Fangkenio We Foatogiaen Luke
1
Fangkenio we Foatogiaen Luke
1 Aerhaengerhaeng Theophilus:
Aeremas towunap re oarhorho pwe repwe foatogi kkepesaen meeta kka a wewwen me neeimaem.
2 Iir ra foatogi meeta kka e itto ngaeniir me reer rhooakka ra fasiun weri minikkeei me nee rhaepetaen nge ra aepesa iiy kkepas mwamwaai we.
3 Iwe een pwonno iga iya wori firhiy oanongaen minikkeei saengi pweoneotaen, iya niuwaennei pwe epwe mwamwaai pwe ipwe foatogi wunuunun aetettaeniin ngaeniug.
4 Iya feeori minneei pwe een wopwe giuneei gacchiuw minna wenewenen oanongaen meeta kkewe ra kapwiung ngaeniug.
Kkepesaen Wupwutiwen John Baptist
5 Noan oatowe Erotes eno pwe kingaaen Judea, eno erhai patere itan Zechariah, iiy e tapweei tettaenin patereen Abijah. Itaen rhooapwut na rhooan ngaenneyan nge Elizabeth; nge iiy epwan itto saengi eew faminiin patere.
6 Iir me riiurhai nge e igin mwamwaai noan meneweer faaen mesaen Deus nge re tapweei gacchiuw oanongaen aaen Soamwoon anniug me akkiuneo.
7 Iir esooar naiiur pwe Elizabeth ese mmwenen nainai, nge igina mwo nge ra igin tugufaeyi.
8 Eraaen nge Zechariah a itinong feeori aan engaang noan Temple we, pwe a toori oaton ginigin we aan epwe engaang noan raaenin we.
9 Noan peigin aaen engaang patere, nge iiy minne ra fini pwe epwe fifi oappwongesaen wooan antar. Iwe a toonong noan Temple we aaen Soamwoon,
10 nge rhooa towunap kkewe reno niugiun pwe re maeipin reen oatowe iiy e fifi oappwongas kkewe.
11 Angkenus we naiun Soamwoon a pwae ngaeni, nge e iu peig mwaaenen antar we igiwe oappwongas we eno ee.
12 Oatowe Zechariah a weri mwaaen we, a riu nge a mesag tae.
13 Angkenus we a aengaeni pwe, “Wosoapw mesag, Zechariah! Deus a rongorong oamw maeipin, iwe Elizabeth we reemw epwene naini erhai aetemwaaen. Wopwe aeitae ngaeni pwe John.
14 Epwene ifa mwo oamw wenepwu me pwapwa, iwe me aar aaemweoi wenepwu reen aan supwutiw.
15 John epwene igin taegias me faaen mesaen Deus. Esoapw iun wine me aerhi. Saengi rhag aan wupwutiw epwene sseog reen Espritu Santus,
16 nge iiy epwene pwigiir towunepeer re Israel ngaeni Soamwoon we aar Deus.
17 Iiy epwe gommw me weni mmwaei Soamwoon, pwe e mamaaw pwe taeppen rhag profeta we Elijah. Epwe aesefaaeni fengaenniir saam me naai pwe repwe eew rhag; iiy epwe wegiti sefaaeniir rhooa serong feon ngaeni niunniuwaen mwamwaai; nge epwe oamoannaar tae aeremas weni mmwaei Soamwoon.”
18 Zechariah a aengaeni angkenus we pwe, “Epwe ifa wusun nge iya giuneei pwe ennet minneei? Ngaang iya tugufaeyi, nge manna pwiuniuwaei nge a pwan tugufaeyi.”
19 “Ngaang Gabriel,” mwaeniaen angkenus we. “Ngaang iyiu weni mmwaen Deus, iwe iiy minne efang ngaang pwe ipwe pwigito kkepas mwamwaai een reemw.
20 Nge een wose niugiuniug ngaeni mwaeniaei, nge minneei epwe noa pwaetae minna wenewenen noan oaton naan. Iwe nge iga wose niugiuniug, een wosoapw mmwenen kkepas no; wopwene anniug noa rhag toori aan itto iiy raaenin na iya fasiun ppwoneei ngaeniug.”
21 Noan oateei nge aeremas re wewweti Zechariah nge ra niunniuwaennei aere meeta a igin itinong pwongiy noan Temple we reen.
22 Enoa toowow, nge esa mmwenen kkepas ngaeniir no, nge ra giuneei pwe eyor minne a itinong weri me noan Temple we. Igiwe esa mmwenen kkepas no, iwe a taenepom ngaeniir rhag.
