20
Gu Jesuus na duadɨi giop bamgiaꞌ
(Mt. 28:1‑10; Mr. 16:1‑8; Lk. 24:1‑12)
Baꞌ mummu nat paiꞌ buus na paiꞌ dhuuk cham ka tum juandaꞌ na bar tumiiñku taꞌm, kapbhuimuk nat jax kiaꞌpɨx jix dhaꞌnpam bhaiꞌ ji chu maaxir, gio muiꞌp ma jii gu Mariiya Magdaleena mu aiꞌ dɨꞌn kɨr na mɨt paiꞌ ulh gu tukgaꞌn gu Jesuus. Baꞌ mu nat ba ai, bhaiꞌ pɨx pu tɨ dɨꞌ bhɨjɨ dɨꞌn kɨr, mu pɨx jaꞌp kaat gu komaarak jodai na kɨꞌn bha kuupich. Baꞌ nat jax jaꞌk gɨi, daiꞌbus nat aaꞌñdham gu Simoon Peegro gio gu jumai guiꞌ nax ioꞌm jix dhaꞌdaꞌ gu Jesuus na puiꞌp kaichuꞌ, jup ja tɨtda mu ɇɇk:
―Jaroiꞌ bak baabuk maakam jaꞌk tɨkaam gu tukgaꞌn guch Gɇꞌkam tuk. Cham paiꞌ tu jaiꞌch mu na chich paiꞌ tɨɨ. ¿Jax nach baꞌ dui ka tɨgiaꞌ?
Baꞌ gu Peegro gio gu jumai na puiꞌp kaichuꞌ gu Jesuus, muiꞌ ma jii mɨt mu na mɨt paiꞌ tɨɨ gu Jesuus na mɨt tɨ tɨɨgim noꞌ moor sɨlhkam, daipuꞌ na mɨt jax puiꞌ tɨ kai, boopoꞌ am. Baꞌ gama jaꞌk dɨr jix ioꞌm kuudam muiꞌ xi mɨɨ gu jumai nam maap jiim gu Peegro, bɨɨpɨꞌ kat jummɨ ba ai na mɨt paiꞌ ulh gu tukgaꞌn gu Jesuus. Ku guꞌ cham tuꞌ mu baa ji mɨjɨ ɨrban dɨr, miꞌ dhɨr pɨx dɨɨrap dumaalh jum tɨkaak muiꞌ xi chɨ nɨiꞌñ mɨjɨ na mɨt paiꞌ tɨɨ. Cham paiꞌ tu jaiꞌch, dai gu jajannulh mi bɨɨt na kɨꞌn bhiibgich. Guꞌ baꞌ gu Simoon Peegro jaꞌx dhɨr miꞌp ba ai. Guiꞌ dho gi guꞌ mɨrdat mɨjɨmmɨ pu baa ji dɨꞌn kɨr na mɨt paiꞌ tɨɨ gu tukgaꞌn gu Jesuus. Ba tɨɨ ɨp na cham paiꞌ tu jaiꞌch, dai gu jajannulh pɨx mi jaꞌp tu giopan na kɨꞌn bhiibgich. Gio guiꞌ na moꞌram bhiibgix kat, mummu jaꞌp pɨx daa dɨlhkob puiꞌ xikoolh bhiibgix kam na jax bha tuꞌt moꞌram gu Jesuus, cham tuꞌ maap bɨɨt gu jaiꞌ jajannulh na kɨꞌn jup bhiibgich gu tukgaꞌn. Baꞌ gu jumai na puiꞌp kaichuꞌ gu Jesuus nat bɨɨpɨꞌ miꞌ ai, jaiꞌ muiꞌp ji baa dɨꞌn kɨr nat ji chɨɨgɨk gu Peegro nat mɨrdat mɨjɨmmɨ ji baa. Mɨjɨmmɨ baakɨk jix