18
عٍ سِفَقٍ كٌرِنتِ
1 نَ شَنبِ، ثْلُ نَشَ كٍلِ عَتّن، عَ نَشَ سِفَ كٌرِنتِ.
2 عَ نَشَ يُوِقِ كٍرٍن لِ نَا، عَ شِلِ عَكِلَ، ثٌنتُكَ نَن عَ رَ. عَ نُ بَشِ قَدٍ كٍلِ عِتَلِ عَ نُن عَ شَ فِنّ ثِرِ سِلَ، بَرِ مَ كِلْدِ نُ بَرَ يُوِقِ بِرِن يَامَرِ عٍ شَ مِنِ رْ مَ. ثْلُ نَشَ كَقُ عٍ مَ،
3 بَرِ مَ عٍ نُ وَلِ كٍرٍن نَن نَبَمَ، كِرِ بَنشِ رَقَلَقٍ. عَ نَشَ لُ عٍ شْنيِ، عٍ نُ وَلِ نَا.
4 ثْلُ نُ وْيّنمَ سَلِدٍ كُي مَلَبُ لْشْي بِرِن. عَ نُ يُوِقِيٍ نُن فِرّكِكَيٍ رَدَنشَنِيَ.
5 سِلَسِ نُن تِمٌتٍ تٌ سٌ، كٍلِ مَسٍدٌن، ثْلُ نَشَ عَ يّتّ قِ كَوَندِ رَبَقٍ فبَنسَن مَ. عَ نُ عَ قَلَ يُوِقِيٍ بّ عَ عِسَ نَن عَلَ شَ مِشِ سُفَندِشِ رَ.
6 كْنْ يُوِقِيٍ تٌ نَ مَتَندِ كٌنبِ رَ، ثْلُ نَشَ عَ شَ دٌنمَ عِكٌنكٌن تْنشُمَ رَ، عَ نَشَ عَ قَلَ عٍ بّ، «شَ وٌ لْي، وٌ تَن نَن قْشِ نَ نَ رَ. ﭑ تَن بَرَ نَ كٌتٍ بَ ﭑ شُن. يَكْسِ ﭑ سِفَمَ نّ سِ فبّتّيٍ مَ.»
7 عَ تٌ كٍلِ نَا، عَ نَشَ سٌ مِشِ ندٍ شْنيِ، عَ كَنيِ شِلِ تِتِ يُسُتُ، عَ فَاشُ عَلَ يَ رَ. عَ شَ بَنشِ نُ نَ سَلِدٍ قّ مَ.
8 نَ تّمُي، كِرِ سِثُ سَلِدٍ شُنمَتِ نَشَ دَنشَنِيَ مَرِفِ مَ عَ نُن عَ شَ دٍنبَيَ بِرِن. كٌرِنتِكَيٍ وُيَشِ نَشٍيٍ نُ ثْلُ شُي مّشِ، عٍ قَن نَشَ دَنشَنِيَ، عٍ نَشَ عٍ شُنشَ يٍ شْورَ.
9 مَرِفِ نَشَ عَ قَلَ ثْلُ بّ لَامَتُنيِ رَ كْي كُي، «عِ نَشَ فَاشُ مُكُ! وْيّن! عِ نَشَ دُندُ،
10 بَرِ مَ ﭑ نَ عِ قْشْ رَ. مِشِ يٌ بّلّشّ مُ عِ لِمَ عَ شَ قٍ حَاشِ رَبَ عِ رَ، بَرِ مَ مِشِ فبٍفبٍ نَ ﭑ بّ يِ تَا كُي.»
11 ثْلُ نَشَ لُ نَا حّ كٍرٍن كِكٍ سٍننِ. عَ نُ كٌرِنتِكَيٍ شَرَن عَلَ شَ مَسٍنيِ رَ.
12 فَلِيٌن تٌ نُ نَ عَكَيِ مَنفّ رَ، يُوِقِيٍ نَشَ يَنقَنتٍيَ شِرِ ثْلُ شُن، عٍ نَشَ عَ شَنِن كِيتِسَيٍ يِرٍ.
13 عٍ نَشَ عَ قَلَ، «يِ دِ نَن مِشِيٍ كُي عِسٌمَ عٍ شَ عَلَ بَتُ كِ فبّتّ نَشَن مُ سّرِيّ كِ رَ.»
14 ثْلُ تٌ وْيّن قْلْ، فَلِيٌن نَشَ عَ قَلَ يُوِقِيٍ بّ، «شَ عَ سَ لِ تِنشِنتَرٍيَ نَ عَ رَ، شَ نَ مُ عَ رَ وَلِ كٌبِ ندٍ، ﭑ ﭑ تُلِ مَتِمَ نّ وٌ رَ نُ،
15 كْنْ شَ عَ سَ لِ بٌورٍ مَتَندِ نَ عَ رَ وْيّنيِ مَ، شَ نَ مُ عَ رَ شِلِيٍ مَ، عَ نُن وٌ شَ سّرِيّ مَ، نَ نَ وٌ تَن نَن مَ. ﭑ مُ وَ مَ قِندِقٍ نَ قٍ مَكِيتِمَ رَ.»
