4
Na ba tum daandaꞌ buiñor gu Dios bhammɨx dhaam
1 Baꞌ miꞌ dhɨr bɨɨx dhiꞌ puiꞌ, bhammɨ jaꞌk jup ba tum maax jix dhaam. Maaꞌn kap gɇꞌ kiidhaꞌ na paiꞌ bɨɨx xikoolh dhɨr kuup na paiꞌ tuut gu baꞌbhak, kupioꞌkix ji guꞌ, cham tuꞌ kuup. Baꞌp jiñ chɨtda ɨp gio guiꞌ na miꞌ tuñ aꞌgiꞌñ, nax ioꞌm gɇꞌ tu ñiok jaꞌxbuiꞌ na jɨꞌx tu kuu gu kuichdhakar:
―Bhaiꞌ xi jiim yammɨni jaꞌk nañ paiꞌp tuꞌiiꞌ, nañ tɨm tɨꞌñchodaꞌ na jax chum duñiaꞌ janoꞌ nañ paiꞌ dhuuk tu kuugalhdhaꞌ yaꞌ dhi oiꞌñgaꞌn.
2 Baꞌ nat guꞌ gɇꞌñ aꞌm bam tajaa gux Dhuuduꞌ kam jix Uañ Iiꞌmdaꞌ, bhammɨ ñich ba ai jix dhaam. Baꞌ bhaiꞌ kɨɨk maaꞌn gu atooxkor nam jax chuꞌm bhaan daraakaꞌ guiꞌ nam jix ioꞌm jir gɇꞌgɇrkam. Jaroiꞌ maadɨt baꞌ bhaiꞌ dhaa bhaan dhiꞌ dhi atooxkor.
3 Joidham jix aꞌbhar totbik gu tɨiꞌdhar gaꞌn gio dɨɨlh, jaꞌp na jax chuꞌm totbikdaꞌ gu joodai guiꞌ nax ioꞌm jix dhaꞌram namɨɨk yaꞌ dhi oiꞌñgaꞌn. Gio maaꞌn guiꞌ na jaꞌp tuꞌm na kiꞌoor bhaiꞌp kɨɨk daam dɨr na paiꞌ daa, puiꞌ bɨɨx aixim tuꞌm kɨꞌn jup mɨmɨim joidham jix aꞌbhar.
4 Gio baꞌ moo bɨɨx xikoolh dhɨr jup tuut ɨp jaiꞌ maaꞌn ooꞌm daman maakob gu aꞌtoxkar nam jax chuꞌm bhaan jup dadarrɨ guiꞌ nam cham pɨk jir gɇꞌgɇrkam kaꞌ. Bɨɨx jɨꞌmaꞌn dhi aꞌtoxkar bhaan daraa am maaꞌn ooꞌm daman maakob gu jaꞌtkam nam bar jagɨꞌgɨr paꞌ, nam jir tujuandam tugiꞌñ gu Dios. Jix chooto tɨ tɨꞌ am bɨɨx jɨꞌmaꞌn, gio nam ja tuttu gu kukrun jix uꞌuam totbikdam.
5 Baꞌ giilhim gɇꞌ tɨm tɨroon miꞌ na paiꞌ daa gux ioꞌm Gɇꞌkam, jaꞌp na jax kaiꞌchdhaꞌ gu duuk noꞌ tɨrooñ, gio baꞌ na gɇꞌ kɨꞌn tum aꞌga. Amuub jaꞌpni bɨɨpɨꞌ dɨr baꞌp mɨmɨim guiꞌ na jaꞌp tuutuꞌm na kañdhiir xijum gok kap, dhiꞌ pɨx puiꞌ jaꞌk jum maaxiꞌñ gux dhuuduꞌ kam jix uꞌuañ iꞌiiꞌmdagaꞌn gu Dios.