bhaiꞌ mi jaꞌp xi chɨ nɨnɨiꞌñ ɨp jaiꞌ, moo guꞌ maaxik ji na dai gu jajannulhiꞌñ pɨx mi bɨɨt na kɨꞌn bhiibgich gu tukgaꞌn gu Jesuus. Baꞌ pu tɨ jɨɨꞌñ nat sɨlhkam duadɨk giop bam miꞌ dhɨr, puiꞌ xim aaꞌ na cham tuꞌ paiꞌ ka muukix. Nam guꞌ bɨɨx guiꞌ na jɨꞌk kaichuꞌ gu Jesuus, chakui maatɨt kɇɇkɇt am na jax kaiꞌñkam jup jum kaiꞌch miꞌ na mɨt paiꞌ tu uaꞌnak gu bɨjɨk dɨr kam na puꞌñim kaiꞌch na duadɨi giop bamgiaꞌ sia ku mɨt mua. 10 Miꞌm baꞌ tɨi pup xi chɨ nɨnɨidhimɨk puiꞌ giop ma jii mummu nam paiꞌ tɨbiapkaꞌ, nam paiꞌp tuꞌiiꞌ guiꞌ nam puiꞌp kaichuꞌ gu Jesuus.
Gu Jesuus na miꞌ bam maaxdhaꞌ buiñor gu Mariiya Magdaleena
(Mr. 16:9‑11)
11 Guꞌ baꞌ gu Mariiya Magdaleena dɨɨlh miꞌ ji biꞌɨɨk suaak mi jaꞌp kɨɨkat nax buam jum aaꞌ na cham tu jaiꞌch gu tukgaꞌn gu Jesuus. Gu Peegro guꞌ ba jii gio gu jumai nam maap jiim. Baꞌ miꞌ puiꞌ na ji suakɨt gu Mariiya gio bhɨjɨp ka xi chɨ tɨɨ dɨꞌn kɨr dumaalh jum tɨkaak. 12 Bhɨjɨmmɨ pɨx ji ja tɨɨ nam daraa gook gu noonbiꞌñ gu Dios jix chooto tɨtɨꞌ kam na mɨt paiꞌ ka tɨkaak gu tukgaꞌn gu Jesuus, maaꞌn jaꞌpni dhɨr jaꞌk daa na paiꞌ moꞌtɨkat, gu jumai baꞌ miꞌ dhɨr jaꞌk na paiꞌ tootnatɨkat. 13 Baꞌp tɨtda am gu Mariiya na mu dɨr dɨɨrap bha tɨ nɨidhat suak:
―¿Tuꞌp baꞌ kɨꞌn moo jaꞌp jix buam jum aaꞌñ jaduuñ nap baꞌ suak?
Baꞌp ja tɨtda gu Mariiya:
―Dho nat tak gu jaroiꞌ yaꞌ dɨr baabuk paiꞌ nat jaꞌk jax dhuu gu tukgaꞌn guiꞌ nar jich gɇꞌkam tuk kat. Cham paiꞌ tu jaiꞌch. Cham maat ich dho baꞌ nat paiꞌ jaꞌk tɨɨ.
14 Baꞌ nat puiꞌ xi chɨꞌɨɨk bhaiꞌ sɨlh ji kɨkbo, na guꞌ dumaalh kaatɨt bhɨjɨmmɨ ka tɨ nɨiꞌñ dɨꞌn kɨr, miꞌ pɨx jaꞌp ji chɨɨ na kɨɨk gu Jesuus. Ku guꞌ pu cham maat ji gu Mariiya noꞌp jir diꞌ gu Jesuus, jaꞌp jum aaꞌ nar jumai. 15 Baꞌ bhaiꞌ ji ñio gu Jesuus, jup tɨtda gu Mariiya:
―¿Tuꞌ mam duuñ jaduuñ kup baꞌ moo jaꞌp suak? ¿Tuꞌp tɨi gaꞌnga?
