12
Gu ubii na mi choiꞌdhaꞌ guiꞌ na joidham uub tootnaran gu Jesuus
(Mt. 26:6‑13; Mr. 14:3‑9)
1 Baꞌ na xijum maaꞌn tanoolh pɨx ba biꞌchuꞌ na baꞌ moo bam aayaꞌ gu bhaan Paaskua taꞌm, muiꞌ ma jii gu Jesuus bhammɨ Betaania na paiꞌ kio gu Laasar guiꞌ nat duaꞌñdhak giop bamiiꞌ na ba muukix kat.
2 Baꞌx bhaiꞌm taatɨt ma chu bhaiꞌñ jamɨt gu koiꞌ gu jurnɨk kam nam tu onbaiꞌñdhaꞌ gu Jesuus, nam guꞌx bhaiꞌm taat nat miꞌ ba ai. Gu Laasar jaiꞌp ma chu juu bɨɨmaꞌn gu Jesuus maap ji dharaibuk mi sonpan guiꞌ na bhaan tum kuaꞌ, gu Marta baꞌ dai nat pɨx muiꞌ ji ja bhiiꞌñ.
3 Baꞌ gu Mariiya miꞌ ba ai na paiꞌ daakat tu kuaꞌ gu Jesuus ji uaꞌdat guiꞌ na joidham uub nax dhaꞌram namɨɨk, baꞌ miꞌ xi choiꞌdhak tootnaran giop xi gakiiꞌñxi kuupaꞌn kɨꞌn. Joidham ba tu uub ji guꞌ mɨjɨ baꞌk chɨr nam paiꞌ daraa, nat guꞌ bɨɨx kap mɨjɨ jaꞌp jim tɨɨmo.
4 Baꞌ gu Juudas Iskariote na maadɨt jir dhiꞌ gu mambhɨɨx gook gu noonbiꞌñ gu Jesuus na gatuuk maaxik kɨɨsaꞌ nam boi bhɨichdhaꞌ, jup kaiꞌch mi jaꞌp daakat:
5 ―¡Uu guꞌ alh jaꞌp moor tuꞌ kub ji baꞌ dhiꞌ! ¿Cham bhaiꞌ aa na alh jum gaꞌrai jɨꞌk baik jix chaꞌtmam ooꞌm aixim kɨꞌn gu tuumiñ mu jaꞌk ja makiaꞌ guiꞌ na alh cham bhaiꞌ nam paiꞌ dhɨr uꞌji kɨꞌn tu sabaꞌdaꞌ? Na guꞌ dhiꞌx dhaꞌram namɨɨk, na guꞌ giilhim joidham uub.
6 Ku guꞌ dhiꞌ na puiꞌ jɨꞌ kaiꞌch gu Juudas, cham tuꞌ ji na moo sɨlhkam jix ja joiꞌndat jup kaiꞌch guiꞌ nam cham tuꞌ biaꞌ, jaꞌpji na dɨɨlh tɨix gaamum gu tuumiñ ku baꞌ tɨi aaꞌndagɨt nam gaꞌraꞌ guiꞌ na joidham uub. Na guꞌ puiꞌ pu tu buadaꞌ na tɨi umuaꞌñdhix kaꞌ na kusbiodaꞌ gu ja tumñiꞌ gu jaiꞌ noonbiꞌñ gu Jesuus, dɨɨlh xi gaamui jɨꞌk na ɨlhiiꞌñdhaꞌ.
7 Baꞌp tɨtda gu Jesuus:
―Aap moo cham jax kaiꞌchdhaꞌ jiñ jaduuñ. Matgam guꞌ dhi Mariiya pu pu kaiꞌñkam ulhiiñ kat ji dhiꞌ na joidham uub na baꞌ puꞌñi miꞌ bañ choiꞌdhaꞌñ chooton am noꞌ ñich yaꞌ ba ai, nat guꞌ xib puiꞌ ba ji buus nam bañ yaaspaꞌ gu jaꞌtkam.
