11
1 Puiꞌ pim jaꞌk tu duiñchuꞌndaꞌ na pim jax jiñ ñɨiꞌñ aañ nañ tu duiñchuꞌ, nañ guꞌ aañ yaꞌ dɨr jaꞌp jaꞌk puiꞌ pɨx jup tu duiñchuꞌ nat jax jaꞌk tu jii guch Xoiꞌkam janoꞌ na yaꞌ xi oilhimɨk.
Gu Paablo na bhaan ba tu aꞌgaꞌ nam jax jaꞌk tu jimdaꞌ gu uꞌuub
2 Ku guꞌ aañ jix bhaiꞌñ chaat ji na pim gammɨjɨñ chɨꞌñchot miꞌ puiꞌ jiim nañ jax jam aagiꞌñ.
3 Baꞌ jaꞌp jañ jup xi jam aaꞌñdham na pim gɨt baꞌ miꞌ puiꞌp xi jimɨi: Puiꞌ nach jax tuꞌ kaꞌm nɨiꞌñ aach guch Xoiꞌkam nach jir chichioꞌñ, puꞌñip jum aaꞌ nam tuꞌ kaꞌm ja nɨiꞌñdhaꞌ gu uꞌuub gu ja bɨpnaꞌ. Guch Xoiꞌkam puiꞌ tuꞌ kaꞌm jup nɨiꞌñ guꞌ gu Dios.
4 Puiꞌ ku baꞌ gu chioꞌñ noꞌ tuꞌ kɨꞌn iiñat gu maꞌooꞌn tu daan piam noꞌ bhaankam gu Dios ja aagiꞌñ gu jaiꞌch Xoiꞌkam jɨɨgiꞌñdham na jax jaꞌk jix aaꞌ, dhiꞌ jaꞌp kaiꞌñkam puiꞌm duukaꞌ na cham tuꞌ kaꞌm nɨiꞌñdhaꞌ guch Xoiꞌkam.
5 Guꞌ baꞌ gu ubii noꞌ cham jup iiñat gu maꞌooꞌn tu daan buiñor gu Dios piam noꞌ puiꞌ bhaankam jup tu aꞌga, dhiꞌ jaꞌp kaiꞌñkam puiꞌm duukaꞌ ɨp na cham tuꞌ kaꞌm nɨiꞌñdhaꞌ gu chioꞌñ guiꞌ nar bɨngaꞌn kaꞌ. Jaꞌp pɨx ji buusandaꞌ guꞌ nax dhaapkam jiikix kaꞌ gu maꞌooꞌn noꞌ cham iiñ.
6 Baꞌ noꞌ guꞌ gu jax chuꞌm ubii cham joiꞌñ na iiñkaꞌ gu maꞌooꞌn na paiꞌ dhuuk puꞌñi tu daandaꞌ buiñor gu Dios, jix dhaapkam dho xim jiikai noꞌ cham xiꞌɨr gu puiꞌ jaꞌk. Piam noꞌ guꞌx xiꞌɨr, xim iiñat do.
7 Gu chioꞌñ cham jir am na iiñkaꞌ gu maꞌooꞌn, nat guꞌ gu Dios pu chuꞌm jup duu na jax chuꞌm dɨɨlh na baꞌ tuꞌ kaꞌm nɨidhat buiñor tu daandaꞌ. Baꞌ gu ubii noꞌm iiñ, dhiꞌ bhaan jup jix maatɨꞌ kaꞌ na tuꞌ kaꞌm nɨiꞌñ gu chioꞌñ guiꞌ nar bɨngaꞌn kaꞌ.
8 Nat guꞌ gu Dios cham tuꞌ gu bakxigaꞌn gu ubii alhiꞌch ɨɨkdhak jup duu gu chioꞌñ, guꞌ jaꞌpji gu chioꞌñ nat alhiꞌch ɨɨkdhak jup duu gu ubii.
9 Gio cham tuꞌ gu ubii nat bɨɨpɨꞌ jaiꞌchdhɨr nat baꞌp ba jaiꞌchdhɨr gu chioꞌñ, guꞌ jaꞌpji gu chioꞌñ nat bɨɨpɨꞌ jaiꞌchdhɨr nat baꞌp ba jaiꞌchdhɨr gu ubii na baꞌ bar bɨngaꞌn kaꞌ.
10 Puꞌñi pɨx kaiꞌñkam baꞌm aaꞌ na gu ubii xi iiñat gu maꞌooꞌn na paiꞌ dhuuk puꞌñi tu daandaꞌ, gio na baꞌ dhiꞌ bhaan jix maatɨꞌ kaꞌ na tuꞌ kaꞌm ja nɨiꞌñ gu noonbiꞌñ gu Dios.
