiŋo tuku pasa teŋenmba sakina.
Ne Kuate. Ne nyu suŋgo ŋak naŋe mbal kulatka minmba minamŋgat. Kugawe nda.
Ne kumumbi naŋe gageu kulatkate.
9 Ne maŋau tiŋreknu ndo nzalinu ne maŋau ŋaigonu ŋakmba mbulmba pitaikate.
Ta tuku ye ne tuku Mbara naŋe mbal ŋgamukŋge ne suŋgomba make pilmba nyu suŋgo tinmba gare tinen ŋgina. Mune 45.6
10 Kuate nu nuŋe Kiŋo tuku maŋ teŋenmba sakina.
Suŋgo, ne tugu mbolŋge kilke te-mayokna.
Ne naŋe wai kuyarmbi samba pilna.
11 Kilke samba ŋgisikamŋgaik ta ne taŋawe nda.
Ne minmba minamŋgat.
Kilke samba tawi taŋaŋ urfu patika ŋaigoŋgamŋgaik.
12 Taŋawaik le taŋgo nu tawi tumba filfilte taŋamba ne samba kilke filfilmba kile-sikamŋgat.
Nane tawi abonu kilmba tiŋgig taŋaŋ ne samba kilke urfunu kile-sika maŋ abonu kile-mayokkamŋgat.
Neŋge ndo mbilka kisemba mayok kine nda.
Ne tuku yar mata kugawe nda. Ne minmba minamŋgat ŋgina. Mune 102.25
13 Kuate nu maŋ lato nuŋe Kiŋo sana:
Ne ye tuku ndinam kumam teŋge saŋgri ŋak minyok mina le ma ma yeŋge ne tuku ŋgueu mbal ŋakmba kile-ibeŋka ne tuku kupe kumnemŋge patikamŋgit ŋgina. Mune 110.1
Nu eŋel ande pasa ta sa ndana.
14 Eŋel kame nane Kuate tuku pasa dubide tuku guwa ndo. Sine afu Kuateŋge muskil kile-tidiŋgam tuku mineg mbal nu nane kukulniŋgit le pro sine tursiŋgig.