Su Guna nek Sulat neg buwat ni
San Pedro
Pesi'una
Su guna nek sulat neg buwat ni Pedro sinulat para se nga Christian ned dini tinawag “ne ngak pimili' ned Diwata” neng migbelagbelag sed dapit seg amihanan seg Asia Minor. Su gembagel ne ketuyu'an sek sulat keni giin suk pegulikseg ri se ngang membebasa neng migatubang se ngak pedlutus bu' pegantus tendeng sek pektu'u nilan. Binaal ini seng miksulat pebiyan sek pekperelendem ri se ngang membebasa ri seng Melengas ne Gesuyen metendeng ri ni Jesus Christ ne su kemetainen, peketubu'en puli', bu' suk saaren sek pekpuli' migbegay ri senilan nek pedderama. Tendeng run nini, kina'enlan ned duwaten nilan bu' entusen su ngak pegentusen duma sek peksalig nek sala ini sek pegindan se ketuud sek pektu'u nilan bu' gentiyan ilan se “Gendaw ne mperayag na si Jesus Christ.”
Duma sek peguliksegen sek panahun se keliseran, sung miksulat miktalu' rema ri se ngang membebasaan sek pedleketubu' gisip nga getawan ni Christ.
Ngang Misulat ri sek Sulat keni
I. Pesi'una 1.1-2
II. Su Gembagel nek Pedderama 1.3-12
III. Suk Pedleketubu' neg Bala'an 1.13-25
IV. Suk Tetubu' neg Batu bu' sug Bala'an neng Nasud 2.1-10
V. Su nga Gulipen ned Diwata 2.11-17
VI. Su Dlendasan sek Pegantus ni Christ 2.18-25
VII. Su ngak Sawa bu' ngag Bana 3.1-7
VIII. Suk Pegantus para sek Pegbaal neng Metareng 3.8-22
IX. Nga Ketubu' neng Mi'eseb 4.1-6
X. Su ngang Melengas nek Piniyalan seg Begay ned Diwata 4.7-11
XI. Suk Pegantus tendeng sek PekeChristian 4.12-19
XII. Su nga Getawan ned Diwata 5.1-11
XIII. Su Ketapusan ne ngak Pengumusta 5.12-14
1
1 Seniyu ne nga getaw nek pimili' ned Diwata,
Gaku' si Pedro ne gapustulis ni Jesus Christ. Pinuwitan'u amu sek sulat keni, gamu ne ngang mingkengelan gisip tuwa' bu' mibuwagsa tu se ngak Probinsiya nek Ponto, Galacia, Capadocia, Asia, bu' seg Bitinia.
2 Ay pimili' amu sumala' se ketuyu'an ned Diwata ne Gama' gatad pa nud diin bu' binaal neg bala'an ne nga getawan pebiyan se Gispiritu Santu arun mektuman amu riin ni Jesus Christ bu' milimpiyu pebiyan ri sed dugu'en.
Na, me'angken siya niyu sud dugang pa gaid ne kepiya bu' kelinaw.
Su Gembagel nek Pedderama
3 Na, pesalamatan ta sud Diwata ne giin sud Diwata bu' Gama' ne Ginu'u ta ne si Jesus Christ! Tendeng se gembagel ne dlelaaten, binegayaan ita neg begu ne ketubu' pebiyan sek pekpetubu'en puli' riin ni Jesus Christ buwat se kemetain. Pebiyan seg begu ne ketubu', giin nini sung migbegay ri senita sek siguru nek pedderama,
4 suk pedderama neng me'angken ta ne ginipes para seniyu ritu se dlangit ne ndi' melunut, ndi' mbulingan, bu' ndi' me'alep.
5 Pebiyan sek peksalig niyu, pineliperan amu se ga'em ned Diwata para se keluwasan ne ginandam na ne mperayag se ketapusan nek panahun.
6 Pedleliyag amu metendeng run nini, isan pesi' nemuun kina'enlan neng megu'ul amu sek sereluk tendeng seng medlainlain ne ngak pengindan ne gentusen niyu.
7 Su ketuyu'an run nini giin suk pekpemetuud ne suk pektu'u niyu metuud. Sug bulawan, isan pa medlaat ini, inindanan se gapuy. Suk pektu'u niyu melaga' pa kampuun sinangkali' seg bulawan bu' kina'enlan indanan arun mpemetuuran neng metuud ini. Mbuus siya'en amu, pesiddengegan amu, bu' pegbesaan amu se Gendaw ne mperayag na si Jesus Christ.
