12
Gu Jakoobo nam ba muꞌaaꞌ gio baꞌ gu Peegro nam daagɨi ba kuupaꞌ
1 Baꞌ janoꞌ gu Eroodis guiꞌ nar gɇꞌkam kaꞌ bhaiꞌ ji ja oꞌbhaiꞌ jaiꞌ dhɨt guiꞌ nam tɨ jɨɨgiꞌñdhaꞌ buiñor guch Xoiꞌkam,
2 baꞌ tu chia nam muꞌaaꞌ gu Jakoobo guiꞌ nar jaꞌnniꞌñ gu Juan.
3 Baꞌ na xi ja ñɨiꞌñ gu Eroodis nam joidham jix bhaiꞌm taat gu Israel kam jaꞌtkam gu puiꞌ nat jɨꞌk jax tu dooda, ba tu chia ɨp nam dagiaꞌ gu Peegro. Baꞌ janoꞌr piasta kaꞌ na paiꞌ dhuuk jum aꞌjɨdaꞌ nam kuaꞌdaꞌ gu paan guiꞌ na cham bɨnkaꞌ na kɨꞌn jappukar.
4 Baꞌ na mɨt paiꞌ dhuuk ba daa gu Peegro, miꞌ pɨx ka xi chu chia gu Eroodis nam kuupaꞌ miꞌ nam paiꞌ miꞌ pu ja kukpadaꞌ gu jaꞌtkam, miꞌ nam paiꞌ gammɨjɨ maakob mi chu nuukaꞌndaꞌ gu sandaaruiꞌx, na sap baꞌ miꞌ dhɨr gatuuk bhaiꞌ ji iattulhdhaꞌ gɨt ja bui gu jaꞌtkam na ka xi buusniaꞌ gu piasta bhaan Paaskua taꞌm.
5 Baꞌ miꞌ na mɨt paiꞌ kuu gu Peegro, giilhim jix bhaiꞌ nuukaꞌn am gu sandaaruiꞌx, guꞌ ji na guꞌ guiꞌ nam tɨ jɨɨgiꞌñdhaꞌ buiñor guch Xoiꞌkam joidham tu daañxiꞌñchuꞌ am buiñor gu Dios.
Gu Dios na ba buusaidhaꞌ gu Peegro miꞌ dhɨr na paiꞌ ka kuupkaꞌ
6 Baꞌ moo janoꞌ gu tukaaꞌ na baꞌ moo gu Eroodis buimgidhak mu ba aichdhaꞌ gɨt gu Peegro ja bui gu jaꞌtkam, nat kiaꞌpɨx ba ji koi ja bɨɨm gook gu sandaaruiꞌx buuplhixim noonbiran kɨꞌn gu bapaiñum tɨtropiñ, na ja noonob am jaꞌk jup buupulh gu gook sandaaruiꞌx nam bɨxxik dɨr boobok, nam jaiꞌ gook mu jaꞌp jup ka guguuk gu sandaaruiꞌx dɨɨrap dɨr nam miꞌ tu nuukaꞌn,
7 jotmodaꞌ pɨx miꞌ bam maax maaꞌn gu nobiiꞌñ gu Dios, pɨx nammɨ tu maaxir miꞌ na jɨꞌx jir baꞌk chɨr. Baꞌ muiꞌ ji ai miꞌ na paiꞌ boꞌ gu Peegro, baꞌ miꞌ xi dhaagɨk janoꞌmgaran jaꞌp xi joiñdhak xi ñiñiichdhak jup tɨtda:
―Xi bamiiꞌ.
Baꞌ nat bhaiꞌ ji bam gu Peegro, naiꞌ pɨx gan ji iiꞌ gu bapaiñum tɨtropiñ guiꞌ na kɨꞌn ka buuplhich.
8 Miꞌ dhɨr baꞌ moo gio muiꞌp ji ñio gu nobiiꞌñ gu Dios, jup tɨtda:
―Xi chɨm tɨꞌiiꞌñ dhim jajannulh, gio dhim sussak jap bɨɨx jup ba aadaꞌ.
Baꞌ gu Peegro puiꞌp tu buim na jax tɨtda gu nobiiꞌñ gu Dios. Miꞌ dhɨr baꞌ moo gio muiꞌp ji ñio, jup tɨtda:
―Bɨɨx dhi daam dɨr kam jum tɨiꞌdharaꞌp xi chɨꞌji bhaiꞌ xiñ oidhaꞌ.
9 Baꞌ puiꞌ xi chɨꞌɨɨk gamaiꞌ ji jii gu nobiiꞌñ gu Dios, gu Peegro baꞌ muiꞌp xi oi. Baꞌ cham pɨk bhaiꞌ juraaꞌn biaꞌtuꞌ noꞌ moor sɨlhkam gu puiꞌ na jax tɨ nɨidhim kaꞌ baꞌ guꞌ cham, jɨꞌx jaꞌp jum aaꞌ ji na pɨx bap tɨ nɨidhim.
