5
1 Gu jaroiꞌ nar ja gɇꞌkam tuk kaꞌ guiꞌ nam bhaiꞌ gɇꞌ chiop ja palhbuiꞌñdhaꞌ gu jaꞌtkam nam tu daandaꞌ buiñor gu Dios, pu kaiꞌñkam mi daaxix kaꞌ na ja aꞌmkam ñiokdaꞌ gu jaꞌtkam jix dhaam jaꞌk buiñor gu Dios, gam na tu makgɨrxiꞌñdhaꞌ gu sasoiꞌ ja aꞌmkam gu jaꞌtkam, na baꞌ puꞌñi duuji tu ja uañiꞌñkaꞌ gu Dios gu ja uaꞌtulhdharaꞌ.
2 Gammɨjɨ soiꞌ tɨɨꞌntuꞌndaꞌ gu Dios ja aꞌmkam bɨɨx gu jaꞌtkam na siamri tu ja uañiꞌñkaꞌ gu ja uaꞌtulhdharaꞌ, na guꞌx ja joiꞌgɨꞌndaꞌ, na guꞌx mat kaꞌ nax chu xijai nañ duakaꞌ, tuꞌ nañ pɨx bhaan gai ba gɨxiaꞌ guꞌ.
3 Puiꞌ ku baꞌ guiꞌ na puꞌñi miꞌ tu juandaꞌ chiop, gammɨjɨ nabap tanoolh tu makgɨrxiꞌñdhaꞌ gu sasoiꞌ gu Dios ja aꞌmkam bɨɨx gu jaꞌtkam gio dɨɨlh, na baꞌ puꞌñi duuji tu ja uañiꞌñkaꞌ gu Dios gu ja uaꞌtulhdharaꞌ.
4 Ku baꞌ guꞌ dhiꞌ gu Dios ji noꞌt pu chuꞌm kɨꞌn bhaan ba tɨ tɨɨ gu jaroiꞌ na baꞌ puꞌñi bar ja gɇꞌkam tuk kaꞌ guiꞌ nam bhaiꞌ gɇꞌ chiop tu juandaꞌ, cham tuꞌ na dɨɨlh pɨx noꞌx aaꞌ paiꞌ na duuk ɨlhiiꞌñdhaꞌ. Jaꞌp na jax bɨjɨk guiꞌ na Aroon tɨɨgich, nat guꞌ Dios pu chuꞌm kɨꞌn bhaan tɨ tɨɨgɨk dai na puꞌñir ja gɇꞌkam tuk kaꞌ guiꞌ nam miꞌ tu juandaꞌ ɨrban dɨr gu jannulh baꞌaak nam ja palhbuiꞌñdhaꞌ gu Israel kam jaꞌtkam nam tu makgɨrxiꞌñdhaꞌ gu sasoiꞌ gu Dios, cham tuꞌ dɨɨlh pɨx.
5 Guꞌ baꞌ gu Jesuus jich Xoiꞌkam puꞌñi ɨp xib, gu Gɇꞌkam Dios pu chuꞌm kɨꞌn bhaan tɨ tɨɨ na baꞌ xib puiꞌ ji buusandaꞌ nar ja gɇꞌkam tuk kaꞌ guiꞌ nam bhaiꞌ gɇꞌ chiop tu juan, cham tuꞌ nat paiꞌ dhuuk ɨlh dɨɨlh nat pu chuꞌm kɨꞌn jum dai. Na guꞌ jaꞌpnim kaiꞌch miꞌ na paiꞌ tu uaꞌñix gu ñioꞌkiꞌñ gu Dios na dhiꞌ aagɨt jup kaiꞌch:
Aap jir jiñ mar,
gɇꞌkam kɨꞌn jum aꞌm ba tɨ nɨidhim iñ.
Aañ jir jum gɨꞌkoraꞌ.
6 Gio baꞌ moo jumai kap jaꞌpnip jum kaiꞌch:
Yaꞌ dɨr jaꞌp jaꞌk gammɨjɨ puiꞌ ba ji buusandaꞌ ap na jax guiꞌ na Melkisidek tɨɨgich na ja palhbuiꞌñdhaꞌ gu jaꞌtkam nam tu daandaꞌ buiñor gu Dios.
7 Janoꞌ na yaꞌ xi oilhimɨk guch Xoiꞌkam, palhbui gu Gɇꞌkam Dios na bɨxchuꞌx aichuꞌn na pu duñiaꞌ na jax dhui nakgaꞌ nam bax muꞌaak gu jaꞌtkam, na guꞌ gɇꞌkam kɨꞌn soiꞌm ɨlhdhat suakɨt soiꞌ tɨɨꞌntuꞌndaꞌ na palhbuidhaꞌ. Palhbui ɨp baꞌ gu Dios gu Maraaꞌn jich Xoiꞌkam, na guꞌ miꞌ puiꞌ tu kuugalhdhim nat jax tɨɨdak bha joot.
