10
Gu Jesuus na bhaan ji uaꞌrgidhai tu aꞌgaꞌ gu kakasnir bipiaꞌdam
1 Baꞌp ja tɨtda gu Jesuus:
―Tuꞌ sɨlhkam jañ yaꞌ pu jam tɨɨdaꞌñ jaaduñ, gu jaroiꞌ noꞌt cham miꞌ dhɨr mu baa na paiꞌ kiidhaꞌ gu ja chikiir gu kakasnir, noꞌt guꞌ jaꞌp dɨr jaꞌk mu baa, dhiꞌr diꞌ kaꞌ gux ɨxkum na miꞌx chɨ ɨɨxdham kaꞌ gu kakasnir nam mi kuup.
2 Guꞌ noꞌt miꞌ dhɨr jaꞌk mu baa na paiꞌ kiidhaꞌ gu ja chikiir, dho gi guꞌr diꞌ kaꞌ ji gu bipiaꞌdam guiꞌ na jaroiꞌ ja nuukaꞌn,
3 na guꞌx maatɨt nɨiꞌñdhaꞌ guiꞌ na miꞌ tu nuukaꞌndaꞌ na paiꞌ kiidhaꞌ gu chikiir noꞌr diꞌ gu bipiaꞌdam, piam ku guꞌr jumai. Baꞌ dai na ba ja kupioꞌkdhaꞌ gu kakasnir noꞌ guꞌr dhiꞌ, guiꞌ baꞌ dai na pɨx ji ja baidhaꞌ nam jax chɨɨꞌ bɨɨx jɨꞌmaꞌn gu kakasnir tugiꞌñ. Baꞌ pɨx muiꞌp ji bubuakiaꞌ am, nam guꞌx maatɨt kaayaꞌ na dhiꞌr diꞌ guiꞌ na gammɨjɨ ja bipiaꞌdaꞌ.
4 Miꞌ dhɨr baꞌ nam paiꞌ dhuuk bɨɨx mu bubuakiaꞌ, dai na bɨɨpɨꞌ muiꞌ xi jimiaꞌ gu bipiaꞌdam paiꞌ na jaꞌk jix ja biaꞌram kaꞌ na joidham jix xaꞌiiꞌ, gu kakasnir tugiꞌñ baꞌ dai nam gatuuk dɨr pɨx miaꞌn bhɨɨyaꞌ nam mu oidhaꞌ, nam guꞌx dhaandaꞌ.
5 Dai noꞌr jumai gu bipiaꞌdam dho gi guꞌ cham jɨꞌxdhaꞌ mu oidhaꞌ am dho gi ji sia kut mi ɇɇk tɨi ja baidhim, piam ku gamaiꞌ tɨi ja sasdaꞌ. Pu jiboiꞌññiaꞌ am dho totdonɨi nam guꞌx ɨɨbhiꞌñdhaꞌ na cham jir diꞌ kaꞌ guiꞌ na gammɨjɨ ja bipiaꞌdaꞌ, nam guꞌx maatɨt kɇɇkɇꞌ nar jumai kaꞌ na paiꞌ dhuuk tɨi xi ja baiꞌñdhaꞌ.
6 Jaꞌpni tu ja aꞌgi gu Jesuus gu jaꞌtkam bhaan ji uaꞌrgidhak gu kakasnir, guꞌ ji na mɨt guꞌ pu cham maatɨt kai na gu jaꞌtkam ja aagɨt jup kaiꞌch, nam puiꞌ ji buan na gu kakasnir.
Gu Jesuus nap kaiꞌchdhaꞌ nar diꞌ gux kɨɨꞌ bipiaꞌdam
7 Baꞌp ja tɨtda ɨp gio gu Jesuus:
―Tuꞌ sɨlhkam jañ yaꞌ pu jam tɨɨdaꞌ, aañ jir diꞌ gu kiꞌñgob bhaiꞌ nam paiꞌ dhɨr mu baapak gu kakasnir mɨjɨ jaꞌk ja chikiir am.