23 Oatowe a moanno noa engaang we aan noan Temple we, Zechariah a sefaaen noa nee iimw.
24 Enoa eew oaton nge Elizabeth a pwoopwo nge a no rhag nee iimw noan nimowu meram.
25 “Ennaen igina minne Deus a tipaengiaei,” mwaeniaen niewe. “A arhiuwa saengiaei aessaewaei me neeiir rhooanap!”
Kkepesaen Wupwutiwen Jesus
26 Noan oawonowuwaen meremaen Elizabeth Deus a fangetiw angkenus we Gabriel noan eew aepinoamwon Galilee itan Nazareth.
27 Eyor eew aan kkepesaen oarong ngaeni erhai rhooapwut a kkefoat ngaeni mwaaen we itan Joseph, iwe itto saengi teeo we aan king David. Itan nge Maria.
28 Angkenus we a itto reen niewe nge a iura pwe, “Oapoas epwe no reemw! Soamwoon eno reemw nge a aewenepwuwoag.”
29 Maria a gin riutae reen miniwe mwaeniaen angkenus we, nge a niuwaennei meeta faan iiy kkepas kkewe.
30 Angkenus we a aengaeni niewe pwe, “Wosoapw mesag, Maria; pwe Deus minne e igin mwamwaai ngaeniug.
31 Wopwene pwoopwo nge wa nainitiw erhai aetemwaaen, nge wa aeitae ngaeni pwe Jesus.
32 Epwe igin taegias nge epwe ffai pwe iiy naiun Deus na oarosaen taegias. Soamwoon Deus epwene feeori pwe iiy king taeppen rhag David we aan rhaepeto,
33 nge epwe no pwe king reen teeo we aaen Jacob oanongaen oat; minna mweoiun ina esooar aigiugiun!”
34 Maria a aengaeni angkenus we pwe, “Ngaang erhai piirgo. Epwe ifa wusun rhag nge a mmwen minneei?”
35 Angkenus we a iura pwe, “Espritu Santus epwene ittiw woamw, nge minna kkaeinen Deus ina oarosaen taegias a no woamw. Nge faaen minneei nge aetena esooar epwene ffai pwe Naiun Deus.
36 Wo maengiy rhag Elizabeth we re pwugusoamw? Iwe re iura pwe esoapw mmwenen nainai no, nge igina nge a wonowu mereman, inamwo iga a igin tugufaeyi.
37 Pwe esooar eew meeta ne Deus esoapw mmwenen feeori.”
38 “Ngaang erhai naiun Soamwoon rhooan akkiuneo,” aaen Maria iura. “Nigiti pwe epwe wen ngaeniaei petenaen kkepas mwu wa iura.” Iwe angkenus we a siusaengi niewe.
Maria a Noa Emwaeri Elizabeth
39 Ese mmwaei mwo me weni mwirin nge Maria a oamoannatae epwe mwekkaei noa reen eew aepinoamw eno neeiin rhugun Judea.
40 A noa reen imwaen Zechariah pwe epwe noa koapwong ngaeni Elizabeth.
41 Igiwe Elizabeth a rongorong aaen Maria koapwong nge aetewe naiun a mwagiut me noan upwan. Elizabeth a sseog reen Espritu Santus
42 iwe a aekkepwas faeregit tae nge a iura pwe, “Een minne wa oarosaen wenepwu me neeiir rhooapwut, nge epwan wenepwu aetena wopwe naini!
43 Meeta ppweoniun aaen min mwamwaai eei aan epwe itto wen ngaeniaei, iye nie inaen soamwoon a itto sengaeriaei?
44 Pwe igiwe rhag i rongorong oamw koapwong, iwe nge aete noan upwaei a mwagiut reen aaen kker.
45 Ifa mwo oamw kker pwe wa niugiuw pwe kkepas we aaen Soamwoon ngaeniug nge epwe nnet noa!”
Aaen Maria Keoniun Aepingeping
46 Maria a iura pwe,
“Nee tipaei a aepingepinga Soamwoon;
47 ngeoniuy apwapwa pwe aegin Deus iiy aaei Rhooan Aemenaw,
48 pwe iya maengiaei ngaang naiun rhooan akkiuneo man sessoan!
Saengi igina oanongeer aeremas nge repwene faingiaei pwe ngaang wenepwu,
49 pwe reen min mwamwaai kka Deus na oarosaen kkeman a feeori ngaeniaei.
Minna itan ina essoar;
50 saengi eew me eew saaer e pwaeri aan ffayeo ngaeniir rhooan oassoara.
51 A aeiti noa paiun na e kkeman
nge e oamwotoraar noa rhooana re namanam taegias noan aar niunniuwaen.