8 Guꞌ guiꞌ nam cham tuꞌ biaꞌ, matgam gammɨjɨ yaꞌp tuiꞌkaꞌ am ji jam bui na pim alh jup xi ja palhbuidhat ku gi kɨꞌn gu tuꞌ na ja aꞌm jum aagaidhaꞌ, nam guꞌ cham paiꞌm tɨꞌñcho. Guꞌ aañ matgam yaꞌ pɨx jaꞌp bhɨichuꞌ ji dhi oiꞌñgaꞌn bhaan, jaꞌp pɨk ba ji jiiñ chi guꞌ.
Gu gɇꞌgɇrkam nam bax muꞌaak kaꞌ gu Laasar
9 Muiꞌ jaiꞌ dhɨt gu Israel kam jaꞌtkam puiꞌ ba tɨ kai mɨt na bhaiꞌ dhɨr oirɨ Betaania gu Jesuus. Baꞌ muiꞌ ma jii mɨt na mɨt tɨ tɨɨgim noꞌ moo sɨlhkam bha oirɨ, gam na mɨt bhaan jim iatak nam jix chɨɨgik gu Laasar guiꞌ nat duaꞌñdhak giop bamiiꞌ gu Jesuus na tɨi ba yaaspich mukxikam.
10 Baꞌ giilhim jix bhaak am gu ja gɇꞌgɇrkam tuk guiꞌ nam bhaiꞌ gɇꞌ chiop ja aꞌmkam tu daandaꞌ dai gu Israel kam jaꞌtkam, jup kaiꞌch am nam sap bɨɨx muꞌaaꞌ gu Laasar bɨɨndai gu Jesuus,
11 na guꞌ sap dhiꞌr kuiñchaꞌn na gan mumkɨ nam baꞌ muiꞌ jaiꞌ dhɨt gu Israel kam jaꞌtkam mu jaꞌk pɨx ba kaichuꞌ gu Jesuus na mɨt ji chɨɨgɨk nat duaꞌñ, guiꞌ baꞌ miꞌ pɨx jaꞌp ji biꞌiim am.
Na gɇꞌkam kɨꞌn bhammɨ ba aayaꞌ Jerusaleen gu Jesuus
(Mt. 21:1‑11; Mr. 11:1‑11; Lk. 19:28‑40)
12 Muiꞌ jaꞌtkam bhaiꞌp tuꞌiiꞌ am ji guꞌ Jerusaleen nam tu piastat gu bhaan paaskua taꞌm. Baꞌ buimgidhak puiꞌ ba tɨ kai mɨt na sap mu jaꞌk ba jim gu Jesuus bhammɨ jaꞌk Jerusaleen.
13 Baꞌ na mɨt jax ɨꞌkɨ gu koꞌkmarak jaajaꞌ mɨjɨ xi ji dhuuꞌñ jamɨt na mɨt namkim mu na paiꞌ dhɨr muiꞌ ba jim jup xi kaiꞌchidhat gɇꞌ kɨꞌn:
―¡Jaꞌp moor jix uañ ji tuꞌ sɨlhkam dhiꞌ na jaroiꞌr jich gɇꞌkam tuk yaꞌ dhi Israel, na jaroiꞌ bhaankamuꞌn ya jaꞌp oirɨ guch Gɨꞌkoraꞌ!
14 Baꞌ gu Jesuus maaꞌn xim taiñbuidhak gu bhurru bhaiꞌ xi dhaibuk muiꞌp ba tu jimchudim na mɨt ba tɨɨ gu jaꞌtkam. Puiꞌ ji chu buus na jɨꞌk jax tu uaꞌñix gu ñioꞌkiꞌñ gu Dios miꞌ nat paiꞌ tum uaꞌnak bɨjɨk nap jum kaiꞌch:
15 Aapiꞌm moo cham tuꞌ bhaan jax jum aaꞌndaꞌ ji Jerusaleen oiꞌñkam.
Pu kani gɨt na miꞌñi dhɨr bhaiꞌ ba jimdaꞌ gu jam gɇꞌkam tuk alhiꞌch bhurru taꞌm.