8 Dai guiꞌ na mɨt bɨɨpɨꞌ yaꞌ tɨi ai dho gi guꞌr diꞌ am ji gux ɨꞌxkum nam ɨlhdat nam tɨ ɨɨxdhaꞌ gɨt gu kakasnir, guꞌ ji na mɨt guꞌ cham jax ja dooda.
9 Guꞌ xib aañ jir diꞌ ji gu kiꞌñgob bhaiꞌ na paiꞌ dhɨr mu tum bapkɨ mɨjɨ jaꞌk ɨrban dɨr, na baꞌ gu jaroiꞌ noꞌt jum guguuxdhak bhaiꞌ dhɨr mu baa dhiꞌ bhaan gu kiꞌñgob, joidham jix bhaiꞌ ba tu jimiaꞌ, na guꞌ bhaan ba tɨ nɨidhidhaꞌ guñ Gɨꞌkoraꞌ. Jaꞌp ji buusniaꞌ na jax maaꞌn gu kasnir na buusaidhai mɨjɨ dɨr chikiir tɨr gu bipiaꞌdam ba biaꞌraꞌ paiꞌ na joidham jix xaꞌiiꞌ kaꞌ, na baꞌx kɨɨꞌ kaꞌ jix dhuakam.
10 ’Guꞌ matgam guiꞌ nañ ja aaꞌ nam jaꞌp ji buan na gux ɨꞌxkum na mɨt bɨɨpɨꞌ yaꞌ tɨi ai, jaꞌp ji buus ji na mɨt bha ja koodam gu jaꞌtkam gam na mɨt bha tu ja ɨɨxdham. Guꞌ aañ matgam bha jii ji yaꞌ dhi oiꞌñgaꞌn bhaan nañ yaꞌ ja palhbuidhaꞌ gu jaꞌtkam, nañ ja aagiꞌñdhaꞌ nam jax jaꞌk duñiaꞌ nam baꞌ xib dɨr gammɨjɨ pu ba duduakaꞌ gu ja iꞌiiꞌmdaꞌ bhaan, na guꞌ ja aꞌm tɨ nɨidhidhaꞌ guñ Gɨꞌkoraꞌ.
11 Aañ jir diꞌ pɨx ɨp gux kɨɨꞌ bipiaꞌdam nañ gammɨjɨ ba ja nuukaꞌndaꞌ guñ kakasniraꞌ, cham jax bua sia ñich puiꞌ ma muu nañ tɨi pup xi ja palhbuidhimɨi noꞌt tuꞌ ba ji ja oi.
12 Cham tuꞌ puiꞌ na jax gu jaroiꞌ noꞌ umuaꞌñdhix pɨx na tu bipiaꞌdaꞌ, siam tɨix bhaiꞌ namkidhat chian na ja nuukaꞌndaꞌ gu kakasnir. Bɨɨpɨꞌ kat dho miꞌ dhɨr ji dhaiꞌññiaꞌ noꞌ muiꞌ ba jim gu bhan piam gu sɨɨꞌ. Cham ja joiꞌndai miꞌ xi ja iabui gu kakasnir, na guꞌ cham jir dɨɨlh gaꞌn kaꞌ. Gu bhan baꞌ dai na ba ja daꞌngiaꞌ jɨꞌk na ɨlhiiꞌñdhaꞌ, jaiꞌm pu paiꞌ nam jaꞌk boopoyaꞌ totdonɨi.
13 Na guꞌ guiꞌ na puꞌñi umuaꞌñdhix kaꞌ pɨx, cham tuꞌ jaꞌxbuiꞌ puiꞌ ja daꞌdaꞌ gu kakasnir na jax guiꞌ na dɨɨlh jir kakasnir tugiꞌñ kaꞌ. Puꞌñi dho baꞌ na bɨɨpɨꞌ kat ba jimiññolhiaꞌ noꞌt miꞌ ba ai gu sɨɨꞌ piam gu bhan. Tuꞌ gi na guꞌ bhaan pɨx maiꞌchɨkdaꞌ gu tuumiñ.