8 Baꞌ sia kut jax giilhim jum tulhiiñaimɨk guch Xoiꞌkam, bɨɨx miꞌ puiꞌ tu kuugalhdhak na jɨꞌk jax jix aaꞌ guch Gɨꞌkoraꞌ. Na guꞌ na bar maaꞌnkam, ba maat na jax jaꞌk tuꞌ kaꞌm jum nɨnɨiꞌñ gu Dios, sia ku guꞌ pu bɨjɨk dɨr jix maat, na guꞌr Maraaꞌn.
9 Guꞌ baꞌ nat guꞌ cham jɨꞌxdhaꞌ paiꞌ dhuuk tuꞌ bhaan jum uaꞌtulhdhak buiñor gu Dios, bɨɨx miꞌ puiꞌ tu kuugalh na jax jix aaꞌ, baꞌ puiꞌ jaꞌk duu gu Dios nar am na ja aꞌmkam mukiaꞌ gu jaꞌtkam, na tu ja namkixdhaꞌ gu ja uaꞌtulhdharaꞌ, na baꞌ miꞌ dhɨr puꞌñi duuji bax bhaaiꞌn kaꞌ nam jimiaꞌ jix dhaam nam paiꞌ gammɨjɨx jɨjɨkgɨm bap tuiꞌkaꞌ, guiꞌ dho ji nam jɨꞌk soiꞌm ɨlhdhai tɨ jɨɨꞌñdhaꞌ buiñor gio nam miꞌ puiꞌ jimiaꞌ na jax jix aaꞌ.
10 Gio pu chuꞌm kɨꞌn jup dai ɨp gu Dios gu Maraaꞌn jich Xoiꞌkam na jaꞌp ji buusandaꞌ na gu ja gɇꞌkam tuk guiꞌ nam bhaiꞌ gɇꞌ chiop tu juandaꞌ, jaꞌp na jax jir tuꞌm kat guiꞌ na Melkisidek tɨɨgich.
Nach jax jaꞌk jix ioꞌm machiaꞌ gu ñioꞌkiꞌñ gu Dios
11 Muiꞌ ka biꞌiix ji guꞌ guiꞌ nañ jɨꞌk tɨi xi chu jam aꞌgidham jiñ jaaduñ, guꞌ ji na guꞌx xijai nañ jam aagiꞌñdhaꞌ na pim jax jaꞌk jix bhaiꞌx maatɨt kaayaꞌ, na pim guꞌ cham bɨɨx maatɨt kaayaꞌ noꞌñ muiꞌ pɨx tɨip xi jam aagiꞌñ.
12 Tɨi bar am kat ji guꞌ na pim jix bhaiꞌ bax mat kaꞌ gɨt dhi ñioꞌkiꞌñ gu Dios na jax pɨk kaiꞌñkam jup jum kaiꞌch, am jaiꞌ ba tu mamtuxiꞌñdhaꞌ pim gɨt, nat guꞌ dhiꞌ muiꞌ ba jur janoꞌ dɨr na pimɨt paiꞌ dhuuk kɇɇk dhix bhaiꞌm kaiꞌchdham ñiꞌook tɨ jɨɨꞌñ buiñor guch Xoiꞌkam. Guꞌ ji na guꞌ cham, pui jam aꞌm jum aaꞌ ji guꞌ na jaroiꞌ jam aagiꞌñdhaꞌ na jax pɨk kaiꞌñkam jup jum kaiꞌch dhix bhaiꞌm kaiꞌchdham ñioꞌkiꞌñ gu Dios. Jaꞌpni pɨx ji buan japim kiaꞌ na jax gu aꞌaalh guiꞌ nam jix ioꞌm kar aꞌlhich kaꞌ, nam pu chakui ioꞌgiꞌñdhaꞌ gu tɨmkalh, dai biiꞌm nam ioꞌdaꞌ.
13 Jaꞌpni dho moo ji buan japim na jax gu aꞌaalh guiꞌ nam kiaꞌpɨx maaxilhiaꞌ, nam chakui mat kaꞌ na tuꞌr jix buam jum duukam gio na tuꞌr jix kɨɨꞌp jum duukam.
14 Noꞌm bar gɇꞌgɇr jaꞌtkam guꞌx bhaiꞌ bax mat kaꞌ am ji guiꞌ nar jix buam jum duukam gio guiꞌ nar jix kɨɨꞌp jum duukam, nam guꞌ bɨxchuꞌ ba tu machiaꞌ. Gio guꞌ bɨɨx aixim tuꞌm ba tu kuaꞌdaꞌ am gu koiꞌ, cham tuꞌ dai biiꞌm kiaꞌ na jax nam jir aꞌlhich kat.