16 Ku guꞌ gu noonbiꞌñ gu Jesuus pu cham maatɨt kɇɇkɇꞌ am ji na jax baꞌr jum duukam bɨɨx na jɨꞌk jax tu buadaꞌ, ni kum cham maatɨt kɇɇkɇꞌ ɨp guꞌ miꞌ na mɨt paiꞌ tu uaꞌnak gu bɨjɨk dɨr kam nam dhiꞌ aagɨt jup kaiꞌch. Nammɨ ji nat paiꞌ dhuuk muukɨk gio duadɨk jup ba jiix dhaam na mɨt baꞌ bhaiꞌx maatɨt ji kai na bak bɨɨx puiꞌ tu uaꞌñix ji tɨi na jɨꞌk jax tu buimɨk gu Jesuus, pɨx ji nam guꞌ cham maatɨt kɇɇkɇt.
17 Baꞌ bɨɨx guiꞌ na mɨt jɨꞌk tɨɨ gu Jesuus nat duaꞌñdhak giop bamiiꞌ gu Laasar na tɨi ba yaaspich mukxikam, mu jaꞌp pɨx jaꞌx puiꞌ tu ja aꞌgiꞌñdhaꞌ am gu jaiꞌ nam chakui maat.
18 Puiꞌ ku mɨt baꞌx bhaiꞌm ɨlhdhak muiꞌ xi ñam gu Jesuus mu na paiꞌ dhɨr muiꞌ ba jim, nam guꞌ puiꞌ ba tɇ kɇɇ na joidham jix bhaiꞌm duukam jup tu bua.
19 Guꞌ guiꞌ nam pariseos jum tɨɨtɨꞌndaꞌ guꞌ giilhim jix bhaak am ji, jup jum tɨ tɨtdaꞌ am mi jaꞌp oipot:
―¡Dho jaiñ na pim jax tɨ nɨiꞌñ! ¿Jax jachich gip ba dooda siach chɨi oꞌbhagiꞌñ? Nam guꞌ giilhim bɨɨx pɨx mu jaꞌk ba kaichuꞌ.
Nam ba gaꞌngadaꞌ gu Jesuus jɨꞌkchi guiꞌ nam griago ñiꞌook kɨꞌn tu aꞌga
20 Baꞌ jɨꞌkchi bhaiꞌp oipo am Jerusaleen guiꞌ nam griago ñiꞌook kɨꞌn tu aꞌgadaꞌ nam paiꞌp tuꞌiiꞌ gu muiꞌ jaꞌtkam, nam bhaiꞌ dhɨr tu daan xi chu piastatdat gu bhaan Paaskua taꞌm ja bɨɨm.
21 Baꞌ dhiꞌ jɨꞌ nam griago kɨꞌn tu aꞌga, mu jaꞌp ji chɨɨgɨk ba tɨkka am gu Piliip guiꞌ nar Betsaida kam na Galilea dɨbɨɨr bhaan bipioꞌ, soiꞌ xi chɨtda am na baꞌ ja aagiꞌñdhaꞌ, jup tɨtda am:
―¿Paa jaꞌk jax chuꞌiiꞌ gu Jesuus? Noꞌ pich iam jich aaꞌñ jiñ jaduuñ. Aach tɨix ñioꞌkdhak ji.
22 Baꞌ gu Piliip mu jimɨɨk ba aaꞌñdhim gu Anrees nam tuꞌ tɨkka gu jaꞌtkam, gook dɨt jamɨt baꞌ muiꞌ ma jii na mɨt aaꞌñdham gu Jesuus mu na paiꞌp tuꞌiiꞌ nam tɨ tɨkka guiꞌ nam griago ñiꞌook kɨꞌn tu aꞌga.
23 Baꞌp ja tɨtda gu Jesuus:
―Dho nat guꞌ xib yaꞌ bam ai jia nañ paiꞌ dhuuk muukɨi giop bamgiaꞌ kum baꞌ ba xiñ maachim nañ jir tuꞌp tuꞌm daꞌ guñ jaaduñ. Yaꞌ bar bhaan guꞌ nañ paiꞌ dhuuk giop ba jimiaꞌx dhaam na paiꞌx ioꞌm gɇꞌkam kɨꞌn bañ dhaasaꞌ guñ Gɨꞌkoraꞌ.