Baꞌp tɨtda gu Mariiya:
―Dho gu tukgaꞌn guch gɇꞌkam tuk kat na miꞌ pɨx cham tu jaiꞌch bhɨjɨni na chich paiꞌ tɨɨ. Jaroiꞌ bak baabuk maakam jaꞌk tɨkaam. ¿Kaꞌp ti aap aa iam baabuk maakam jaꞌk tɨkaam? Jiñ aagiꞌñdhaꞌ ap jiñ jaduuñ na pich paiꞌ tɨɨ noꞌ pich aap bhɨɨk kuñ bhɨirai gio yaꞌp tɨkiaꞌ.
Guꞌ na guꞌ cham maat gu Mariiya noꞌp jir diꞌ gu Jesuus, jaꞌp jum aaꞌ na gu jaroiꞌ na miꞌ tu nuukaꞌn gu ɨꞌɨɨx na mi jaꞌp tɨ ɨꞌxchix miꞌ ba kɨɨk.
16 Baꞌp tɨtda gu Jesuus:
―¿Cham aap kañ maat Mariiya?
Baꞌ gu Mariiya miaꞌn dɨr jix bhaiꞌ bhaiꞌ xi ñɨiꞌñ, jir diꞌ gu Jesuus. Baꞌp tɨtda ebreo ñiꞌook kɨꞌn bhaiꞌ xi koomkɨk:
―¡Rabuuni! ¿Aapiꞌ aar diꞌ?
Rabuuni jaꞌp kaiꞌñkam jup kaiꞌch na sap bɨxchuꞌx chu maat.
17 Baꞌ gu Jesuus jup tɨtda:
―Aañiꞌ dhor diꞌ na ñich giop dua. Xi dhaiꞌññiaꞌ ap jiñ jaduuñ nap ja aaꞌñdharaꞌ gu jaiꞌñ jaaduñ nam jiñ kaichuꞌ mu nam paiꞌ tɨbiap. Jaꞌp jap ja tɨɨdaꞌ na ñich aañ ba jiix dhaam buiñor guñ Gɨꞌkoraꞌ guiꞌ na aapiꞌm jup jir jam Gɨꞌkoraꞌ gio baꞌ nar jam Dios tuk, nañ jax pu ba jam tɨtda bɨɨpɨꞌ dɨr.
18 Baꞌ gu Mariiya Magdaleena miꞌ pu bhɨi nat ja aaꞌñdham nat jax pu tɨɨꞌn gu Jesuus. Mummu ɇɇk nam paiꞌ tɨbiap bɨɨx guiꞌ nam jɨꞌk kaichuꞌ, ba ja aagiꞌñ nat giop ba dua gu Jesuus, bɨɨx jup xi ja aagiꞌñ na jɨꞌk jax tɨtda mu nat paiꞌm maax buiñor.
Gu Jesuus na miꞌ bam maaxdhaꞌ ja bui guiꞌ nam kaichuꞌ
(Mt. 28:16‑20; Mr. 16:14‑18; Lk. 24:36‑49)
19 Baꞌ moo janoꞌ gamaiꞌ nat ji jur, na guꞌ kiaꞌpɨx gio muiꞌp bam bhɨichuꞌ na paiꞌ dhuuk giop ba tum juandaꞌ, maaꞌn kap baꞌk chɨr jamɨt bam jumaap bɨɨx guiꞌ nam jɨꞌk kaichuꞌ gu Jesuus. Dai na mɨt jix bhaiꞌ bhaiꞌ xi siispak gu kiꞌñgob nam guꞌx chotdon noꞌ mɨt miꞌ ji bubua gu ja oꞌrosiiris tuk gu gɇꞌgɇrkam Israel kam, nam guꞌ jaꞌp jum aaꞌ nam ja uꞌji ja kuupaꞌ, puiꞌ kum baꞌx bhaiꞌm kuupat mɨjɨ daraa. Baꞌ gu Jesuus miꞌ jim maaxdhak ɨrban dɨr nam paiꞌ daraa muiꞌ ba ja ñioꞌki, jup ja tɨtda:
―Aañ moo jaiꞌ ya jaꞌp ɨp jiñ jaaduñ.