14 ’Guꞌ aañ matgam tuꞌ sɨlhkam ji nañ jir jix kɨɨꞌ bipiaꞌdam, cham jum aaꞌ na jaroiꞌñ ñamkiꞌñdhaꞌ. Jix bhaiꞌx ja mat kaꞌ iñ ɨp guiꞌ nam jɨꞌk jir jiñ kakasniraꞌ kaꞌ, gio guiꞌ mu dɨr bha jaꞌk puiꞌx bhaiꞌp xiñ mat kaꞌ am.
15 Jaꞌp na guñ Gɨꞌkoraꞌ nat bhañ joot na guꞌx bhaiꞌ xiñ maat aañ, gio aañ yaꞌ dɨr mu jaꞌk puiꞌx bhaiꞌp jix maat. Aañ baꞌ puꞌñix bhaiꞌp jix ja mat kaꞌ guiꞌ nam jɨꞌk bañ kaichuꞌ nam jaꞌp ji buan nam jir jiñ kakasniraꞌ, gam nañ jix ja joiꞌndat jix ja daꞌdaꞌ. Puiꞌ kuñ baꞌñ guguuxiꞌñ nañ mukiaꞌ ja aꞌmkam.
16 Ku guꞌ cham tuꞌ daipuꞌ jaꞌkbuiꞌñi pɨx am ji guiꞌ nam jaꞌp ji buan nam jir jiñ kakasniraꞌ nañ jɨꞌk ja biaꞌ xib, jaiꞌ pup ka jaiꞌch am ji matgam gu jaꞌtkam nam puiꞌp ji buan nam jir jiñ kakasniraꞌ, nam guꞌ puiꞌp ba tɨ jɨɨꞌñdhaꞌ aañ jiñ bui. Dai ji na ñich chakui yaꞌ ja aich jiñ chikiir am, kuñ ji guꞌ ka ja saaꞌnmɨraꞌ ji nañ maap ja bɨɨndaꞌ dhi jaiꞌñ kakasniraꞌ. Maaꞌn kap jañ baꞌ pɨx ba ja kukpadaꞌ, nañ guꞌ aañ dɨɨlh bar bipiaꞌdam kaꞌ xib dɨr.
17 ’Baꞌ guñ Gɨꞌkoraꞌ gɇꞌkam kɨꞌn xiñ dhaꞌdat xiñ kɨɨgalhiꞌñ nax bhaiꞌm taat nañ aañ dɨɨlh boiñ bhɨichdhaꞌ ja aꞌmkam gu jaꞌtkam, gio nax maat nañ muukɨi duadɨi giop bamgiaꞌ.
18 Ku guꞌ aañ chakui jaroiꞌñ muꞌaaꞌ ji gu dɨɨlh pɨx noꞌñ aañ cham aaꞌ, guꞌ jaꞌpji aañ dɨɨlh nañ ba xi chuñ maakim nam boiñ bhɨichdhaꞌ. Mukiaꞌ iñ ja aꞌmkam gu jaꞌtkam, miꞌ dhɨr jañ giop bamgiaꞌ duadɨi, nat guꞌ puꞌñi jaꞌk jiñ chɨɨdak bhañ joot guñ Gɨꞌkoraꞌ nañ tu duñiaꞌ.
19 Baꞌ gu gɇꞌgɇrkam Israel kam cham maaꞌn ñiꞌook kap duuk am na mɨt puiꞌ jɨꞌ kai na kaiꞌch gu Jesuus, nam guꞌ jaiꞌ dhɨt tɨi pɨx am tɨ jɨɨgiꞌñ.