24 Na guꞌ dhiꞌ jaꞌpni jia na jax baꞌ gu kaiꞌñ gu tiriik, na cham jɨꞌxdhaꞌ muiꞌdhaꞌ noꞌ mu paiꞌ pɨx pu ulhñix, guꞌ dhiꞌm aaꞌndaꞌ ji na mu jaꞌp jum ɨxiaꞌ dɨbɨɨr taꞌm na baꞌ miꞌ dhɨr buusnɨi muiꞌ ba kaichaꞌ. Puꞌñi ɨp baꞌ aañ, bɨɨpɨꞌm aaꞌ nañ jiñ chulhiiñai mukiaꞌ ja aꞌmkam gu jaꞌtkam nam baꞌ miꞌ dhɨr puꞌñi bhaiꞌ ji machiaꞌ nañ jir tuꞌp tuꞌm daꞌ.
25 Baꞌ gu jaroiꞌ noꞌ daix aaꞌ na gammɨjɨx bhaiꞌ tu jimdaꞌ yaꞌ dhi oiꞌñgaꞌn bhaan, am tɨꞌñchokaꞌ na cham bhaiꞌ tu jimiaꞌ gatuuk. Guꞌ ji noꞌ guꞌ cham tuꞌ bhaan jax jim aagat tɨ jɨɨgiꞌñ aañ jiñ bui, siat chi bɨɨx aixim jix buam jum duukam bhaiꞌ aꞌmiram ji chu jii, dho gi guꞌx bhaiꞌ tu jimiaꞌ ji gatuuk, nañ guꞌ pu baidhikaꞌx dhaam na paiꞌ gammɨjɨx jɨkgɨm bap tuiꞌkaꞌ.
26 Baꞌ gu jaroiꞌ noꞌx aaꞌ nañ kaichgɨt jiñ aꞌmkam ba tu juandaꞌ, jum aaꞌ na bɨɨx juraaꞌn kɨꞌn tɨ jɨɨꞌñdhat miꞌ puiꞌ xi jimdaꞌ nañ jɨꞌk jax tu aꞌga, na baꞌ jaꞌp ji buusniaꞌ na gammɨjɨñ bɨɨm jup tuiꞌñgɨdaꞌ sia nar paiꞌ dhuuk, na guꞌx kɨɨgalhdhat bhaan ba tɨ nɨidhidhaꞌ guñ Gɨꞌkoraꞌ.
Gu Jesuus na ba tu aaꞌndaꞌ na jootom mukiaꞌ
27 ’Aañ moo cham puiꞌ ka tu tatdaꞌ ji xib, ampɨx puiꞌx buam tu tatdaꞌ. Chi na ñich guꞌ pu kaiꞌñkam pɨx bha jii yaꞌ dhi oiꞌñgaꞌn, cham bhaaiꞌ nañ jax jup ba ji chɨɨdaꞌ guñ Gɨꞌkoraꞌ: “Jiñ palhbuidhaꞌ ap jiñ Gɨꞌkoraꞌ nam cham jɨꞌxkat jax jiñ dhoodaꞌ guiꞌ nam xiñ bhaamkiꞌñ.” Jax dhui na ñich guꞌ pu kaiꞌñkam bha jii nañ yaꞌ puiꞌ tu kuugalhdhaꞌ nat jɨꞌk jax jiñ chɨɨꞌn. Guꞌ jaꞌpjani nañ tɨɨdaꞌ: “Jiñ palhbuidhaꞌ ap jiñ Gɨꞌkoraꞌ nañ baꞌ puiꞌ tu kuugalhdhaꞌ na pich jɨꞌk jax jiñ chɨɨdak bhañ joot, nam baꞌ machiaꞌ gu jaꞌtkam nap aap giilhim jir gɇꞌkam.”
28 Baꞌ miꞌ dhɨr bhaiꞌ ji chu aꞌga jix dhaam jaꞌk jup kaiꞌch:
―Xiñ palhbuidhaꞌ ap jiñ Gɨꞌkoraꞌ nañ puiꞌ tu kuugalhdhaꞌ na pich jax jiñ chɨɨdak bhañ joot, nam baꞌ machiaꞌ gu jaꞌtkam nap aap giilhim jir gɇꞌkam.