8 Pinetail niyu giin isan nda' niyu giin mayan me'ita'. Miktu'u amu ri seniin isan nda' na niyu giin me'ita' nemuun. Aas pidleliyag amu gupiya se dleliyag ne ndi' metekad
9 tendeng ay mikerawat amu na se kelebu'an nek pektu'u niyu ri seniin ne giin su keluwasan niyu.
10 Metendeng se keluwasan keni, sinusi gupiya bu' sinaak nu ngak propeta. Gilan sung mingatuk metendeng se keluwasan keni neg binegay ned Diwata riin seniyu.
11 Minantu ilan neng mesuunan nanu bu' pegendun run nini sek peketuman. Giin itu suk panahun nek pisuun ne Gispiritu ni Christ ri senilan metendeng se ngak pegantus ne entusen ni Christ bu' suk pesiddengeg neng meksunud.
12 Pirayag ned Diwata tu se ngak propeta ketu ne sug binaal nilan gena' para se gegulingen nilan bu' ndi' para seniyu. Giin nini su ngag betang neng mirengeg niyu nemuun buwat se ngang mengwawali seng Melengas ne Gesuyen pebiyan ri se Gispiritu Santu nek sinugu' buwat se dlangit. Ngag betang keni liyagan rema mesabut ne ngag anghel.
Suk Pegenggat sek Pedleketubu' neg Bala'an
13 Aas andam niyu rayun su nga gena'ena' niyu. Pegengay niyu su gegulingen niyu, bu' seligay niyu gupiya su kepiya neg binegay riin seniyu se gemperayag na si Jesus Christ.
14 Pengmetinumanen amu tu sed Diwata bu' ndi' niyu ilingay suk pedleketubu' niyu se ngak tinguha' neng midlega'em ri seniyu ne genda'ik sinuunaan riin seng Melengas ne Gesuyen metendeng ri ni Jesus Christ.
15 Tumu', pedleketubu' amu neg bala'an ri se dlaun neg baalen niyu maa' ned Diwata neng miktawag ri seniyu neg bala'an.
16 Ay tinalu' ri se Kesulatan, “Pegbala'an amu ay gaku' bala'an ma.”
17 Sinabi niyu sud Diwata ne Gama' seng megampu' amu tu seniin. Aas tendeng ay megukum sud Diwata tu se dlaun ne nga getaw ne genda'irunik pekpelabun sumala' ri sek pimbaal se kada sala, medleketubu' amu rayun ri seg benwa ned duunik pektamed ri seniin.
18 Misuunan rema niyu neg bineyaran amu na arun duuni kegewasan niyu buwat sek pedleketubu' ne genda'irunik paluun neng mipenunud niyu se nga gepu'an niyu. Su dlinekat ri seniyu gena' ne ngag betang neng merala' maa' nek selapi' awas bulawan,
19 bu' ndi' pebiyan seng melaga' ned dugu' ni Christ, neng maa' neng nati ne karniru ne nda'irun gairing melaat bu' buling ri se dlawasen.
20 Pinili' giin ned Diwata se genda' pa baalay sug benwa bu' pirayag ned Diwata se ketapusan ne nga gendaw para seniyu.
21 Pebiyan riin ni Christ miktu'u amu ri sed Diwata, nek pitubu'en puli' buwat se kemetain bu' pisiddengegan giin; bu' aas suk pektu'u bu' pekperateng niyu riin sed Diwata.
22 Na, milimpiyuwan amu na sek pektuman niyu ri se kemetuuran, aas duun naing metuud nek pekpetail ri sek sama mektetu'u niyu, mekpinetailay amu buwat gaid ri sed diyalem ne gena'ena' niyu.
23 Ay mi'etaw amu na puli' gena' pebiyan ri se ngang megulang niyu ned duuni kemetain, bu' ndi' pebiyan ri sek talu' ned Diwata neng miktetubu' bu' nda'runi gekteben.
24 Ay tinalu' ri se Kesulatan,
“Su nga getaw maa' nek sigbet
bu' su dlaun ne ngak pesiddengeg nilan maa' ne ngag bulak nek sigbet.
Suk sigbet meluyu' bu' su ngag bulak mektagak,
25 ma'ad suk talu' ne Ginu'u nda'irunik pekerala'en”
Bu' suk talu' ketu, giin itu sung Melengas ne Gesuyen neg winali ri seniyu.