6 Gio baꞌ gu suudaiꞌ mi jaꞌp jup suuꞌn joidham jix kɨɨꞌx uañ, cham paiꞌ ikooraꞌ.
Gio baꞌ moo bɨɨx xikoolh dhɨr miꞌ na paiꞌ daa gux ioꞌm Gɇꞌkam gio gu jaiꞌ nam jir tujuandam tugiꞌñ, miꞌp guguuk am maakob gu sasoiꞌ kam tuutuꞌm nam jir dudua kam gio nam puiꞌ ja jur jup biaꞌ na jax gu jaꞌtkam, bɨɨx kap tu buupui am na jɨꞌx jir ja tutkuꞌ.
7 Maaꞌn jaꞌp tuꞌm na gu mabiiꞌñ, jumai baꞌ jaꞌp tuꞌm na gu tuur, gio baꞌ moo gu jumai jaꞌp tuꞌm ɨp na gu maaꞌnkam, gio baꞌ moo gu jumai jaꞌp tuꞌm ɨp na gu bhaꞌaaꞌ na jax tuiꞌñgɨdaꞌ noꞌ daiꞌchuꞌ.
8 Bɨɨx jɨꞌmaꞌn dhi sasoiꞌ xijum maaꞌn tu kakarbo am, sia bɨɨx kap tu buupui am na jɨꞌx jir ja kakarbo, daam dɨr gio bɨtaaꞌn dɨr. Baꞌ gammɨjɨ cham jum jɨɨpiꞌñkaꞌ am nam laalaꞌndaꞌ nam gɇꞌkamtuꞌndaꞌ gu Dios, jup kaiꞌchdhaꞌ am:
Jaꞌp moox uañ kɨꞌn kɨɨk ji dhi Dios jich Gɨꞌkoraꞌ na yaꞌ daa.
Joidham bɨxchuꞌx aichuꞌn na pu tu duñiaꞌ,
na guꞌx ioꞌm jir gɇꞌkam.
Dhiꞌx ioꞌm bɨjɨk dɨr pux jaiꞌch na chakui jaiꞌch kat gu oiꞌñgaꞌn,
gio xib yaꞌ dɨr jaꞌp jaꞌk gammɨjɨ pux jaiꞌch kaꞌ.
Dhiꞌ baꞌ dɨɨlh giop kuugalhdhaꞌ gu oiꞌñgaꞌn.
9-10 Baꞌ gammɨjɨ gu maakob sasoiꞌ, nam paiꞌ dhuuk gɇꞌkamtuꞌndat taxchaabgiꞌñdhaꞌ guiꞌ na bhaiꞌ daa gɇꞌ atooxkor taꞌm na gammɨjɨ pu dua sia nar paiꞌ dhuuk, gu maaꞌn ooꞌm daman maakob gu jaꞌtkam nam bɨɨx xɨkoolh dhɨr daraa, jotmodaꞌ ja oꞌlhia kɨꞌn guꞌkɨt tu daandaꞌm ɨp buiñor, nam puiꞌp gɇꞌkamtuꞌndaꞌ, xi ja kookosat am gu ja kukrun mu xi ja daraasdat jaꞌpni bɨɨpɨꞌ dɨr na paiꞌ daa gu Gɇꞌkam. Jup kaiꞌchdhaꞌ am:
11 Dai aap jix bhaiꞌ nam tuꞌ kaꞌm jum nɨidhat jum gɇꞌkamtuꞌndaꞌ gammɨjɨ Dios jich Gɨꞌkoraꞌ,
nap guꞌx ioꞌm jir gɇꞌkam,
gio nap bɨxchuꞌx aichuꞌn nap pu tu duñiaꞌ.
Tɨɨꞌ na pich jup tu duu bɨɨx na jɨꞌk tuꞌx chu jaiꞌch,
sia guiꞌ nam jir tu dudua kam,
aap ja taiñbuiꞌñ gu iiꞌmdaꞌ nam kɨꞌn dudua xib.