Baꞌ gɇꞌ kɨꞌn bhaiꞌ ba tum ñio bhammɨ dɨr jix dhaam jup tum kaiꞌch:
―Matgam jañich pu puiꞌ ba duu ji. Gɇꞌkam kɨꞌn jix bhaiꞌñ chaat iñ nap miꞌ puiꞌ tu kuugalhdhim nañ jax jum tɨtda. Jix ioꞌm jañ jix bhaiꞌ bañ chaat kaꞌ noꞌ pich bɨɨx puiꞌ ba tu kuugalh.
29 Baꞌ gu jaꞌtkam nam miꞌp tuꞌiiꞌ na mɨt kai nat bha tum ñio jix dhaam dɨr, jup kaiꞌch am nat sap tuꞌ pɨx gɇꞌ tɨr. Jaiꞌ baꞌ maakam jup tɨi mɨt, jup kaiꞌch am:
―Nobiiꞌñ guch Gɨꞌkoraꞌ ji nat bha tu aꞌgi.
30 Baꞌp ja tɨtda gu Jesuus:
―Dho aapiꞌm na bha jam guguuxiꞌñ dhiꞌ nat bha tu aꞌga, cham tuꞌ aañ, na pim sap baꞌ yaꞌ dɨr jaꞌp jaꞌk cham jax kam aaꞌndaꞌ.
31 Nat guꞌ xib yaꞌ bam ai na paiꞌ dhuuk ja aagiꞌñdhaꞌ gu Dios bɨɨx gu jaꞌtkam nam jɨꞌk miꞌ puiꞌ jimiaꞌ na jax jix aaꞌ, gio nam jɨꞌk cham miꞌ puiꞌ jimiaꞌ. Gio gu jaꞌook na yaꞌ tu daam kɨɨk dhi oiꞌñgaꞌn, miꞌ pɨx jaꞌp ji biꞌyaꞌ xib dɨr.
32 Na guꞌ aañ nam paiꞌ dhuuk jiñ xissapaꞌ kuruus taꞌm, muiꞌ bhaiꞌ ji chɨ jɨɨꞌñdhaꞌ am aañ jiñ bui.
33 Baꞌ dhiꞌ puꞌñi jaꞌk ja tɨtda gu Jesuus gu jaꞌtkam na ja aagiꞌñ na jax jaꞌk jum duuji mukiaꞌ.
34 Baꞌp tɨtda am gu jaꞌtkam:
―¿Gi na baꞌp jum kaiꞌch mi uꞌuan taꞌm nach tu jiñkuiꞌñdhaꞌ nat paiꞌ tu uaꞌnak gu Moisees na saak guch Xoiꞌkam na Dios bha jootsaꞌ, cham paiꞌ dhuuk mukiaꞌ noꞌt puꞌñi yaꞌ ba ai? ¿Jax ji kup baꞌp kaiꞌch nam aap jum sissapaꞌ kuruus taꞌm? ¿Kaꞌ guiꞌp jir jumaich Xoiꞌkam aa na bhaan tu aꞌga mi uꞌuan taꞌm na saak cham paiꞌ dhuuk mukiaꞌ?
35 Baꞌ gu Jesuus jup ja tɨtda ɨp gio:
―Aañ pɨx ba jam aagiꞌñ iñ jiñ jaaduñ nañ jax jiñ dhuñiaꞌ jootom, cham jañ moo puiꞌ pɨx jam tɨtda. Baꞌ noꞌ pim jix aaꞌ na pim jix chu maax kɨr bap tuiꞌkaꞌ, miꞌ pim puiꞌ ba jimiaꞌ nañ jɨꞌk jax tu aꞌga, na guꞌ aañ jaꞌp ji buusan nañ joidham gɇꞌ tanoor nañ jɨꞌx yaꞌ kapup oirɨ. Cham maat japim guꞌ na pim pa jaꞌk bhɨichuꞌ na pim guꞌx chu tukgam kɨr jup tuꞌiiꞌ.