16 نَ كُي، عَ نَشَ عٍ كٍرِ كِيتِ بَنشِ كُي.
17 حَمَ نَشَ سَلِدٍ شُنمَتِ سٌسِتٍنٍ سُشُ، عٍ عَ بْنبْ كِيتِ بَنشِ تَندٍ مَ، كْنْ فَلِيٌن مُ عٍ هَنسَ.
عٍ فبِلٍنقٍ عَنتِيْكِ
18 ثْلُ تٌ بُ كٌرِنتِ كِ قَنيِ رَ، عَ نَشَ كٍلِ عَ نفَشَكٍرٍنيِيٍ شُن مَ. عَ نَشَ بَكِ كُنكُي كُي عَ نُن ثِرِ سِلَ نُن عَكِلَ، عٍ سِفَ سِرِيَ. عَ نَشَ عَ شُنيِ بِ سٍنشٍرٍيَ، بَرِ مَ عَ نُ بَرَ لَايِدِ تٌنفٌ عَلَ بّ.
19 عٍ تٌ سٌ عٍقّسّ، ثْلُ نَشَ عَ حّرّبٌورٍيٍ لُ نَا. عَ نَشَ سٌ سَلِدٍ كُي، عٍ نُن يُوِقِيٍ نَشَ سُمُن.
20 عٍ نَشَ عَ مَيَندِ عَ شَ بُ نَا،
21 كْنْ نَ مُ عَ شُنيِ سُشُ. عَ نَشَ عَ حُنفُ عٍ مَ. عَ نَشّ، «قٌ ﭑ شَ سَ سَلِ دَرِ سَلَمُ نّ. شَ عَلَ تِن، ﭑ مَن قَمَ وٌ شْنيِ.»
22 عَوَ، عَ نَشَ بَكِ كُنكُي كُي، عَ كٍلِ عٍقّسّ، عَ سِفَ سٍسَرٍ. عَ تٌ فّ دَنشَنِيَتْي حَمَ شّيبُدٍ، عَ نَشَ فٌرٌ عَنتِيْكِ.
ثْلُ شَ بِيَاسِ سَشَن ندٍ
23 ثْلُ تٌ بَرَ سَشَنيِ رَدَنفِ عَنتِيْكِ، عَ نَشَ كِرَ تٌنفٌ، عَ نَشَ فَلَتِ نُن قِرِفِيَ بْشِ بِرِن عِسَ، عَ نُ عِسَ قْشِرَبِرّيٍ رَلِمَنِيَ.
24 عَثٌلٌسِ، يُوِقِ ندٍ نَشَن بَرِشِ عَلٍسَندِرٍ، عَ نَشَ عٍقّسّ لِ. عَ نُ قَتَ وْيّندٍ، عَ كِتَابُي قَن كٌلٌن.
25 عَ نُ شَرَنشِ مَرِفِ شَ كِرَيَ رَ. عَ نَشَ عِسَ شَ قٍ مَسٍن عَ قَنيِ رَ، كْنْ عَ نُ يَيَ شَ شَرَنيِ نَن فبَنسَن كٌلٌن شُنشَ تِقٍ يٍ شْورَ.
26 عَ نَشَ سٌ وْيّنقٍ عَ رَوَ سَشِ رَ سَلِدٍ كُي. عَكِلَ نُن ثِرِ سِلَ تٌ عَ شُي مّ، عٍ نَشَ كَقُ عَ مَ عَلَكٌ عٍ شَ عَلَ شَ كِرَيَ مَسٍن عَ بّ عَ كِ مَ.
27 نَ شَنبِ عَ تٌ نُ وَ مَ دَنفِقٍ عَكَيِ، عَ نفَشَكٍرٍنيِيٍ نَشَ عَ رَلِمَنِيَ. عٍ نَشَ بَتَاشّ سّبّ عِسَ قْشِرَبِرّيٍ مَ عَ عٍ شَ عَ رَ سّنّ. عَ شَ سِفّ نَشَ قِندِ قٍ قَنيِ رَ دَنشَنِيَتْييٍ بّ عَكَيِ بْشِ مَ، نَشٍيٍ دَنشَنِيَ عَلَ شَ هِننّ سَابُي رَ.
28 عَثٌلٌسِ نَشَ يُوِقِيٍ مَتَندِ سّنبّ رَ كّنّ مَ، عَ نَشَ عَ مَسٍن كِتَابُي رَ عَ عِسَ نَن عَلَ شَ مِشِ سُفَندِشِ رَ.