8
Nax ioꞌm jir jix kɨɨꞌ guch Xoiꞌkam na xib puiꞌ ji buusan na jax gu ja gɇꞌkam tuk guiꞌ nam bhaiꞌ gɇꞌ chiop ja palhbuiꞌñdhaꞌ gu jaꞌtkam nam tu daandaꞌ buiñor gu Dios gam nam tu ja daañxiꞌñdhaꞌ
1 Na tuꞌx ioꞌm jir joidham dhiꞌ nach jɨꞌk tuꞌ bhaan tu aꞌga xib, dho nach maadɨt ba biaꞌ guiꞌ na jaꞌp ji buusan nar ja gɇꞌkam tuk guiꞌ nam bhaiꞌ gɇꞌ chiop tu juandaꞌ, na bhaamɨ ba daa jix dhaam sonpan gu Dios kɨɨꞌn dɨr jaꞌk, na gammɨjɨ jich aꞌmkam ñiok, dhiꞌ jɨꞌx ioꞌm jir joidham aach jich bui.
2 Gu Jesuus jich Xoiꞌkam jañ dho aagɨt jup kaiꞌch na bhammɨ ba daa nat paiꞌ kɨi gu chiop guch Gɨꞌkoraꞌ na joidham jix chu uañ, cham tuꞌ puiꞌ na jax ya jaꞌp nam paiꞌ tu chichiopiꞌ gu jaꞌtkam.
3 Na guꞌ yaꞌ dhi oiꞌñgaꞌn guiꞌ nam bhaiꞌ tu juandaꞌ gɇꞌ chiop, pu kaiꞌñkam pɨx mi darkaꞌ am nam tu ja daañxiꞌñdhaꞌ gu jaꞌtkam gio baꞌ nam ja palhbuiꞌñdhaꞌ nam tu makgɨrxiꞌñdhaꞌ gu sasoiꞌ gu Dios. Baꞌ gu Jesuus jich Xoiꞌkam na puiꞌ ji buusan na jax guiꞌ nam bhaiꞌ gɇꞌ chiop tu ja daañxiꞌñdhaꞌ gu jaꞌtkam gio na ja palhbuiꞌñdhaꞌ nam tu makgɨrxiꞌñdhaꞌ gu sasoiꞌ gu Dios, jum aagɨt ji na tuꞌ xi makgɨrxidhaꞌ gu Dios.
4 Noꞌ gɨt pui yaꞌ oirɨdaꞌ dhi oiꞌñgaꞌn bhaan gu Jesuus jich Xoiꞌkam, cham tuꞌ puiꞌ biaꞌkaꞌm gɨt gu jaꞌtkam noꞌ guiꞌ jaꞌp jup ji buusan na jax guiꞌ nam bhaiꞌ gɇꞌ chiop tu ja daañxiꞌñ gu jaꞌtkam gio na ja palhbuiꞌñ nam tu makgɨrxiꞌñdhaꞌ gu sasoiꞌ gu Dios. Nam guꞌ muiꞌx jaiꞌch guiꞌ nam bhaiꞌ gɇꞌ chiop tu ja daañxiꞌñ gu jaꞌtkam gio nam ja palhbuiꞌñ nam tu daandaꞌ buiñor gu Dios, daipuꞌ guiꞌ na jax chuꞌm pɨx ja aaꞌ miꞌ nat paiꞌ tu uaꞌnak gu Moisees nar am nam pu chuꞌm kaꞌm tu juandaꞌ.
5 Baꞌ bɨɨx nam jɨꞌk tuꞌ jax bua guiꞌ nam yaꞌ darkaꞌ guiꞌ nam bhaiꞌ gɇꞌ chiop tu ja daañxiꞌñdhaꞌ gu jaꞌtkam gio nam ja palhbuiꞌñdhaꞌ nam tu daandaꞌ buiñor gu Dios, iam pɨx puiꞌ jaꞌk tɨi xi chu bua am nat jax aaꞌñdhak bɨjɨk gu Dios gu tujuandam tugiꞌñ Moisees, nar pu chuꞌm na jax tum bua bhammɨx dhaam, puiꞌ na jax tu tuꞌiiꞌ bhaiꞌ na paiꞌ tu chiopiꞌ gu Dios. Na guꞌ janoꞌ nat paiꞌ dhuuk chia gu Dios gu Moisees na kɨɨsaꞌ gu jannulh baꞌaak miꞌ na paiꞌ dhɨr mu daandaꞌ, nax ioꞌm jix chu xidhuu kaꞌ, jup tɨtda: “Pu chuꞌm jap moop duñiaꞌ gu chiop miꞌ na pim paiꞌ dhɨr bha tu daandaꞌ jiñ bui na ñich jax chuꞌm jum tɨɨꞌñchoda bhammɨ oidhaꞌ taꞌm nach paiꞌ xi chu aꞌgimɨk.”
6 Guꞌ dhiꞌ na jaroiꞌ ba daaxix xib nar ja gɇꞌkam tuk kaꞌ guiꞌ nam bhaiꞌ gɇꞌ chiop tu ja daañxiꞌñdhaꞌ gu jaꞌtkam gio nam ja palhbuiꞌñdhaꞌ nam tu makgɨrxiꞌñdhaꞌ buiñor gu Dios, jix ioꞌm jir jix kɨɨꞌ ji, gio guꞌ puiꞌ jaꞌk ba duu na yaꞌ dɨr jaꞌp jaꞌk maakam ba tu aagix kaꞌ, cham tuꞌ nat jax jaꞌk tɨi tu ja daaxdhak gu Moisees bɨɨpɨꞌ dɨr. Gu xib guꞌ puiꞌ jaꞌk duu ji nach jax jaꞌk jix bhaiꞌ maaꞌn ñiꞌook bap duukaꞌ gook dɨt gu Dios, gam nach aꞌm ba tu biꞌyaꞌ guiꞌ nat tuꞌ tuch iimchuda.