52 A oatoraar tiw king kka re mamaaw me wooan nenien mooatoor,
nge e saeregiir tae ikka re sessoan.
53 A oamwongoor rhooa pecchai ngaeni min mwamwaai,
nge a aefengaar noa rhooa pisaegisaeg nge esooar oawton paiiur.
54-55 Iiy e ammwarhiuto rhag ppwon we aan ngaeniir rhooawe rhaepetorh,
nge a itto pwe epwe fang tipaengieer rhooawe re Israel iwe naiun rhooan akkiuneo.
Iiy e maengiy rhag pwe epwe pwaeri ffaayeo we aan ngaeni Abraham
me oanongeer rhooan teowe aan iwe esooar iaenin!”
56 Epwe enuuw meram aaen Maria no aegini reen Elizabeth nge a sefaaeniti pwugusan.
Wupwutiwen John Baptist
57 Enoa tooto oatowe Elizabeth epwene nainai, nge a timenewaegini erhai aetemwaaen.
58 Rhooan weni oaron me rhooa kkewe repwugusan ra rongorong ifa mwo aaen soamwoon mwamwaai ngaeni, iwe iir ra maegin tapweei reen aan pwapwa.
59 Igiwe aetewe a eew week aan no, ra itto repwe circumcise aegini, nge repwene aeitae ngaeni pwe Zechariah, aeiteitaen mwaaen we seman.
60 Nge rhooapwut we inan a iura pwe, “Aapw! Epwe itaeni John.”
61 Nge ra aengaeni niewe pwe, “Aetae esooar re pwugusoamw ne e ina itan!”
62 Nge iir ra taenepom ngaeni mwaaen we seman, meeta e mwerhaen pwe aetewe epwe itaeni.
63 Zechariah a tingoar eew pwapwior nge a foatogitiw pwe, “Itan nge John.” Ifa mwo aar riutae rhooawe!
64 Reen oatonaan rhag nge Zechariah a mmwenen kkepas, a rhaepetae aan aepingepinga Deus.
65 Rhooan no oaroor ra igin mesag, nge kkepesaen minikkeei a rheeoi noa wooan rhugun aepinoamwon Judea.
66 Rhooan rongorong kkepas we ra gaen niunniuwaennei nge ra aeiyeg pwe, “Meeta aeteei epwene no pwe iiy?” Pwe igiwe epwae noa pwe maemaewaen Soamwoon eno wooan.
Aaen Zechariah Woowo
67 Zechariah we semaen John a sseog noa reen Espritu Santus, nge a aepesa wow kkepesaen oarongorong we aaen Deus:
68 “Sipwe aepingepinga Soamwoon iwe aaen Israel Deus!
A itto epwe fang tipaengiaen naiun aeremas nge aessaenetaegiir noa.
69 A fang ngaenigirh naiurh rhooan aemenaw e igin kkeman,
rhooan teowe aaen David iwe naiun rhooan akkiuneo.
70 A ppwon ngaeniir profeta kkewe mweoiwe
71 pwe iiy epwe aemenewaegirh saengiir rhooan kkoapwut ngaenigirh,
saengi maemaeweer rhooakkena re aeni giirh aeffaeioapwut.
72 E iura pwe epwe pwaeri ngaeniir rhooakkena rhaepetorh ffaiyeo
iwe me e maengiy ppwon ssoar we aan.
73-74 Noan aan aekkepan ngaeni Abraham we rhaepetorh
iiy eppwon pwe epwe aemenewaegirh saengiir rhooan oapwutaegirh,
iwe nge e nigiti ngaenigirh pwe sisoapw mesag noan aarh engaang ngaeni,
75 pwonno giirh sipwe ssoar nge si mwamwaai me weni mmwan
noan oanongaen raaenin aarh menaw.
76 “Een naeyi, wopwene ffai pwe profeta we naiun Deus na oarosaen taegias.
Een wopwene mmweei Soamwoon wopwene oamoannatae ennepan,
77 wopwe aengaeniir naiun aeremas repwene menaw igine emwus noa monofitiir.
78 Naiurh Deus ina e sseogiun ffayeo nge etip mererhaeg.
Epwe feeori pwe seremaen menaw epwe ttinitiw wooarh
79 nge seremaen wooan naaeng epwe ttin noa wooar rhooa no noan rorhappiungiun maenoa,
pwe epwe aeitiiti mesaen gupworh noan ennepaen oapoas.”
80 Iwe a temoag tae aetewe iwe a mamaaw noa oanongan me ngeoniun. Iwe a no noan desert we e toori noan raaenin we a pwae ngaeniir re Israel.