36 Ba tɨ jɨɨꞌñdhaꞌ pim aañ jiñ bui nañ yaꞌ kap tuꞌiiꞌ jam bui nañ tu jam bɨꞌñxiꞌñ, na pim baꞌñ bɨɨm bap tuiꞌkaꞌ na paiꞌ joidham jix chu maax.
Baꞌ miꞌ na puiꞌ xi chu ja aꞌgidhimɨk gu Jesuus, miꞌ pɨx jaꞌp ji bhɨi, pu jii oꞌñchixim. Cham paiꞌ ka tɨɨ mɨt.
Na jax jir jum duukam nam baꞌ cham tɨ jɨɨgiꞌñ gu Israel kam jaꞌtkam buiñor gu Jesuus na tɨi tu ja aꞌgiꞌñ
37 Baꞌ pu cham tɨ jɨɨgiꞌñ am gu Israel kam jaꞌtkam buiñor gu Jesuus sia ku tɨi ja nɨiꞌñchudat jix bhaiꞌm duukam jup tu bua.
38 Puiꞌ ji chu buus nat jɨꞌk jax tu uaꞌnak gu Isaiiyas guiꞌ na bɨjɨk bhaankamuꞌn tu aꞌgimɨk gu Dios, nap jum kaiꞌch:
Cham jɨꞌxkat jiñ jɨɨꞌñ jamɨt gu jaꞌtkam jiñ Gɨꞌkoraꞌ nañ alh tɨi pup tu ja aꞌgidhimɨk,
ni sia kuñ chɨi ja nɨiꞌñchudat jix bhaiꞌm duukam jup tu bua.
39 Gio baꞌ jaꞌpnip tu uaꞌnak gu Isaiiyas kum baꞌ cham tɨ jɨɨgiꞌñ gu Israel kam jaꞌtkam buiñor gu Jesuus, na jaꞌpni muiꞌ ji kɨksa:
40 Gu Dios pɨx jup tu duu ji guꞌ nam baꞌ cham maatɨt tɨ nɨiꞌñdhaꞌ sia kum tɨi tɨ nɨiꞌñ na tuꞌ jax jum bua,
panaas ku moo kuukup kaꞌ gu ja buupui,
ni nam cham maatɨt kɇɇkɇꞌ na jax jir jum duukam kaꞌ sia kum tɨi kɇɇ na jɨꞌk jax tum aꞌga gu ñioꞌkiꞌñ,
nam jax dhui pɨx cham soiꞌm ɨlhdhaꞌ buiñor na baꞌ cham tu ja uañdhaꞌ gu ja uaꞌtulhdharaꞌ.
41 Pux maat jia gu Isaiiyas na guch Xoiꞌkam giilhim jir gɇꞌkam, puiꞌ kut baꞌ puꞌñi jaꞌk tu uaꞌnak na dhiꞌ aagɨt jup kaiꞌch na jɨꞌk jax tu duñiaꞌ.
42 Kum ti guꞌ moo siamri muiꞌ tɨ jɨɨꞌñ ji gu Israel kam jaꞌtkam buiñor gu Jesuus, kux guꞌ iam, gam sia jaiꞌ dhɨt guiꞌ nam jir ja gɇꞌgɇrkam tuk. Dai ji na guꞌx ɨxchuixim pɨx nam cham machiaꞌ guiꞌ nam pariseos jum tɨɨtɨꞌndaꞌ, nam guꞌx ja ɨɨbhiꞌñ nam ja iattulhdhai ja bui gu jaiꞌ gɇꞌgɇrkam pu maiꞌ ja ardimiaꞌ miꞌ dhɨr gɇꞌ chiop noꞌ mɨt jax dhuuk maat.
43 Nam guꞌ kax joojoiꞌñ nam miꞌ puiꞌ jiimdaꞌ nam jax jaꞌk jix kɨɨꞌ kaꞌm nɨiꞌñ gu jaꞌtkam, cham tuꞌ na jax jaꞌk jix aaꞌ gu Dios, gam nam kax aaꞌ nam mu dɨr bha jaꞌk bɨɨx pɨx tuꞌ kaꞌm ja nɨidhat pɨx jix bhaiꞌ ja tɨtdadaꞌ gu jaꞌtkam. Guꞌ noꞌ mɨt ba maat nam ba kaichuꞌ gu Jesuus, pu maaꞌn jimdam ja bhaamkidhaꞌ am jia.