20 Jaiꞌ guꞌx bhaamut pɨx kɇɇ am ji, jup kaiꞌch am:
―Chaꞌpim mi kɇɇkɇꞌ dhi maaꞌnkam. Naas ku tuꞌr jix kɨɨꞌ. Bhaan baax ji dhiꞌ gu cham kɨɨꞌ iiꞌmdaꞌ. Tɨɨꞌ na jax pɨk jix ñaanbim kaiꞌch.
21 Guꞌ ji nam guꞌ jaiꞌp kaiꞌch:
―¿Kux baꞌ puiꞌ jaꞌk jup tu aꞌgadaꞌ aa gu jaroiꞌ noꞌ cham kɨɨꞌ iiꞌmdaꞌ bhaan jup tuiꞌdhiꞌ? ¿Cham aa guꞌ maakam tu aꞌgadaꞌ gɨt noꞌ puiꞌ? ¿Jax ji na baꞌ guꞌ dhiꞌ daix bhaiꞌm duukam bhaan tu aꞌga, gio na ja duduadhiꞌñ gu cham ñiññia kam?
Gu gɇꞌgɇrkam Israel kam nam cham kɨɨgalhiꞌñdhaꞌ gu Jesuus
22 Baꞌ janoꞌ na paiꞌ dhuuk bax jɨɨpdhardaꞌ, ma tu piastatat jamɨt gu Israel kam jaꞌtkam bhammɨ Jerusaleen, nat guꞌ giop bam ai nam paiꞌ dhuuk piastatuꞌn gu gɇꞌ chiop bhaiꞌ nam paiꞌ dhɨr tu daan, nam bhaan tɨꞌñchokaꞌ janoꞌ na mɨt paiꞌ dhuuk tɨɨmu na mɨt kɨi.
23 Baꞌ gu Jesuus am pɨk bhɨjɨp ka oirɨ bhaiꞌ na paiꞌ ɨrdiꞌchim tu kuup bɨɨx xikoolh dhɨr gu gɇꞌ chiop na paiꞌ tɨm jɨppiꞌñ, nam Salomoon gaꞌn jix mat kaꞌ gu jaꞌtkam.
24 Baꞌ gu gɇꞌgɇrkam Israel kam miꞌ ji sooꞌmdhak bhaiꞌ ba tɨkka am gu Jesuus, jup tɨtda am:
―Gi noꞌp jup bach aagiꞌñ noꞌp aap jir diꞌ guch Xoiꞌkam na saak bha jimdaꞌ. ¿Jɨꞌx jach baꞌ mɨk jup ka tɨ nɨɨraꞌ nach baꞌ pɨk ba machiaꞌ? Kuch cham tuꞌ bhaan ka tɨtɨɨꞌñchokaꞌ.
25 Baꞌ gu Jesuus jup ja tɨtda:
―Dho gi nañ guꞌ tɨi bɨjɨk dɨr pu chuꞌm ba tu aꞌga, jaꞌpji na pim guꞌ aapiꞌm cham jiñ jɨɨgiꞌñ. Nɨiꞌñ japim ɨp nañ jix bhaiꞌm duukam jup tu bua bhaankamuꞌn guñ Gɨꞌkoraꞌ. ¿Kux cham aa dhiꞌ puiꞌ kaiꞌñkam bap jum kaiꞌch?
26 Guꞌ ji na pim guꞌ aapiꞌm cham tɨ jɨɨgiꞌñ sia kuñ tɨi jam nɨiꞌñchudat jup tu bua na tuꞌr jix bhaiꞌm duukam, na pim guꞌ cham tuꞌr dhiꞌ guiꞌ nam jaꞌp ji buan nam jir jiñ kakasniraꞌ.