10 Guꞌ ji na guꞌ na jaꞌp xi chɨ nɨidhim, maaꞌn kap muiꞌ ba bubua mɨt miꞌ nam paiꞌ guguuk gu sandaaruiꞌx nam miꞌ tu nuukaꞌn, gio jaꞌxpɨx gama jaꞌk jup ba bubua mɨt nam paiꞌ jaiꞌp guguuk nam puiꞌ miꞌp tu nuukaꞌn. Miꞌ dhɨr nammɨ gama jaꞌk jup ba ai mɨt na paiꞌ baiñum bar kiꞌñgob, miꞌ na paiꞌ pu ba tum busaak mu jaꞌp dɨɨrap dɨr na daaꞌñxim muiꞌ bar kikcham. Baꞌ nam jax jiim, dɨɨlh pɨx joidham naiꞌ jim kupioꞌ gu kiꞌñgob, baꞌ guiꞌ dai na mɨt muiꞌ ba bubua. Baꞌ nammɨ gama jaꞌk paiꞌ nam ka jiim na daaꞌñxim mur kikcham, miꞌ jotmodaꞌ cham paiꞌ kam maax gu nobiiꞌñ gu Dios, dai dɨɨlh pɨx muiꞌ ba jim gu Peegro.
11 Baꞌ ba maat gu Peegro nar sɨlhkam gu puiꞌ na jax tɨ nɨidhim, baꞌp kaiꞌchim dɨɨlh pɨx:
―Xib jañ dho gi baꞌ ba tɨ jɨɨgiꞌñ ji nar sɨlhkam nat bak bha joot gu nobiiꞌñ gu Dios na baꞌ puꞌñi miꞌ dhɨr jiñ buusaidhaꞌ nañ paiꞌ ka kuupkaꞌ, na baꞌ cham jax jiñ dhoodaꞌ gu Eroodis gu puiꞌ na jax kam aagɨt, gio gu jaiꞌ Israel kam jaꞌtkam.
12 Baꞌ nat paiꞌ dhuuk puꞌñi ba maat gu Peegro, pu jii mu jaꞌk buiñor gu Mariiya dɨꞌɨɨꞌn gu Juan, guiꞌ nam Maarkos kɨꞌn jup jix mat kaꞌ. Baꞌ janoꞌ ampɨk muiꞌ miꞌp ka jumpax am gu jaꞌtkam nam miꞌ tu daan jix dhaam jaꞌk.
13 Baꞌ na jax jim muiꞌ ba tu son gu Peegro bha kiꞌñgob miꞌ na paiꞌ dhɨr jax muiꞌ ji chum bapkɨ mu jaꞌk ɨrban dɨr. Baꞌ maaꞌn gu ubii tɨyaa Roodi tɨɨgim muiꞌ ji jii nat ba tɨ tɨɨgim nar jaroiꞌ dhaꞌ guiꞌ na mu tu son.
14 Baꞌ nat ba kai na dhiꞌr diꞌ gu Peegro, giilhim jix bhaiꞌm ɨlh, pu cham ji kupioꞌkdhak xi mɨɨ nat ja aaꞌñdham guiꞌ nam miꞌp tuꞌiiꞌ, jup ja tɨtda na sap dhiꞌr diꞌ gu Peegro na mɨjɨ dɨr bha tu son kiꞌñgob.
15 Baꞌ guiꞌp tɨtda am pɨx:
―¡Iat ap dho jia!
Guꞌ ji na guꞌ guiꞌ xi kɨɨk na puiꞌ kaiꞌch na dhiꞌr diꞌ, baꞌp tɨtda am ɨp gio:
―¡Cham tuꞌ ji nar diꞌ! Chi chuꞌ iiꞌmdagaꞌn pɨx ji baꞌ.
16 Guꞌ ji na guꞌ gu Peegro pɨx ji kɨɨsaim na mu tu son mɨjɨ dɨr kiꞌñgob. Baꞌ guiꞌ bɨɨx mu jimɨɨk xi kupioꞌ mɨt gu kiꞌñgob, dhiꞌr diꞌ gu Peegro na mɨt ba tɨɨ. Baꞌ giilhim jix chootoꞌn jamɨt,
17 guꞌ ji nat guꞌ gu Peegro jaꞌp xi ja duiñ nobiiꞌñ kɨꞌn nam sap cham ñiokdaꞌ. Miꞌ dhɨr baꞌ dai na xi ja aagiꞌñ nat jax dhuuk buusai guch Gɨꞌkoraꞌ mu dɨr na paiꞌ ka kuupich. Gio baꞌ moo jaꞌpnip ja tɨtda ɨp:
―Aagiꞌñdhaꞌ pim gu Santiago gu dhiꞌ puiꞌ nañ jax ba tu jam aꞌgiꞌñ, gio baꞌ bɨɨx gu jaiꞌ guiꞌ nam puiꞌp tɨ jɨɨgiꞌñ buiñor guch Xoiꞌkam.