11 Guꞌ ji na guꞌ xib nach ba tɨ jɨɨgiꞌñ buiñor guch Xoiꞌkam, maaꞌn nach jax pɨx jich ɨlhiiꞌñdhaꞌ bɨɨx. Nach guꞌx maat na cham jɨꞌxdhat jaiꞌchdhɨlhiaꞌ gu ubii noꞌ cham jaiꞌch gu chioꞌñ, ni gu chioꞌñ ku cham jɨꞌxdhaꞌ jaiꞌchdhɨlhiaꞌ noꞌ cham jaiꞌch gu ubii.
12 Na guꞌ sia kut gu Dios jup duu gu bɨɨpɨꞌ kam ubii bhaan dɨr guiꞌ nat puiꞌ bɨɨpɨꞌp duu ɨp gu chioꞌñ, xib bɨɨx gu chichioꞌñ nam jɨꞌk jix jaiꞌch bhaan dɨr maaxir jamɨt gu uꞌuub. Maaꞌn baꞌ nam jir jɨꞌx pɨx gu ubii gio gu chioꞌñ, gam sia bɨɨx na jɨꞌk tuꞌx chu jaiꞌch yaꞌ dhi oiꞌñgaꞌn giox dhaam jaꞌk, na guꞌ Dios pɨx jup jir tu duñiiꞌñ bɨɨx.
13 Dɨɨlh japim baꞌ xim gaꞌngadaꞌ noꞌr am na gu ubii tu daandaꞌ buiñor gu Dios puiꞌ cham jim iiñat piam ku guꞌ cham.
14 Na guꞌ maaxik yaꞌ nach jax jaꞌk tu jim xib, jix xiꞌɨraam tuiꞌkaꞌ gu chioꞌñ noꞌt xi chɨꞌtbilh gu kuupaꞌn,
15 guꞌ gu ubii cham, sia kur tɇꞌtɇb gu kuupaꞌn, nat guꞌ maaxik pu puiꞌ jaꞌk ya doꞌñcho gu Dios na baꞌ kɨꞌn iiñkaꞌ gu maꞌooꞌn.
16 Guꞌ baꞌ noꞌ guꞌ jaroiꞌ maadɨt cham maat na jax pɨk jaꞌk xi dhuñiaꞌ dhiꞌ nañ jax kaiꞌch, noꞌ guꞌ dai nat bhaan pɨx ba ji ñiokbo, aañ yaꞌ dɨr pu tɨtda nach daipuꞌ puꞌñi jaꞌk jix maat nar joidham, cham jach jax chuꞌm jumaix maat. Sia jaiꞌ kap guiꞌ nam puiꞌp tɨ jɨɨgiꞌñ buiñor guch Xoiꞌkam, daipuꞌ puꞌñi jaꞌk jix maat am nar joidham.
Na bhaan ba tu aꞌgaꞌ gu Paablo janoꞌ nat paiꞌ dhuuk tu juu guch Xoiꞌkam jurnɨk kam bhaan Paaskua taꞌm
17 Dai jaꞌp tuꞌm kɨꞌn jañ cham tuꞌx bhaiꞌñ chaat jam bui, panaas na pim paiꞌ dhuuk tɨi maap jum jumpaꞌndaꞌ, cham bhaiꞌ jam iaꞌdhiꞌñ, cham tuꞌ na pim dhiꞌ kɨꞌn kaapakaim na pim tɨ jɨɨgiꞌñ buiñor guch Xoiꞌkam.
18 Bɨɨpɨꞌñ jaꞌpni muiꞌ ji kɨɨsaꞌ nañ tu jam aꞌgidhaꞌ: Jup jiñ chɨtda am na sap na pim paiꞌ dhuuk tɨi maap bam jumpadaꞌ, cham tuꞌ maap maaꞌn ñiꞌook jup duukaꞌ pim, jɨꞌk sap maap jaꞌp jaꞌk jumpax kaꞌ pim gio jaiꞌ jaꞌp jaꞌk ɨp, jix bhaak kaꞌ pim sap puiꞌ ji chuꞌt. Pɨx am tɨ jɨɨgiꞌñ iñ baꞌ aañ na pim sɨlhkam puiꞌm bua.
19 Gio guꞌ maaxik jup jum aagɨt na pim puꞌñim jɨꞌdɨlhkadaꞌ na pim baꞌ bhaan matgilhiaꞌ na pim jir jaroiꞌ dhaꞌ guiꞌ na pim tuꞌ sɨlhkam kaichuꞌ guch Xoiꞌkam.