7 Na guꞌ bɨjɨk nat tɨi tu ja daaxdhak gu Moisees gu Israel kam jaꞌtkam nam jax jaꞌk tuiꞌñgɨdaꞌ, jaꞌp ji buusan na dai daaman pɨx tu ja uañiꞌñkaꞌ gu Dios gu ja uaꞌtulhdharaꞌ, ɨrban dɨr jaꞌk baꞌ pu cham, siam chi moo miꞌ puiꞌ tɨi xi chu kuugalhdhidhaꞌ gɨt. Maakam aagɨt na duñiaꞌ gu Dios na baꞌ puꞌñi duuji bɨɨx dappaam tu ja uañdhix kaꞌ gu ja uaꞌtulhdharaꞌ gu jaꞌtkam, baꞌ jaꞌp ji buusniaꞌ na sia ɨrban dɨr ba tu ja uañdhaꞌ.
8 Gio ji nam guꞌ cham tuꞌx bhaiꞌ miꞌ puiꞌp jiimdaꞌ gu Israel kam jaꞌtkam nat jax jaꞌk tɨi tu ja daaxdhak gu Moisees. Tɨi dho miꞌ puiꞌ xi chu buadaꞌ am jɨꞌx na jax ja chiandaꞌ, guꞌ ji na guꞌ puiꞌ nam jax bam uaꞌtulhiꞌñdhaꞌ. Baꞌ puiꞌ jaꞌk tɨi gu Dios na jax chuꞌm tanoolh puiꞌ ma tu duñiaꞌ na jax jaꞌk jix bhaaiꞌ na tu ja uañdhaꞌ pu bɨɨx dappaam gu ja uaꞌtulhdharaꞌ, puiꞌ na jax bam kaiꞌch gu ñioꞌkiꞌñ miꞌ na paiꞌ tu uaꞌñix na jaꞌpnim kaiꞌch:
Kam aajim moo nañ paiꞌ dhuuk maakam tu jam daaxdhaꞌ na pim tuiꞌñgɨdaꞌ aapiꞌm na pim jir Israel kam jaꞌtkam gio aapiꞌm na pim jir bopxiꞌñ gu Judaa,
maakam ba tu aagix kaꞌ miꞌ dhɨr jaꞌp jaꞌk.
9 Ku guꞌ cham tuꞌ puiꞌ jaꞌk ji kiaꞌ nat jax jaꞌk tu ja daaxdhak gu Moisees jiñ aꞌmkam nam tuiꞌñgɨdaꞌ gu jam bopxi kat bɨjɨk na mɨt cham jɨꞌxkat miꞌ puiꞌ jii,
sia ku ñich tɨi ja palhbui nam bha bubuakiaꞌ mu dɨr Ejipto nam paiꞌ tu ja juantudat.
Puiꞌ kuñ baꞌ cham ja aꞌm tɨ nɨidhidhat jɨꞌk tanoolh.
10 Guꞌ dhiꞌ matgam nañ jax jaꞌk ɨlhiiꞌñ xib nañ tu daasaꞌ jam bui aapiꞌm Israel kam jaꞌtkam na tu aagix kaꞌ,
cham tuꞌ puiꞌ ji kiaꞌ na jax janoꞌ.
Xib jañ ji jam jujur am uaꞌnaꞌ ji guñ ñiꞌook,
baꞌ gammɨjɨ tɨꞌñchot miꞌ puiꞌ jiimdaꞌ pim nañ jax jix aaꞌ.
Aañ jam buip tuiꞌñgɨdaꞌ gammɨjɨ,
gio aapiꞌm mu dɨr bha jaꞌk jiñ buip tuiꞌñgɨdaꞌ.
11 Cham kam aaꞌndaꞌ na pim jum aꞌaagiꞌñdhaꞌ bɨɨx jɨꞌmaꞌn nañ jax jir tuꞌm kam piam nañ jax jaꞌk jix aaꞌ na pim tuiꞌñgɨdaꞌ,
na pim guꞌ bɨɨx jɨꞌmaꞌn jix bhaiꞌ bax mat kaꞌ guñ ñiꞌook.
Jix bhaiꞌ bax mat kaꞌ pim ɨp nañ jax jir tuꞌm kam,
bɨɨx jam jix mat kaꞌ na jɨꞌk jaꞌtkam,
sia guiꞌ nam jir gɇꞌgɇrkam gio guiꞌ na cham.
12 Gio gammɨjɨ pɨx jañ ba tu jam uañiꞌñkaꞌ gu jam uaꞌtulhdharaꞌ,
sia pim chi moo jax gɇꞌkam kɨꞌn jum uaꞌtulhiꞌñ,
panaas ku pim moo pu cham paiꞌm uaꞌtulhiꞌñdhaꞌ.
13 Baꞌ na puiꞌ kaiꞌch gu Dios na maakam ba tu daasaꞌ, dhiꞌ bhaan jix maatɨꞌ na cham tuꞌ ka bhaaiꞌ nat jax chu daasak gu Moisees bɨɨpɨꞌ dɨr, baꞌ cham xiim cham paiꞌ maatɨꞌ kaꞌ na jax jaꞌk tu aagix kat.