27 Guꞌ matgam guiꞌ ji nam jɨꞌk tɨ jɨɨꞌñdhaꞌ aañ jiñ bui nam baꞌ puiꞌ ba ji bubuakiaꞌ nam bar jiñ kakasniraꞌ, pux maatɨt jiñ kaayaꞌ am ɨp noꞌñ ba ja baiꞌñ, nam guꞌx bhaiꞌ xiñ mat kaꞌ, gio aañ yaꞌ dɨr mu jaꞌk puiꞌx bhaiꞌp jix ja mat kaꞌ, baꞌ dai nam gammɨjɨ bañ kaichgɨdaꞌ miꞌ puiꞌ jiimɨt.
28 Aañ baꞌ miꞌ dhɨr xi ja aaꞌñdhai xi ja guguuxdhaꞌ nam miꞌ puiꞌ ba jimiaꞌ na jax jaꞌk jix aaꞌ guñ Gɨꞌkoraꞌ na baꞌ ja aꞌm ba tɨ nɨidhidhaꞌ, na baꞌ cham ka ja tulhiiñchudaꞌ gatuuk. Baꞌ cham jɨꞌxdhaꞌ jaroiꞌ kañ ɨɨxdhaꞌ sia tɨi ɨlhiiꞌñdhaꞌ gɨt.
29 Na guꞌx ioꞌm jir gɇꞌkam guñ Gɨꞌkoraꞌ, cham jɨꞌxdhaꞌ jaroiꞌ ka ɨɨxdhaꞌ gu jɨꞌk noꞌ mɨt jiñ kɇɇk nañ jax tu aꞌga miꞌ puiꞌ ba jii na jax jix aaꞌ, na guꞌ ja aꞌm ba tɨ nɨidhidhaꞌ.
30 Na guꞌ aañ gio guñ Gɨꞌkoraꞌ maaꞌn iiꞌmdaꞌ pɨx jup duuk ich gook dɨt.
31 Baꞌ gu gɇꞌgɇrkam Israel kam na mɨt jax daꞌngɨ gu joodai bax maꞌyasak kat am na mɨt kai na puiꞌ jɨꞌ kaiꞌch.
32 Guꞌ ji na guꞌp ja tɨtda gu Jesuus:
―¿Jax baꞌ ku pim baꞌ bhaiꞌ bañ ñɨiꞌñchuꞌn gu joodai? Na pim guꞌ tɨiñ ñɨiꞌñ nañ jix bhaiꞌm duukam jup tu bua bhaankamuꞌn guñ Gɨꞌkoraꞌ. ¿Dhiꞌ kɨꞌn aa pim baꞌ moo yaꞌ ba xiñ maꞌyasam?
33 Baꞌ gu gɇꞌgɇrkam Israel kam jup kaiꞌch am:
―Jaꞌpji na chich jum kai nap maakam pɨx ba kaiꞌch nap tɨi tu aꞌga na jax jaꞌk cham kɨɨꞌ kaꞌm nɨiꞌñ gu Dios, nap puiꞌ kaiꞌch na pim saak gook dɨt maaꞌn iiꞌmdaꞌp duuk gu Dios. Na guꞌ dhiꞌ panaas puiꞌ kat pɨx bap jum kaiꞌch nap jaiꞌ Dios jup jum ɨlhiiꞌñ, sia kup jir jaꞌppɨx maaꞌnkam. Cham ji nach jum juandaꞌ gɨt siap jix bhaiꞌm duukam jup tu bua, dai noꞌp cham puiꞌ jaꞌk kaiꞌchdhaꞌ gɨt.
34 Baꞌ gu Jesuus jup ja tɨtda ɨp gio:
―¿Kux aapiꞌm cham jɨꞌxkat tu jiñkaiꞌñ aa miꞌ na paiꞌ tu uaꞌñix gu ñioꞌkiꞌñ gu Dios, nap jum kaiꞌch: “Aapiꞌm jaꞌp ba ji bubuakiaꞌ na didios”?