20 Baꞌ xi ja nɨnɨiꞌñchuꞌn gu noonbiꞌñ miꞌ na paiꞌ tɨ dɨɨdɨꞌ na sissapich gio bha janoꞌmaram na mɨt sɨi. Baꞌ guiꞌx bhaiꞌm ɨlh jamɨt na mɨt ba tɨɨ, na mɨt guꞌ ba maat na dhiꞌr diꞌ gu Jesuus nat duadɨk giop bam. 21 Baꞌp ja tɨtda ɨp gio gu Jesuus:
―Jix bhaiꞌ pim jum taat kaꞌ na ñich yaꞌ ba ai. Aañ bhaiꞌ pɨx puiꞌ jam tɨɨdam na pim jix bhaiꞌm ɨlhdhai naiꞌ xi jimiaꞌ bɨɨx kap na pim tu ja aꞌgiꞌñpuꞌ gu jaꞌtkam. Jaꞌp na jax aañ na ñich bha jii yaꞌ dhi oiꞌñgaꞌn na ñich bha tu jam aꞌgidham nat paiꞌ dhuuk bhañ joot guñ Gɨꞌkoraꞌ, puiꞌ kuñ baꞌ aañ yaꞌ dɨr jup jam jootos aapiꞌm.
22 Puiꞌ xi ja tɨɨdak naiꞌ xi ja buxcha bɨɨx, baꞌp ja tɨtda:
―Jaiñ. Dhiꞌñix Dhuuduꞌ kam jix Uañ Iiꞌmdaꞌ jam aꞌm jup tuiꞌñgɨdaꞌ yaꞌ dɨr jaꞌp jaꞌk 23 na jam mattudidhaꞌ na pim jax jaꞌk tu ja aꞌgidhaꞌ gu jaꞌtkam. Baꞌ guiꞌ nam jɨꞌk tɨ jɨɨꞌñdhaꞌ na pim jɨꞌk jax tu ja aꞌgidhaꞌ, baꞌ uañchudhix kaꞌ gu ja uaꞌtulhdharaꞌ. Guꞌ baꞌ guiꞌ nam jɨꞌk cham tɨ jɨɨꞌñdhaꞌ, cham tuꞌ ja uañchudhix kaꞌ, puiꞌ nam jax bax uꞌuaꞌtulhdhix kaꞌ, nam guꞌ cham jɨꞌxdhaꞌ uanaꞌ gu dɨɨlh pɨx.
Gu Tomaas na ba tɨ jɨɨꞌñdhaꞌ nat sɨlhkam giop dua gu Jesuus
24 Baꞌ gu Tomaas guiꞌ na maadɨt jir diꞌ gu mambhɨɨx gook gu noonbiꞌñ gu Jesuus, guiꞌ nam Gook Dɨm kɨꞌn jup jix mat kaꞌ, janoꞌ pɨk cham miꞌp tuꞌiiꞌ nat paiꞌ dhuuk miꞌ ai gu Jesuus ja bui guiꞌ nam kaichuꞌ. 25 Baꞌ guiꞌ xi aagiꞌñ am, jup tɨtda am:
―Giop ba dua guch Gɇꞌkam tuk. Ba tɨɨ chich.
Baꞌp ja tɨtda gu Tomaas:
―Chaam ji nañ tɨ jɨɨgiꞌñ nar diꞌ. Jɨɨꞌ ji noꞌ ñich moo dɨɨlh tɨɨ gu noonbiꞌñ miꞌ na paiꞌ sissapich nañ baꞌ jam jɨɨgiꞌñdhaꞌ, nañ miꞌ xi bapsadaꞌ guñ dheeꞌn miꞌ na paiꞌ tɨ dɨɨdɨꞌ gio bhaiꞌ jaꞌk janoꞌmaram na mɨt paiꞌ sɨi. Xib jañ ji chakui tɨ jɨɨꞌñdhaꞌ ji sia ku pim jax jiñ chɨtda.