20 Jaꞌp tɇ kɇɇ iñ guꞌ na pim dhiꞌ kɨꞌn cham maaꞌn ñiꞌook kap duuk na pim jaiꞌ dhɨt cham puiꞌ ka duiñchuꞌ na jax jaꞌk jum aaꞌ na pim tu kuaꞌdaꞌ gu jurnɨk kam, na pim bhaan tɨtɨɨꞌñchodaꞌ guch Xoiꞌkam janoꞌ nat tu juu jurnɨk kam bhaan Paaskua taꞌm.
21 Jaiꞌ sap bɨɨpɨꞌ ba tu koiꞌchgɨdaꞌ pim sia kut chakuim ai na paiꞌ dhuuk tu daaxix kaꞌ na pim bɨɨx maap tu jugiaꞌ, gam sap jaiꞌ bax maik kaꞌ pim. Bhaiꞌ sap xi ja nɨidhat japim gu jaiꞌ nam jix bhiogɨt mi jaꞌp jup darkaꞌ nam tɨi tɨ nɨɨrdaꞌ nam aayaꞌ na paiꞌ dhuuk pɨk tu daaxix kaꞌ.
22 ¿Kux cham tu oiꞌdhaꞌ pim aa na pim mu pu xi chu jugai noꞌ pim puiꞌx bhioꞌ gio na pim mu pu xi ioꞌji gu tuꞌ na pim jix ñaa ku pim baꞌ mummɨp bam xiꞌɨrappuidhaꞌ na paiꞌm aaꞌndaꞌ na pim soiꞌm ɨlhdhat tu jugiaꞌ gio na pim tu iꞌyaꞌ? Jaꞌp japim moo cham tuꞌ kaꞌm tɨ nɨiꞌñ. Jaꞌp jum aaꞌ pim nañ jix bhaiꞌñ chaat jam bui puiꞌ na pim jax jum bua.
Na ba ja aagiꞌñdhaꞌ gu Paablo nat jax jaꞌk tu juu guch Xoiꞌkam jurnɨk kam bhaan Paaskua taꞌm
(Mt. 26:26‑29; Mr. 14:22‑25; Lk. 22:14‑20)
23 Puiꞌ ñich jaꞌk jam aaꞌñ guꞌ nañ jax jaꞌk jix maat nat tu juu guch Xoiꞌkam jurnɨk kam bhaan Paaskua taꞌm, palhɨɨp iam bɨɨpɨꞌ dɨr nat baꞌ moo ba iattulh maadɨt gu nobiiꞌñ. Jaꞌpni jaꞌk tu duu: Bɨɨpɨꞌ xi dhaagɨk gu paan
24 xi chu taxchaabgidhak buiñor gu Dios nat baꞌ taꞌtak jaisak muiꞌ xi ja maa gu noonbiꞌñ jup xi ja tɨɨdak: “Dhiꞌñir jiñ chuukuꞌ na ba tu maakix nam muꞌaaꞌ na baꞌ aapiꞌm jix bhaiꞌ tu jam jimiaꞌ. Puiꞌ pim tu buadaꞌ na pim baꞌ bhaan jiñ chɨꞌñchokaꞌ.”
25 Baꞌ na mɨt xi jugaak gu paan, guch Xoiꞌkam jup xi dhaagɨk maaꞌn gu alhiꞌch jaꞌaa na mi jim gu biiñ guiꞌ na uubas kɨꞌn jup duñiix jup ja tɨtda gu noonbiꞌñ: “Dhiꞌñi biiñ jir jiñ ɨꞌɨɨr na kɨꞌn bhaan jix maatɨꞌ kaꞌ na xib dɨr maakam ba tu aagix kaꞌ jam bui. Puiꞌ pim jup tu buadaꞌ na pim baꞌ bhaan jiñ chɨꞌñchokaꞌ.”
26 Puiꞌ ku baꞌ aapiꞌm jiñ jaaduñ jich Xoiꞌkam bhaan, na pim paiꞌ dhuuk tu kuaꞌdaꞌ soiꞌm ɨlhdhat gu paan jurnɨk kam gio na pim tu ioꞌdaꞌ gu biiñ alhiꞌch jaꞌaa taꞌm, ja aaꞌñdhat jup jum buadaꞌ pim gu jaꞌtkam nat jax kaiꞌñkam muu guch Xoiꞌkam. Gammɨjɨ pim puiꞌ pu tu buadaꞌ janoꞌ juugɨt na paiꞌ dhuuk gio bhaiꞌp jimdaꞌ guch Xoiꞌkam.