35 ¿Cham aa guꞌ dhiꞌ cham tuꞌ pɨx jap tu uaꞌñix gu ñioꞌkiꞌñ? Guꞌ jaꞌpji maaxik ji puiꞌ ja tɨɨdak gu Dios gu bɨjɨk dɨr kam jam bopxi kat nam sap puꞌñi jaꞌp ji bubuakiaꞌ nam jir didios kaꞌ guiꞌ nam jɨꞌk sɨlhkam tuꞌ kaꞌm nɨiꞌñ.
36 Guꞌ baꞌ aañ puꞌñi ɨp xib, miꞌ puiꞌ xi chu duñiim iñ nat jɨꞌk jax jiñ chɨɨdak bhañ joot guñ Gɨꞌkoraꞌ yaꞌ dhi oiꞌñgaꞌn bhaan. Guꞌ ji na pim guꞌ aapiꞌm yaꞌ puiꞌñ chɨtda nañ gɇꞌkam kɨꞌn jiñ uaꞌtulhiꞌñ buiñor nañ puiꞌ xi jam tɨtda nañ guiꞌr maraaꞌn nat bhañ joot.
37 ¿Kux baꞌ guꞌ aañ tuꞌx bhaiꞌm duukam jup tu buadaꞌ gɨt aa noꞌ cham guñ Gɨꞌkoraꞌ bhañ jootsaꞌ gɨt? Tuꞌ ku pim baꞌp jiñ jɨɨgiꞌñdhaꞌ gɨt nañ jax tu aꞌga noꞌñ cham jix bhaiꞌm duukam jup tu buadaꞌ gɨt.
38 Piam noꞌ pim guꞌ moo jaꞌp cham jɨꞌx jiñ kaim nañ jax tu aꞌga, sia dai dho na pim xi chɨ nɨiꞌñdhaꞌ gux bhaiꞌm duukam nañ jup tu bua bhaankamuꞌn guñ Gɨꞌkoraꞌ na pim baꞌ miꞌ dhɨr ba machiaꞌ na sɨlhkam jiñ buip tuiꞌdhiꞌ nañ baꞌ bhaankamuꞌn jix bhaiꞌm duukam jup tu bua, cham tuꞌ gu aañ dɨɨlh pɨx, gam na pim baꞌ ba machiaꞌ nañ aañ yaꞌ dɨr mu jaꞌk buiñor jup tuiꞌdhiꞌ ɨp.
39 Baꞌ giilhim jix bhaak am na puiꞌ jɨꞌ ja tɨtda gu Jesuus. Tɨi aaꞌndaꞌ gɨt nam miꞌ pu buuplhiaꞌ, guꞌ ji nat guꞌ miꞌ dhɨr ja nakoo gu Jesuus, pu jii.
40 Sɨlh pu bhɨi bhammɨ baasɨꞌn dɨr jaꞌk na paiꞌr Jordaan Ak, jaꞌpni xiaꞌlhbui dhɨr na paiꞌ ja bopkonimɨk gu jaꞌtkam gu Juan, bhaiꞌ baꞌ pu oirɨdaꞌ.
41 Muiꞌ jaꞌtkam mu jimmɨdaꞌ am ji guꞌ na paiꞌ oirɨdaꞌ gu Jesuus nam jix kaim kaꞌ na joidham tu aꞌgadaꞌ, jup xi kaiꞌchɨt am:
―Guꞌ bak ji moor sɨlhkam ji na jax tu aꞌgadaꞌ gu Juan nap kaiꞌchdhaꞌ na saak puꞌñi bha jimdaꞌ dhich jaduuñ na bɨxchuꞌx aichuꞌn. Sia kut guꞌ dɨɨlh gu Juan cham tuꞌ jax dhuuk na tuꞌr jix bhaiꞌm duukam, ku guꞌr sɨlhkam ji na jax tu aꞌgadaꞌ.
42 Baꞌ muiꞌ tɨ jɨɨꞌñ jamɨt gu miꞌ oiꞌñkam buiñor gu Jesuus.