26 Baꞌ gatuuk xijum baik tanoolh jurniꞌñ kɨꞌn gio mɨt maap jup mam jumaap bɨɨx guiꞌ nam jɨꞌk kaichuꞌ gu Jesuus maaꞌn kap baꞌk chɨr jix bhaiꞌ xim kuupak. Janoꞌ dho gi baꞌ bɨɨx miꞌp tuꞌiiꞌ ji gu Tomaas. Baꞌ jaꞌxpɨx nam miꞌ ka tu aꞌgichuꞌ, miꞌ dhɨr jaꞌp pɨx bhaiꞌ ji ñio ja saagiꞌñ gu Jesuus, jup ja tɨtda:
―Aañ gio bha jaꞌk ɨp jiñ jaaduñ.
27 Miꞌ dhɨr baꞌp tɨtda dai gu Tomaas:
―Aañ pɨx jir diꞌ na ñich giop duañ jaduuñ. Kanip xi chɨɨꞌ na dɨɨdɨꞌ guñ ñoonob miꞌ nañ paiꞌ sissapich. Miꞌp xi bapsadaꞌ gum deeꞌn nap baꞌ cham jax tɨꞌyaꞌ nar iatdaꞌ, gio yammɨni jaꞌk jap jup xi bapsadaꞌñ janoꞌm am na mɨt paiꞌñ xɨi. ¿Kaꞌ moo jaꞌp jix xijai aa nap bɨɨx jum jur kɨꞌn tɨ jɨɨꞌñdhaꞌ nañ aañ pɨx jir diꞌ na ñich giop dua?
28 Baꞌ giilhim jix bhaiꞌm ɨlh gu Tomaas, jup kaiꞌch:
―¡Aaja guñ Gɇꞌkam tuk! Giop dua ji bak guꞌ sɨlhkam gu Dios jiñ Gɨꞌkoraꞌ.
29 Baꞌp tɨtda gu Jesuus:
―Na pich paiꞌx bhaiꞌ xiñ chɨɨ Tomaas na pich baꞌ ba tɨ jɨɨꞌñ nañ aañ jir diꞌ na ñich giop dua. Guꞌ cham tɨ jɨɨꞌñdhat ap ji na pich chakui tɨɨgɨk guñ ñoonob. Jaiꞌ joidham pu tɨ jɨɨgiꞌñ am na ñich sɨlhkam giop dua nat jax puiꞌ tɨm tɨi, sia ku mɨt cham paiꞌñ chɨɨ gu maaxik.
Nat jax kaiꞌñkam tum uaꞌna dhi ñiokiꞌñ gu Dios
30 Muiꞌ ji guꞌ nat tɨix bhaiꞌm duukam jup tu duu gu Jesuus ja nɨiꞌñchudat guiꞌ nam jɨꞌk kaichuꞌ, jaꞌpji na guꞌ cham bɨɨx ya daaxix dhi uꞌuan taꞌm. 31 Daipuꞌ dhiꞌ na jɨꞌk pɨx yaꞌ tu daa na pim ba nɨiꞌñ, na pim baꞌ tu jiñkuidhai tɨ jɨɨꞌñdhaꞌ na gu Jesuus jir diꞌ guch Xoiꞌkam na maaxik yaꞌ xi oilhimɨk dhi oiꞌñgaꞌn bhaan, nar Maraaꞌn gu Dios nat bha joot. Na baꞌ gu jaroiꞌ na tɨ jɨɨꞌñdhaꞌ buiñor baidhikaꞌx dhaam jaꞌk na paiꞌ gammɨjɨ pu ba duakaꞌ.