Na ba ja aagiꞌñdhaꞌ gu Paablo na jax jaꞌk jum aaꞌ nam tuꞌt tu kuaꞌdaꞌ nam paiꞌ dhuuk bhaan tɨꞌñchokaꞌ guch Xoiꞌkam
27 Gu jaroiꞌ baꞌ na puꞌñi cham miꞌ puiꞌ duiñchugɨt tu kuaꞌdaꞌ gu paan gio na tu ioꞌdaꞌ gu biiñ nat jax jaꞌk duu dɨɨlh guch Xoiꞌkam janoꞌ nat paiꞌ dhuuk tu juu jurnɨk kam bhaan Paaskua taꞌm, dhiꞌm uaꞌtulhdhidhaꞌ buiñor guch Xoiꞌkam, na guꞌ nañ jax ba kaiꞌch na dhiꞌ pɨx bhaan jum uaꞌrgiꞌñdhaꞌ gu tukgaꞌn gio gu ɨꞌraꞌn.
28 Jaꞌpni jaꞌk jum aaꞌ na pim tuꞌt tu kuaꞌdaꞌ gio na pim tu ioꞌdaꞌ: Bɨɨpɨꞌ pim xi chɨꞌñchoi na pim jax kaiꞌñkam jugiaꞌ gu paan gio na pim jax kaiꞌñkam iꞌyaꞌ gu biiñ, na pim paiꞌx bhaiꞌ xi chɨꞌñchoꞌ na jax jir jum duukam kaꞌ na pim baꞌ ba jugiaꞌ gio na pim iꞌyaꞌ.
29 Na guꞌ tulhiiñchudaꞌ gu Dios gu jaroiꞌ noꞌ jaꞌp pɨx kuaꞌ gu paan gio gu biiñ noꞌ jaꞌp pɨx ioꞌ cham jum matdaꞌ ɨr. Jum aaꞌ na bɨɨpɨꞌx mat kaꞌ na gu paan bhaan jum uaꞌrgidhaꞌ gu tukgaꞌn guch Xoiꞌkam gio gu biiñ na bhaan jup jum uaꞌrgidhaꞌ gu ɨꞌraꞌn.
30 Dhiꞌ pu kaiꞌñkam muiꞌx kakoꞌk japim jam tutkuꞌ bhaan na pim puꞌñi cham miꞌ puiꞌ duiñchugɨt tu kuaꞌdaꞌ gio na pim tu ioꞌdaꞌ jurnɨk kam na pim tɨi bhaan tɨꞌñchokaꞌ gɨt guch Xoiꞌkam, jaiꞌ ba koꞌiix am.
31 Na guꞌ noꞌch jix bhaiꞌx maat nach jax kaiꞌñkam jugiaꞌ gu paan gio gu biiñ nach kaiꞌñkam iꞌyaꞌ, cham tuꞌch chulhiiñchuꞌndaꞌ gu Dios.
32 Pu kaiꞌñkam jich chulhiiñchuꞌndaꞌ guꞌ gu Dios na bhaan tɨich aagiꞌñdhaꞌ nach tuꞌ bhaan cham am buaꞌtgɨdaꞌ, kat jach chi baꞌ maatɨi miꞌ dhɨr cham puiꞌ ka tuiꞌñgɨdaꞌ. Tɨix aaꞌ guꞌ gu Dios na gɨt nim maaꞌn ku mu jaꞌk bhɨɨyaꞌ nam paiꞌ gammɨjɨ miꞌ pup jim tulhiiñdhaꞌ, miꞌ nam paiꞌ jaꞌk bhɨɨyaꞌ guiꞌ nam cham tɨ jɨɨꞌñdhaꞌ buiñor guch Xoiꞌkam.
33 Baꞌ aañ xib jaꞌpni jam tɨtda aapiꞌm jiñ jaaduñ jich Xoiꞌkam bhaan: Xim nɨnɨɨrat japim na pim paiꞌ dhuuk puꞌñi maap ba ji chu jugiaꞌ jurnɨk kam na pim bhaan tɨꞌñchoꞌ guch Xoiꞌkam, na pim paiꞌ bɨɨx miꞌ xi aayaꞌ paiꞌ na pim jum jumpadaꞌ na pim baꞌ maap bhaiꞌ ji chu jugiaꞌ gu paan gio gu biiñ na pim tu iꞌyaꞌ.
34 Pu xi chu jugai pim jam kiꞌaam jaiꞌ dhɨt noꞌ pim jix bhioꞌ na pim baꞌ cham jix bhiogɨt mu jiimdaꞌ paiꞌ na pim tu jugiaꞌ, na guꞌx bhaiꞌm aaꞌ gio soiꞌm ɨlhdhat na pim tu jugiaꞌ na baꞌ gu Dios cham ka jam tulhiiñchuꞌnkaꞌ. Baꞌ gu jaiꞌ na pim jiñ chɨkka na jax jaꞌk jix bhaiꞌ na pim tu duñiaꞌ, janoꞌñ jam aagiꞌñdhaꞌ nañ paiꞌ dhuuk dɨɨlh mu jim.