Gu Jesuus nap kaiꞌchdhaꞌ nam jum tulhiiñaꞌ gatuuk guiꞌ nam jɨꞌk cham miꞌ puiꞌ jimiaꞌ na jax tu aꞌga
44 Baꞌp ja tɨtda ɨp gio gu Jesuus gɇꞌ kɨꞌn nam baꞌ kɇɇkɇꞌ:
―Gu jaroiꞌ noꞌt ba tɨ jɨɨꞌñ aañ jiñ bui, bɨɨx buiñor tɨ jɨɨꞌñdhaip jum duñiaꞌ guñ Gɨꞌkoraꞌ nat bhañ joot.
45 Piam noꞌt jaroiꞌx bhaiꞌ bañ maat nañ jir tuꞌp tuꞌm daꞌ, bɨɨx guiꞌ nat bhañ joot jup ba machiaꞌ nar tuꞌp tuꞌm daꞌ, cham tuꞌ dai aañ.
46 Na ñich guꞌ aañ bha jii jia yaꞌ dhi oiꞌñgaꞌn nañ yaꞌ tu ja bɨꞌñxidhaꞌ gu jaꞌtkam nam jix chu tukgam kɨr jup tuꞌiiꞌ, na guꞌ aañ jaꞌp ji buusan nañ joidham gɇꞌ tanoor, na baꞌ gu jaroiꞌ na ba tɨ jɨɨꞌñdhaꞌ aañ jiñ bui, jix chu maax kɨr ji biꞌyaꞌ.
47 Cham tuꞌ nañ aañ yaꞌ ɇɇji puiꞌ xi ja tɨtdaimɨi nam giilhim jix uꞌuaꞌtulhdhix ba ja tulhiiñchudaꞌ, guꞌ jaꞌpji nañ jaꞌkbuiꞌ kat yaꞌ ja palhbuidhaꞌ ji nam jax dhuuji cham jum tulhiiñaꞌ gatuuk. Miꞌ dhɨr jam baꞌ dɨɨlh jup bam tɨgiaꞌ noꞌ miꞌ puiꞌ jimiaꞌ nañ jɨꞌk jax tu ja aꞌgidhaꞌ, piam ku guꞌ cham. Dɨɨlh baꞌ bax maat guñ Gɨꞌkoraꞌ na jax ja doodaꞌ.
48 Piam kum jaiꞌ dhɨt cham jiñ kaim nañ jɨꞌk jax tɨi tu aꞌga nam cham jiñ kɨɨgalhdhat, cham jax bua dho. ¿Jax jañ gip ja tɨɨdaꞌ aañ? Jumaix jaiꞌch ji guꞌ guiꞌ na pɨk ja aagiꞌñdhaꞌ nam kuiñcha biaꞌ janoꞌ na paiꞌ dhuuk tum kuugalhdhaꞌ yaꞌ dhi oiꞌñgaꞌn, dai na xi ja aaꞌñdhai na mɨt sɨlhkam cham miꞌ puiꞌ jii nañ jɨꞌk jax tu ja aꞌgiꞌñ xib.
49 Nañ guꞌ aañ cham tuꞌ dɨɨlh pɨx puiꞌ tu aꞌga jia gammɨjɨ nañ dɨɨlh jax ɨlhiiꞌñ, jaꞌpji daipuꞌ nat jɨꞌk jax pɨx jiñ chɨɨdak bhañ joot guñ Gɨꞌkoraꞌ.
50 Na baꞌ gu jaroiꞌ noꞌt jiñ kɇɇk miꞌ puiꞌ ba jii nañ jɨꞌk jax tu aꞌga, pu baidhikaꞌ guñ Gɨꞌkoraꞌ jix dhaam jaꞌk na paiꞌp tuꞌiiꞌ, na guꞌ guiꞌ pɨx jir ñioꞌkiꞌñ dhiꞌ nañ jɨꞌk jax tu jam aꞌgiꞌñ, nat guꞌ puꞌñi jaꞌk xiñ aaꞌñdhak bhañ joot.