Baꞌ daipuꞌ nat puꞌñi xi chɨꞌɨɨk, miꞌ dhɨr pu jii maakam jaꞌk.
18 Baꞌ nat ba xiaꞌ, naiꞌ tɨi tɨ nɨiꞌñ am gu sandaaruiꞌx, nam guꞌ cham maat nat pa jaꞌk bhɨi gu Peegro nam miꞌ ka kuupkat.
19 Baꞌ gu Eroodis naiꞌ tɨi xi chu joot nam gaaꞌmpuꞌ gu Peegro, guꞌ ji na mɨt guꞌ cham paiꞌ ji chɨɨ. Baꞌ bhaiꞌ ji ja oꞌbhaiꞌ gu sandaaruiꞌx guiꞌ nam miꞌ tu nuukaꞌndat, tu chia dho guꞌ nam ja koodaꞌ. Mɨkkat baꞌp ma jii gu Eroodis bhaiꞌ dhɨr Judea, mu jaꞌk pu bhɨi Sesareeya nat ba kiicham.
Na ba mukiaꞌ gu Eroodis
20 Baꞌ moop jix ja bhaamkiꞌñdhaꞌ gu Eroodis gu Tiiro kam jaꞌtkam gio baꞌ gu Sidoon kam, baꞌ guiꞌ maaꞌn ñiꞌook xip duuk muiꞌ ma jii mɨt buiñor gu Blaasto guiꞌ na iam pɨx jaꞌxbuiꞌp jir gɇꞌkam kaꞌ na jax gu Eroodis, na mɨt pu tɨɨdam na sap ja aꞌmkam nokiaꞌ, na miꞌ dhɨr pu tɨɨdaꞌ gu Eroodis na cham ka bhaam kaꞌ ja bui, na guꞌ nam jix aaꞌ gu Tiiro kam gio gu Sidoon kam nam mi jaꞌp tu sabaꞌndaꞌ gu koiꞌ na paiꞌ jax jir gɇꞌkam gu Eroodis na Judea dɨbɨɨr bhaan bipioꞌ.
21 Baꞌ ba tu ja daax gu Eroodis nam paiꞌ dhuuk miꞌm jumpadaꞌ buiñor dhiꞌ jɨꞌ dhi jaꞌtkam. Baꞌ nat bam ai nat paiꞌ dhuuk tu ja daax, giilhim muiꞌ miꞌ bam jumaap jamɨt buiñor. Baꞌ joidham jix abhaar xi chɨm tɨiꞌdhak bhaiꞌ ji dhaibu nam paiꞌ dadaarrɨdaꞌ guiꞌ nam puꞌñir gɇꞌgɇrkam kaꞌ, miꞌ dhɨr baꞌ bhaiꞌ ji chu ja aꞌgi.
22 Baꞌ gu jaꞌtkam pɨx jiiñak suulh jamɨt, jup kaiꞌch am:
―¡Dhiꞌ na yaꞌ tu aꞌga, cham tuꞌ ji nar maaꞌnkam, guꞌ dhiꞌr dios ji!
23 Baꞌ puiꞌ xi chu duu gu nobiiꞌñ guch Gɨꞌkoraꞌ na miꞌ jotmodaꞌ pɨx cham bhaiꞌ ji chu tatdachia gu Eroodis, nat guꞌ cham taxchaabgi gu Dios gu puiꞌ nam jax tɨtda gu jaꞌtkam. Mɨkkat pu muu dho baꞌ, botpodaꞌ mɨt pɨx bhaiꞌ ji jugio.
24 Guꞌ baꞌ gux bhaiꞌm kaiꞌchdham ñioꞌkiꞌñ gu Dios pɨx mɨk jaꞌp ji kaiꞌñchaidhaꞌ, muiꞌ kap pɨx jaꞌx puiꞌ ba tum aꞌgadaꞌ.
25 Baꞌ gu Bernabee gio gu Saulo gio jaꞌk jup ba suulh jamɨt ɨp bhammɨ dɨr Jerusaleen na mɨt paiꞌ dhuuk bhammɨ xi ja aichulhdhak gu tuumiñ guiꞌ nam tɨ jɨɨgiꞌñdhaꞌ buiñor guch Xoiꞌkam. Bɨɨx jamɨt jup xi baidhak gu Juan guiꞌ nam Maarkos kɨꞌn jup jix mat kaꞌ.